ନୂଆଦିଲ୍ଲୀ, ୦୭/୦୮ : ଆମେରିକୀୟ ଅଲିମ୍ପିଆନ୍ ଜଷ୍ଟିନ୍ ବେଷ୍ଟ । ନୌଚାଳନାରେ ଦେଶ ପାଇଁ ପ୍ରଥମ ସ୍ୱର୍ଣ୍ଣ ପଦକ ହାସଲ କରି ସେ ଇତିହାସ ସୃଷ୍ଟି କରିଛନ୍ତି । ଏବେ ପୁଣି ଥରେ ସେ ଖବରର ଶିରୋନାମା ହୋଇଛନ୍ତି । ଆଇଫିଲ ଟାୱାର ସାମ୍ନାରେ ନିଜର ଦୀର୍ଘ ଦିନର ଗର୍ଲଫ୍ରେଣ୍ଡ୍ଙ୍କୁ ସେ ୨,୭୩୮ ହଳଦିଆ ଗୋଲାପ ଫୁଲ ଦେଇ ପ୍ରେମ ନିବେଦନ କରିଛନ୍ତି । ଏହି ଖାସ୍ ମୁହୂର୍ତ୍ତର ଟିଭିରେ ସିଧାପ୍ରସାରଣ ହୋଇଥିଲା, ଯାହା ବିଶ୍ୱବାସୀଙ୍କ ହୃଦୟ ଜିତିଛି । ଜଷ୍ଟିନ୍ ନିଜେ ଏହି ନିଆରା ପ୍ରେମ ନିବେଦନର ଭିଡିଓ ଇନ୍ଷ୍ଟାଗ୍ରାମ୍ରେ ଶେୟାର କରିଛନ୍ତି । ଜଷ୍ଟିନ୍ ଗର୍ଲଫ୍ରେଣ୍ଡ୍ଙ୍କ ସାମ୍ନାରେ ଆଣ୍ଠେଇ କହିଥିଲେ ‘ଲୈନି ଅଲିଭିଆ ଡନ୍କାନ, ତୁମେ ମୋ ଜୀବନର ପ୍ରେମ’ । ଏହା ଦେଖି ଲୈନି ସ୍ତବ୍ଧ ହୋଇଯାଇଥିଲେ । ପ୍ରତିକ୍ରିୟା ଦେବାକୁ ତାଙ୍କ ପାଖରେ ଭାଷା ନ ଥିଲା ।
ଜଷ୍ଟିନ୍ ଆହୁରି କହିଥିଲେ ‘ଆମର ପ୍ରଥମ ଡେଟିଂଠାରୁ ତୁମେ ମୋ ପାଇଁ ଖାସ୍ ଥିଲ । ଅଲମ୍ପିକ୍ସ ଯିବାକୁ ଚାହୁଁଛି ବୋଲି ମୁଁ ତୁମକୁ କହିଥିଲି । ତୁମେ ବିନା ଦ୍ୱିଧାରେ ହଁ କହିଥିଲ । ତୁମେ ଅତ୍ୟନ୍ତ ସୁନ୍ଦରୀ ଓ ବୁଦ୍ଧିମତୀ । ତୁମ କରୁଣାଭାବର କୌଣସି ସୀମା ନାହିଁ । ମୁଁ କାହାକୁ ଜାଣିନି, ଯିଏ ତୁମକୁ ଭଲପାଏ ନାହିଁ ।’ ଏହା କହିବା ପରେ ଜଷ୍ଟିନ୍ ପକେଟ୍ରୁ ମୁଦି ବାହାର କରି ଲୈନିଙ୍କୁ କହିଲେ ‘ଏହା ମୋ ଜୀବନର ସବୁଠୁ ସହଜ ପ୍ରଶ୍ନ । ମୋ ଜୀବନର ବାକି ସମୟ ମୁଁ ତୁମ ସହ ବିତାଇବାକୁ ଚାହୁଁଛି ଏବଂ ଆମେ ସାଙ୍ଗହୋଇ ପରିବାର ଗଢୁ ବୋଲି ଚାହୁଁଛି । ଲୈନି, ତୁମେ ମୋତେ ବିବାହ କରିବ?’ ଜଷ୍ଟିନ୍ଙ୍କ ପ୍ରେମ ନିବେଦନରେ ଲୈନି ସମ୍ପୂର୍ଣ୍ଣ ଭାବେ ଭାବବିହ୍ୱଳ ହୋଇପଡ଼ିଥିଲେ । ଲୁହଭରା ଆଖିରେ ସେ ପ୍ରେମ ନିବେଦନକୁ ସ୍ୱୀକାର କଲେ । ଏହି ନିଆରା ମୁହୂର୍ତ୍ତକୁ ସ୍ମରଣୀୟ କରିବା ପାଇଁ କିଛି ଲୋକ ହଳଦିଆ ଗୋଲାପର ବୁକେ ଧରି ପ୍ରେମୀଯୁଗଳଙ୍କ ପାଖରେ ଠିଆ ହୋଇଥିଲେ । ପ୍ରେମୀଯୁଗଳ ଏକାଠି ବିତାଇଥିବା ପ୍ରତ୍ୟେକ ଦିନର ପ୍ରତୀକ ରୂପେ ମୋଟ୍ ୨,୭୩୮ ଗୋଲାପ ଫୁଲ ଏହି ଖାସ୍ ମୁହୂର୍ତ୍ତରେ ଉପଯୋଗ ହୋଇଥିଲା । ଏ ନେଇ ଜଷ୍ଟିନ୍ କହିଛନ୍ତି, ଆମର ଏକାଠି ରହିବାର ପ୍ରତ୍ୟେକ ଦିନକୁ ଏହି ଗୋଲାପ ଫୁଲ ପ୍ରତିନିଧିତ୍ୱ କରୁଛନ୍ତି । ସ୍ନାପ୍ଚାଟ୍ରେ ଆମର ୨,୭୩୮ ଦିନ ବିତିଛି । ବାସ୍ତବରେ ଆମ ପ୍ରେମ ଅମର ହୋଇଗଲା ।’
