ଭୁବନେଶ୍ୱର:୨୦/୯: ଗତ ୧୪ ତାରିଖ, ଶନିବାର ରାତିରେ ଘଟିଗଲା ଅନେକ ଘଟଣା। କ୍ୟାପ୍ଟେନ, ତାଙ୍କ ବାନ୍ଧବୀ, ପୁଲିସ ଏବଂ ସେହି ଅଜଣା ୧୦-୧୨ ଅସାମାଜିକ ଯୁବକଙ୍କୁ କେନ୍ଦ୍ରକରି ଘଟିଥିବା ଘଟଣା ଏବେ ଥମିବାର ନାଁ ନେଉନି। କାରଣ ଏହାକୁ ନେଇ ଏବେ ରାଜ୍ୟ ଏବଂ ଦେଶରେ ଆଲୋଡନ। ଥାନାରେ ଜଣେ ମହିଳାଙ୍କୁ ପୁଲିସର ଅକଥନୀୟ ନିର୍ଯାତନା ଅଭିଯୋଗ। ଏହାସହ ଅଭିଯୋଗକାରିଣୀ ମଧ୍ୟ ଗଣଧ୍ୟମକୁ ଦେଇଥିବା ବୟାନ ଆହୁରି ସଂଗୀନ। ଅଦାଲତ, ପ୍ରଶାସନରୁ ରାଜନୀତି ସବୁଠି ଏବେ ଏହି ପ୍ରସଙ୍ଗ। ହାଇକୋର୍ଟଙ୍କ ହସ୍ତକ୍ଷେପ ପରେ ଘଟଣାର ତଦନ୍ତ ତ୍ୱରାନ୍ବିତ। କ୍ରାଇମବ୍ରାଞ୍ଚ ତଦନ୍ତ ଜାରି ରଖିଥିବା ବେଳେ ଆଇଆଇସିଙ୍କ ସମେତ ୪ ଜଣ ପୁଲିସ କର୍ମଚାରୀ ସସ୍ପେଣ୍ଡ।
ଘଟଣାକୁ ନେଇ ରାଜନୈତିକ ଆକ୍ଷେପ ପ୍ରତି ଆକ୍ଷେପ ଜୋର ଧରିଥିବା ବେଳେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏପରି ଘଟଣାକୁ ତୀବ୍ର ସମାଲୋଚନା କରି ସରକାରଙ୍କୁ ଆଙ୍ଗୁଳି ଉଠାଇଛନ୍ତି। ଏହାର ଚଟାପଟ ଉତ୍ତର ରଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ତଦନ୍ତ ଚାଲିଛି, କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି, ଏବଂ ଦୋଷୀଙ୍କୁ ଦଣ୍ଡିତ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ସେପଟେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଡିସିପିଙ୍କୁ ଡକାଇ ମାମଲାର ତଦନ୍ତ ସ୍ଥିତି ସମ୍ପର୍କରେ ପଚାରି ବୁଝିଛନ୍ତି। ଆଉ ଏହି ଘଟଣାରେ ଛାନଭିନ ତ୍ୱରାନ୍ନିତ କରିଥିବା ପୁଲିସ ୭ ଜଣ ରୋଡ ରୋମିଓଙ୍କୁ ଗିରଫ କରିଛି। ସେହିଦିନ ରାତିରେ ରେଷ୍ଟୁରାଣ୍ଟରୁ ଫେରିବା ବାଟରେ କ୍ୟାପ୍ଟେନ୍ ଏବଂ ତାଙ୍କ ବାନ୍ଧବୀଙ୍କ ସହ ଝଗଡ଼ା କରିଥିବା ଦୁର୍ବୃତ୍ତଙ୍କ ମଧ୍ୟରେ ଏହି ରୋମିଓମାନେ ଥିଲେ କି ନା ତା’ର ତଦନ୍ତ ଚାଲିଛି। କାରଣ କ୍ୟାପ୍ଟେନଙ୍କ ଏଫ୍ଆଇଆର ଅନୁଯାୟୀ ୧୪ ତାରିଖ ରାତିରେ ରେଷ୍ଟୁରାଣ୍ଟରୁ ଫେରିବା ବେଳେ ୩ଟି ଗାଡ଼ିରେ ଆସିଥିବା ୧୦-୧୨ ଜଣ ଯୁବକ ସେମାନଙ୍କୁ ବାଟରେ ଅଟକାଇ ଝଗଡା କରିଥିଲେ। ଆଉ ସେମାନଙ୍କ ଧମକରୁ ସୁରକ୍ଷା ଲାଗି ବାନ୍ଧବୀଙ୍କ ସହ କ୍ୟାପ୍ଟେନ୍ ଭରତପୁର ଥାନାକୁ ଆସି ପୁଲିସର ସହାୟତା ଲୋଡ଼ିଥିଲେ।
