ଚଣ୍ଡିଗଡ଼, ୧୦/୦୨: ପଞ୍ଜାବରେ ମେଣ୍ଟ କରିବନି ଆପ୍ । ଏକାକୀ ଲଢ଼ିବ ଲୋକସଭା ନିର୍ବାଚନ । ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ ଅରବିନ୍ଦ୍ର କେଜ୍ରିୱାଲ୍ ଶନିବାର କହିଛନ୍ତି, ଇଣ୍ଡିଆ ମେଣ୍ଟରେ ଥିବା ଦଳ ସହ ପଞ୍ଜାବରେ କୌଣସି ମେଣ୍ଟ ହେବ ନାହିଁ ।
ପଞ୍ଜାବର ସମସ୍ତ ଲୋକସଭା ଆସନ ସହ ଚଣ୍ଡିଗଡ଼ରେ ଆପ୍ ଏକାକୀ ଲୋକସଭା ନିର୍ବାଚନ ଲଢ଼ିବ । 

କେଜ୍ରିୱାଲଙ୍କ ଏଭଳି ନିଷ୍ପତ୍ତି ଇଣ୍ଡିଆ ମେଣ୍ଟ ପାଇଁ ଏକ ବଡ଼ ଝଟକା ହୋଇଛି । ପଞ୍ଜାବର ୧୩ ଓ ଚଣ୍ଡିଗଡ଼ର ଗୋଟିଏ ଳୋକସଭା ଆସନ ପାଇଁ ଆପ୍ ଶୀଘ୍ର ପ୍ରାର୍ଥୀ ଘୋଷଣା କରିବ । କେଜ୍ରିୱାଲ୍ କହିଛନ୍ତି, ଆମ ହାତମୁଠା ଯେତେ ଶକ୍ତ ହେବ, ଆମେ ଆପଣମାନଙ୍କ ଲାଗି ସେତେ ଅଧିକ କାମ କରି ପାରିବୁ ।

ଏହା ପୂର୍ବରୁ ଦିଲ୍ଲୀରେ ମଧ୍ୟ କେଜ୍ରିୱାଲଙ୍କ ଆପ୍ ଇଣ୍ଡିଆ ମେଣ୍ଟର ଦଳ ସହ ମେଣ୍ଟ ନକରି ଏକାକୀ ଲୋକସଭା ନିର୍ବାଚନ ଲଢ଼ିବେ ବୋଲି କହିଥିଲା । ସେପଟେ ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ମଧ୍ୟ ଏକୁଟିଆ ନିର୍ବାଚନ ଲଢ଼ିବାକୁ ଘୋଷଣା କରିଛନ୍ତି । କଂଗ୍ରେସକୁ ମାତ୍ର ୨ଟି ଆସନ ଛାଡ଼ିବେ ବୋଲି କହିଛନ୍ତି ଦିଦି ।

୨୦୨୪ ଲୋକସଭା ନିର୍ବାଚନକୁ ଆଉ ମାତ୍ର ୨ରୁ ୩ ମାସ ସମୟ ଥିବା ବେଳେ ଇଣ୍ଡିଆ ମେଣ୍ଟରେ ଥିବା ୨୮ ଦଳ ମଧ୍ୟରେ ଆସନ ଭାଗବଣ୍ଟାକୁ ନେଇ ଅଙ୍କ ଛିଣ୍ଡୁନି । ସିଟ୍ ସେୟାରିଂ ଫର୍ମୁଲାକୁ ନେଇ ମେଣ୍ଟରେ ଥିବା ଦଳ ଗୁଡ଼ିକ ତୁ ତୁ ମେଁ ମେଁ ହେଉଥିବା ବେଳେ ଅନ୍ୟ ଦଳକୁ ଫାଇଦା ହେଉଛି ।