ଖୋର୍ଦ୍ଧା, ୦୨/୦୯ : ଖୋର୍ଦ୍ଧା ଜିଲ୍ଲା କଦଳୀ ବାଡି ରାସ୍ତାରେ ଘର କରି ରହୁଥିବା ବିଶ୍ବମ୍ବର ମୁଦୁଲିଙ୍କ ପରିବାର ଉପରକୁ ମରଣାନ୍ତକ ଆକ୍ରମଣ। ବିଶ୍ଵମ୍ଵର ମୁଦୁଲି, ତାଙ୍କ ପତ୍ନୀ ରମା ମୁଦୁଲି ଓ ପୁଅ ବିଜୟ ମୁଦୁଲିକୁ ରାତି ପ୍ରାୟ ୩ଟା ବେଳେ କଦଳୀ ବାଡି ଗ୍ରାମର ୭ ରୁ ୮ ଜଣ ଯୁବକ ମରଣାନ୍ତକ ଆକ୍ରମଣ କରିଛନ୍ତି। ଦୁର୍ବୃତ୍ତମାନେ ବିଶ୍ବମ୍ବରଙ୍କ ହାତକୁ ହାଣିବା ପରେ ପତ୍ନୀ ରମାଙ୍କ ବେକମୁଣ୍ଡାକୁ କ୍ରିକେଟ୍ ବ୍ୟାଟରେ ପିଟି ଦେବାରୁ ସେ ସଜ୍ଞାହୀନ ହୋଇ ତଳେ ପଡି ଯାଇଥିଲେ । ପରେ ପରେ ସେମାନେ ପୁଅ ବିଜୟକୁ ଆକ୍ରମଣ କରିଥିଲେ । 

ସୂଚନାନୁଯାୟୀ, ଏହି ଦୁର୍ବୃତ୍ତମାନେ ମୂର୍ତ୍ତି ତିଆରି କରୁଥିବା ମୁଦୁଲି ପରିବାରକୁ ମାଗଣା ମୂର୍ତ୍ତି ମାଗିଥିଲେ। ସେ ନ ଦେବାରୁ ରାଗ ରଖି ଦୁବୃର୍ତ୍ତମାନେ ବିଳମ୍ବିତ ରାତିରେ ମଦ୍ୟପାନ କରି ଏକ କାର ଓ ଦୁଇଟି ମୋଟର ସାଇକେଲରେ ଯାଇ ବିଶ୍ଵମ୍ଵରଙ୍କ ପରିବାର ଉପରକୁ ଆକ୍ରମଣ କରିଥିଲେ । ଆହତମାନେ ଖୋର୍ଦ୍ଧା ମେଡିକାଲରେ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି। ସଦର ଥାନା ପୁଲିସ୍ ଘଟଣାର ତଦନ୍ତ ଆରମ୍ଭ କରିଛି।