ନୂଆଦିଲ୍ଲୀ, ୨୨/୦୩: ଅନଲାଇନ୍ ଫୁଡ୍ ଡେଲିଭରି କମ୍ପାନୀ ଜୋମାଟୋର ସିଇଓ ଦୀପିନ୍ଦର ଗୋୟଲ୍ ଦ୍ୱିତୀୟ ବିବାହ କରିଛନ୍ତି । ମେକ୍ସିକାନ୍ ମଡେଲ୍ ଗ୍ରେସିଆ ମୁନୋଜଙ୍କୁ ବିବାହ କରିବା ପରେ ଇନଷ୍ଟାଗ୍ରାମରେ ଫଟୋ ପୋଷ୍ଟ କରିଛନ୍ତି ଦୀପିନ୍ଦର । ଯାହା ଏବେ ନେଟିଜେନଙ୍କ ମନ ମୋହିଛି ।

ଏହା ପୂର୍ବରୁ ହାର୍ଟ ଇମୋଜି ଦେଇ ଏକ ପୋଷ୍ଟରେ ଗ୍ରେସିଆଙ୍କୁ ଟ୍ୟାଗ୍ କରିଥିଲେ ଦୀପିନ୍ଦର । ଉକ୍ତ ପୋଷ୍ଟକୁ ୨ଟି ହାର୍ଟ ଇମୋଜି ଦେଇ ଗ୍ରେସିଆ ପୁନଃ ସେୟାର୍ କରିଥିଲେ । ରିପୋର୍ଟ କିଛି ମାସ ପୂର୍ବରୁ ଦୀପିନ୍ଦର ଓ ଗ୍ରେସିଆ ବିବାହ କରିଥିବା ବେଳେ ଫେବ୍ରୁଆରୀରେ ହନିମୁନରୁ ଫେରିଛନ୍ତି ।

ଗ୍ରେସିଆ ମୁନୋଜ କିଏ ?

ଗ୍ରେସିଆ ମୁନୋଜ ହେଉଛନ୍ତି ମେକ୍ସିକାନ୍ ମଡେଲ୍ । ଏବେ ସେ ଦିଲ୍ଲୀରେ ରହୁଛନ୍ତି ।

ମଡେଲିଂ ବାଦ୍ ଗ୍ରେସିଆ ଟେଲିଭିଜନରେ ଉପସ୍ଥାପନା କରନ୍ତି ।

ମେଟ୍ରୋପୋଲିଟାନ୍ ଫ୍ୟାସନ୍ ୱିକ୍-୨୦୨୨ର ବିଜେତା ହେଉଛନ୍ତି ଗ୍ରେସିଆ ।

ମଡେଲିଂରୁ ଦୂରେଇ ରହୁଥିବା ଗ୍ରେସିଆ ଏବେ ନିଜର ଲକଜୁରି କଞ୍ଜୁମର ପ୍ରଡକ୍ଟକ୍ସକୁ ନେଇ ଷ୍ଟାର୍ଟଅପ୍ ଉପରେ କାମ କରୁଛନ୍ତି ।

ସେ ଜଣେ ଭ୍ରମଣକାରୀ ହୋଇଥିବା ବେଳେ ଫ୍ରାନ୍ସ, ଆମେରିକା, ଭାରତ ଓ ମେକ୍ସିକୋର ଫଟୋ ତାଙ୍କ ସୋସିଆଲ୍ ମିଡିଆ ଟାଇମଲାଇନର ଶୋଭା ବଢ଼ାଉଛି ।

ଜୋମାଟୋ ସିଇଓ ଦୀପିନ୍ଦର ଗୋୟଲ୍ ପୂର୍ବରୁ କାଞ୍ଚନ ଜୋଶୀଙ୍କୁ ବିବାହ କରିଥିଲେ । ଆଇଆଇଟି ଦିଲ୍ଲୀରେ କାଞ୍ଚନଙ୍କୁ ଭେଟିଥିଲେ ଦୀପିନ୍ଦର । ନିକଟରେ ନିରାମିଷ ଖାଦ୍ୟ ଡେଲିଭରି କରୁଥିବା ଡେଲିଭରି ବୟଙ୍କ ଲାଗି ସବୁଜ ପୋଷାକକୁ ନେଇ ଜୋମାଟୋ ବିବାଦକୁ ଆସିବା ପରେ ଦୀପିନ୍ଦର ଦ୍ୱିତୀୟ ବିବାହ କରିଥିବା ଖବର ଆସିଛି ।

୪୧ ବର୍ଷୀୟ ଦୀପିନ୍ଦର ଗୋୟଲ୍ ନୂଆ ପିଢ଼ିର ଅଗ୍ରଣୀ ଭାରତୀୟ ଉଦ୍ୟୋଗୀମାନଙ୍କ ମଧ୍ୟରୁ ଅନ୍ୟତମ । ସେ ୨୦୦୮ ମସିହାରେ ଜୋମାଟୋ ଆରମ୍ଭ କରିଥିଲେ । ତା ପୂର୍ବରୁ ବେନ୍ ଆଣ୍ଡ କମ୍ପାନୀରେ କାମ କରୁଥିଲେ ଦୀପିନ୍ଦର ।