ବାରିପଦା,୧୯/୦୩: ବିଭିନ୍ନ  ଜନଜାତିଙ୍କ ପ୍ରଥା ଓ ପରମ୍ପରା ବେଳେ ବେଳେ ମଣିଷ ପଣିଆର ବିରୋଧୀ ପାଲଟିଯାଏ । ଏଭଳି ଏକ ଅଭାବନୀୟ ଘଟଣାର ଚିତ୍ର ସାମ୍ନାକୁ ଆସିଛି  ମୟୂରଭଞ୍ଜ ଜିଲ୍ଲା ବାରିପଦା ସହରଠାରୁ  ମାତ୍ର ୭ କିମି ଦୂର ଶାମାଖୁଣ୍ଟା ବ୍ଲକ  ଅନ୍ତର୍ଗତ ଜୟବିଲାଠାରେ । ଏଠାରେ  ତିନିଦିନ ଧରି ଜଣେ ୭୦ ବର୍ଷିଆ  ବୃଦ୍ଧାଙ୍କ ଶବ ସେମିତି ପଡି ରହିଥିବା  ବେଳେ ଗାଁ ଲୋକେ ତାଙ୍କ ପ୍ରଥା ଓ ପରମ୍ପରାର ଦ୍ୱାହି ଦେଇ ଶବ ସତ୍କାର କରିବାକୁ ଆସି ନଥିଲେ । ସେପଟେ  ମୃତକଙ୍କ ପୁଅ ଡାକ୍ତର ସିଂ ଗାଁ ଲୋକଙ୍କୁ  ୧୦ କିଲୋ ମେଣ୍ଢା ମାଂସ ଦେବାକୁ ରାଜି ହେବା ପରେ ସେମାନେ ଶବ ସତ୍କାର  ପାଇଁ ଆଗକୁ ଆସିଥିଲେ । ଏପରି ଘଟଣା ବୁଦ୍ଧିଜୀବୀଙ୍କୁ ମର୍ମାହତ କରିଛି ।  

ସୂଚନା ଅନୁଯାୟୀ ଜୟବିଲା ଗ୍ରାମରେ ସୋମବାରୀ ସିଂ ନାମକ  ଜଣେ ୭୦ ବର୍ଷୀୟା ବୃଦ୍ଧାଙ୍କ ଶନିବାର ଦ୍ୱିପ୍ରହରରେ ମୃତ୍ୟୁ ହୋଇଥିଲା । ମୁଣ୍ଡା ଜନଜାତିଙ୍କ ପରମ୍ପରା ଅନୁଯାୟୀ ଗ୍ରାମବାସୀଙ୍କୁ ପଣ ଦେବାରେ ମୃତକଙ୍କ ପୁଅ ଅକ୍ଷମ ହୋଇଥିଲେ । ପଣ ଥିଲା ଯେ ମୃତକଙ୍କ ସମ୍ପର୍କୀୟ ୧୦ କିଲୋ ମେଣ୍ଢା ମାଂସ ଦେଲେ ଯାଇ ଶବ ଉଠିବ । ମାତ୍ର ସୋମବାରୀଙ୍କ ପୁଅ ଡାକ୍ତର ସିଂ  ଏହା ଦେବାକୁ ସକ୍ଷମ ହୋଇନଥିଲେ ।  ତେଣୁ ସୋମବାରଠାରୁ ଶବ ସେମିତି  ଘରେ ପଡିରହିଥିଲା । ଗ୍ରାମବାସୀ  ଶବ ସତ୍କାର କରାଇ ଦେଇନଥିଲେ ।  ତାଙ୍କ କହିବା କଥା ମୃତକର ପୁଅ ଓ  ତାର ପରିବାର ଗାଁ ଲୋକଙ୍କ ସମସ୍ତ  କାର୍ଯ୍ୟକ୍ରମରେ ଯୋଗଦେଇ ଖାଇ  ପିଇ ଆସୁଥିବା ବେଳେ ଗାଁ ଲୋକଙ୍କୁ  କେବେ କୌଣସି କାର୍ଯ୍ୟକ୍ରମରେ  ଡ଼ାକି ଖାଇବାକୁ ଦେଇନାହାନ୍ତି ।  

ଗାଁରେ ଯେଉଁ ପ୍ରଥା ରହିଛି ସେଥିରେ  ସମସ୍ତେ ପୂରୁଛନ୍ତି । ଡାକ୍ତର ସିଂ ନିଜେ  ଯାଇ ଅନ୍ୟ ଘରେ ଖାଇପିଇ ଆସୁଛି ।  ମାତ୍ର ନିଜ ମା’ ବେଳକୁ ସେ କାହିଁକି  ପଛଘୁଞ୍ଚା ଦେଉଛି । ନିଜେ ଏକରୁ ଅଧିକ ବାହା ହୋଇଥିଲେ ସୁଦ୍ଧା କାହାକୁ ବି  ଡାକ୍ତର ଭୋଜିଭାତ ଦେଇନାହିଁ । ତେଣୁ ପରମ୍ପରା ମୁତାବକ ଗାଁ ଲୋକଙ୍କୁ ମେଣ୍ଢା  କିମ୍ବା ଛେଳି ମାଂସ ଖାଇବାକୁ ଦେଲେ  ଯାଇ ଶବ ସତ୍କାର ହେବ । ତେବେ ମୃତକଙ୍କ ବଡ଼ ପୁଅ ଡାକ୍ତର ସିଂହ  କୌଣସି ମତେ ୧୦ କିଲୋ ମେଣ୍ଢା ମାଂସ ଦେବାର କଥା ଦେବା ପରେ ଗାଁ ଲୋକେ  ଶବ ସତ୍କାର ପାଇଁ ହାତ ବଢାଇଥିଲେ।