ହରିୟାଣା,୦୭/୦୯: ହରିୟାଣାର ଚରଖୀ ଦାଦରୀ ଜିଲ୍ଲାରେ ଏକ ଅଜବ ମାମଲା ସାମ୍ନାକୁ ଆସିଛି । ଜଣେ ୮ମ ପାସ୍ ଶ୍ରମିକଙ୍କ ବ୍ୟାଙ୍କ୍ ଖାତାରେ ୨୦୦ କୋଟି ଟଙ୍କା ଜମା ହୋଇଛି । ଏ ବିଷୟରେ ଜାଣିବା ପରେ ଶ୍ରମିକଙ୍କ ମୁଣ୍ଡ କାମ କରୁନି । ତାଙ୍କ ପରିବାର ଏ ନେଇ ଆଚମ୍ବିତ । ତାଙ୍କ ବ୍ୟାଙ୍କ୍ ଖାତା ମାଧ୍ୟମରେ କେହି ଜଣେ ବଡ଼ ଧରଣର ଜାଲିଆତି କରୁଛି ବୋଲି ସେ ପୁଲିସକୁ କହିଛନ୍ତି । ବ୍ୟାଙ୍କ୍ ଆକାଉଣ୍ଟ୍କୁ ୨୦୦ କୋଟି ଆସିବା ପରେ ସେ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ଡିଜିପିଙ୍କ ସମେତ ପୁଲିସ ଅଧିକାରୀଙ୍କୁ ଟ୍ୱିଟ୍ ଜରିଆରେ ସୂଚନା ଦେଇଛନ୍ତି ।
ଦାଦରୀ ଜିଲ୍ଲାର ବରେଲା ଗାଁ ବାସିନ୍ଦା ବିକ୍ରମ ଦିନ ମଜୁରି କରନ୍ତି । ତାଙ୍କ ୟଶ୍ ବ୍ୟାଙ୍କ୍ ଆକାଉଣ୍ଟ୍ରେ ୨୦୦ କୋଟି ଟଙ୍କା ଜମା ହେବା ପରେ ୟୁପି ପୁଲିସ ତାଙ୍କ ଘରେ ପହଞ୍ଚି ପଚରାଉଚରା ଆରମ୍ଭ କଲା । ଏହି ଅର୍ଥ କେଉଁଠୁ ଆସିଲା ବୋଲି ପୁଲିସ ପଚାରିବାରୁ ବିକ୍ରମଙ୍କ ଆଶ୍ଚର୍ଯ୍ୟର ସୀମା ରହିଲା ନାହିଁ । ବ୍ୟାଙ୍କ୍ ତାଙ୍କ ଆକାଉଣ୍ଟ୍କୁ ଫ୍ରିଜ୍ କରିଦେଇଛି । ଖାସ୍ କଥା ହେଉଛି, ଏହି ରାଶି ଆକାଉଣ୍ଟ୍ରେ ପକାଇବା ପାଇଁ ଯେତେ ଥର ନେଣଦେଣ ହୋଇଛି, ସମସ୍ତ ଅଙ୍କ ୯, ଯାହା ସମସ୍ତଙ୍କୁ ଚକିତ କରିଛି । ବିକ୍ରମ ୨ ମାସ ତଳେ ଚାକିରି କରିବାକୁ ପଟୌଦୀ କ୍ଷେତ୍ରକୁ ଯାଇଥିଲେ । ସେଠାରେ ଏକ୍ସପ୍ରେସ୍-୨୦ ନାମକ କମ୍ପାନିରେ ଶ୍ରମିକ ଭାବେ ଯୋଗ ଦେଲେ । ବିକ୍ରମଙ୍କ ଭାଇ ପ୍ରଦୀପଙ୍କ ଅନୁସାରେ, ବ୍ୟାଙ୍କ୍ ଆକାଉଣ୍ଟ୍ ଖୋଲିବା ପାଇଁ ବିକ୍ରମଙ୍କଠାରୁ କାଗଜପତ୍ର ନିଆଗଲା । ପରେ ଆକାଉଣ୍ଟ୍ ରଦ୍ଦ ହେବା କଥା କହି ତାଙ୍କୁ ଚାକିରିରୁ ବାହାର କରିଦିଆଗଲା । ସେ ମାତ୍ର ୧୭ ଦିନ କାମ କରିଥିଲେ।