ବାଙ୍ଗିରିପୋଷି, ୦୨/୦୨ : ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଅନ୍ତର୍ଗତ ୪୯ ନମ୍ବର ଜାତୀୟ ରାଜପଥରେ ଥିବା ଦ୍ଵାରଶୁଣୀ ଘାଟି ରାସ୍ତାରେ ଦିନକୁ ଦିନ ଦୁର୍ଘଟଣା ବୃଦ୍ଧି ପାଇବାରେ ଲାଗିଛି l ଦ୍ଵାରଶୁଣୀ ଘାଟି ଏବେ ମରଣଯନ୍ତା ପାଲଟିଛି l ତେଣୁ ରାସ୍ତା ସମ୍ପ୍ରସାରଣ ଦାବିରେ କଳିଙ୍ଗ କେଶରୀ ଜେନାଙ୍କ ଆହ୍ବାନ କ୍ରମେ ଶୁକ୍ରବାର ସକାଳ ୭ଟା ଠାରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଜାତୀୟ ରାଜପଥ ୪୯କୁ ବନ୍ଦ କରି ଧାରଣାରେ ବସିଛି ଭଞ୍ଜସେନା । ଫଳରେ ରାସ୍ତାର ଉଭୟ ପାର୍ଶ୍ଵରେ ଶତାଧିକ ଯାନବାହନ ଅଟକି ରହିଛି।

ଏ ବାବଦରେ ଜିଲ୍ଲାର ଅଣରାଜନୈତିକ ଯୁବ ଏବଂ ଛାତ୍ର ସଙ୍ଗଠନ ଭଞ୍ଜସେନା ବହୁବାର ଆନ୍ଦୋଳନ କରିଛି। ହେଲେ ଭଞ୍ଜସେନାର ରାସ୍ତା ସମ୍ପ୍ରସାରଣ ଦାବି କେବଳ ପ୍ରତିଶୃତିରେ ହିଁ ରହିଯାଇଛି l ସ୍ଥାନୀୟ ନେତା ମନ୍ତ୍ରୀଙ୍କ ପ୍ରତିଶୃତି ଉପରେ ଆଉ ବିଶ୍ୱାସ ନକରି ପୁନର୍ବାର ଭଞ୍ଜସେନା ଧାରଣାରେ ବସିଛି। ଘାଟି ରାସ୍ତା ପ୍ରଶସ୍ତିକରଣ ନହେଲା ପର୍ଯ୍ୟନ୍ତ ଅନର୍ଦ୍ଧିଷ୍ଟ ସମୟ ପର୍ଯ୍ୟନ୍ତ ରାସ୍ତା ଅବରୋଧ କରାଯିବ ବୋଲି ଭଞ୍ଜସେନା ଜିଲ୍ଲା ସଭାପତି ପିଣ୍ଟୁ ମାଇତି ପ୍ରକାଶ କରିଛନ୍ତି । ଧାରଣା ସ୍ଥଳରେ ଶାନ୍ତି ଶୃଙ୍ଖଳା ରକ୍ଷା ପାଇଁ ପୁଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।