ନୂଆଦିଲ୍ଲୀ, ୨୭/୦୩: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଅସୁସ୍ଥ ହୋଇ ପଡ଼ିଛନ୍ତି । ଆମ୍ ଆଦମୀ ପାର୍ଟି ଦାବି କରିଛି, ଇଡି ରିମାଣ୍ଡରେ ଥିବା କେଜ୍ରିୱାଲ୍ ଅସୁସ୍ଥ ଅଛନ୍ତି । କେଜ୍ରିୱାଲଙ୍କ ରକ୍ତ ସର୍କରା ସ୍ତର ଲଗାତାର ବଢ଼ୁଛି ଖସୁଛି । ଏବେ ଅରବିନ୍ଦ କେଜ୍ରିୱାଲଙ୍କ ରକ୍ତ ସର୍କରା ସ୍ତର ୪୬କୁ ଖସି ଆସିଛି । ଡାକ୍ତରଙ୍କ କହିବା ଅନୁସାରେ, ରକ୍ତ ସର୍କରା ସ୍ତର ଏତେ ଖସିବା ବିପଜ୍ଜନକ ।

ଏହା ପୂର୍ବରୁ ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନୀତା ଏକ ଭିଡିଓ ଜାରି କରି କହିଥିଲେ, ସେ ମଙ୍ଗଳବାର ସନ୍ଧ୍ୟାରେ ଜେଲରେ କେଜ୍ରିୱାଲଙ୍କୁ ଭେଟି ଥିଲେ । କେଜ୍ରିୱାଲଙ୍କ ମଧୁମେହ ରହିଥିବା ବେଳେ ରକ୍ତ ସର୍କରା ସ୍ତର ଠିକ୍ ରହୁ ନାହିଁ । କିନ୍ତୁ କେଜ୍ରିୱାଲ ବହୁତ ସାହାସୀ ଓ ସଚ୍ଚା ଦେଶଭକ୍ତ । କେଜ୍ରିୱାଲଙ୍କ ଶରୀର ଜେଲ୍ ଭିତରେ ରହିଥିବା ବେଳେ ଆତ୍ମା ସମସ୍ତଙ୍କ ପାଖରେ ରହିଛି । ଆଖି ବନ୍ଦ କଲେ ଆପଣମାନେ ମୋତେ ପାଖରେ ପାଇ ପାରିବେ ବୋଲି କେଜ୍ରିୱାଲ୍ କହିଥିବା ସୁନୀତା କହିଥିଲେ ।

ଏହା ଛଡ଼ା ସୁନୀତା କହିଥିଲେ, ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଚଢ଼ାଉ ବେଳେ ଟଙ୍କାଟିଏ ବି ମିଳି ନାହିଁ । ମାର୍ଚ୍ଚ ୨୮ ଗୁରୁବାର କେଜ୍ରିୱାଲ୍ ଅଦାଲତରେ ହାଜର ହେବା ସମୟରେ ବଡ଼ ଖୁଲାସା କରିବେ ବୋଲି କହିଛନ୍ତି ସୁନୀତା । ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ କେଜ୍ରିୱାଲଙ୍କୁ ମାର୍ଚ୍ଚ ୨୧ରେ ଦିଲ୍ଲୀ ଅବକାରୀ ନୀତି ମାମଲାରେ ଗିରଫ କରିଥିଲା ଇଡି । ଏହାପରେ କୋର୍ଟ ମାର୍ଚ୍ଚ ୨୮ ପର୍ଯ୍ୟନ୍ତ କେଜ୍ରିୱାଲଙ୍କୁ ଇଡି ରିମାଣ୍ଡରେ ପଠାଇଥିଲେ ।

ସୁନୀତାଙ୍କ ଅନୁସାରେ, କେଜ୍ରିୱାଲ୍ କହିଛନ୍ତି ସେ ମାର୍ଚ୍ଚ ୨୮ରେ ସବୁ ସତ କହିବା ସହ ପ୍ରମାଣ ବି ଦେବେ । ସେ କହିଛନ୍ତି, ଇଡି ୨ ବର୍ଷ ଧରି ତଦନ୍ତ କରୁଥିଲେ ମଧ୍ୟ ଟଙ୍କାକର ପ୍ରମାଣ ପାଇ ନାହିଁ । ମୁଖ୍ୟମନ୍ତ୍ରୀଙ୍କ ବାସଭବନରେ ରେଡ୍ କରିଥିବା ବେଳେ ମାତ୍ର ୭୩ ହଜାର ଟଙ୍କା ମିଳିଛି । ଜେଲରେ ଥିବା ବେଳେ ସରକାରୀ ନିର୍ଦ୍ଦେଶନାମା ଜାରି କରିବା କେନ୍ଦ୍ରକୁ ଅଡ଼ୁଆରେ ପକାଇଛି । କଣ ଦିଲ୍ଲୀକୁ ବରବାଦ କରିବାକୁ କେନ୍ଦ୍ର ଚାହୁଁଛି ବୋଲି ସେ ପ୍ରଶ୍ନ କରିଛନ୍ତି ।