ଏସବୁ ଭିତରେ ଚନ୍ଦ୍ରଶେଖରପୁରର ସ୍ଥିତ ସେହି ରେଷ୍ଟୁରାଣ୍ଟର କିଛି ସିସିଟିଭି ଫୁଟେଜ୍, ବିଲ, ପେମେଣ୍ଟ ରସିଦ ଆମର ହସ୍ତଗତ ହୋଇଛି। ଯାହାକି ଥାନାକୁ କ୍ୟାପ୍ଟେନ୍ ଏବଂ ତାଙ୍କ ବାନ୍ଧବୀ ଆସିବା ପୂର୍ବର। ଏହା ରେଷ୍ଟୁରାଣ୍ଟରେ କ୍ୟାପ୍ଟେନ୍ ତାଙ୍କ ବାନ୍ଧବୀ ଓ ଅନ୍ୟ କିଛି ବନ୍ଧୁ ତଥା ବାନ୍ଧବୀ ମଉଜ କରୁଥିବାର ଦୃଶ୍ୟ ବଖାଣୁଛି। ରେଷ୍ଟୁରାଣ୍ଟରେ ସେମାନେ ଡାଇନିଂ ଟେବୁଲରେ ବସି କିଛି ପାନୀୟ ନେଉଥିବା, ଏବଂ ବେଳେବେଳେ ନାଚୁଥିବାର ଭିଜୁଆଲ ରହିଛି। ଏପରିକି ରେଷ୍ଟୁରାଣ୍ଟରେ ବିଲ୍ ମଧ୍ୟ ଅଛି। ସେଥିରେ ସେମାନେ ଆଲକହଲ ନେଇଥିବାର ଜଣାପଡ଼ୁଛି। ଏଥିସହ କ୍ୟାପ୍ଟେନଙ୍କ କ୍ରେଡିଟ କାର୍ଡରୁ ପେମେଣ୍ଟ ରିସିପ୍ଟ ମଧ୍ୟ ରହିଛି। ସେଥିରେ କ୍ୟାପ୍ଟେନଙ୍କ ନାମ ରହିଛି। ସମୟ ରାତି ୧.୩୪ ମିନିଟ ୧୦ ସେକେଣ୍ଡ ଉଲ୍ଲେଖ ଅଛି। ଯଦିଓ ରେଷ୍ଟୁରାଣ୍ଟରେ ଯାହାକିଛି ଖାଇବା ପିଇବା କିମ୍ବା ସେବନ କରିବା, ମଉଜ କରିବା, ପଇସା ଖର୍ଚ୍ଚ କରିବ ସେମାନଙ୍କ ବ୍ୟକ୍ତିଗତ ବ୍ୟାପାର, କିନ୍ତୁ ସେହି ଘଟଣା ସହ ପରବର୍ତ୍ତୀ ପ୍ରତିକ୍ରିୟା, ଓ ଘଟଣାର କିଛି ପ୍ରଭାବ ତଥା ସମ୍ପର୍କ ଅଛି କି? ଯଦି କିଛି ଅନିୟନ୍ତ୍ରିତ ପ୍ରଭାବ ଥାଏ ତେବେ ତାହା ଭିନ୍ନ ହୋଇପାରେ।
ରେଷ୍ଟୁରାଣ୍ଟରୁ ଫେରିବା ବେଳେ କ୍ୟାପ୍ଟେନ୍ ଏବଂ ତାଙ୍କ ବାନ୍ଧବୀ ଥାନାକୁ ଆସିଥିବା ବୁଝାପଡ଼ୁଛି। କାରଣ ପୂର୍ବରୁ ସେମାନେ ଥାନାକୁ ଆସିବାର ସମୟ ଉଲ୍ଲେଖ କରିଛନ୍ତି। ଥାନାରେ ସମ୍ପୃକ୍ତ ମହିଳା ଉଚ୍ଚସ୍ୱରରେ ପାଟି କରୁଥିବା, ଫଟୋ ଉଠାଉଥିବା ଲୋକଙ୍କୁ କିଛି କହୁଥିବା, କବାଟ ବାଡ଼ଉଥିବା ଓ ମହିଳା ପୁଲିସଙ୍କ ସହ ଯୁକ୍ତି କରୁଥିବାର ଭିଜୁଆଲ ରହିଛି। ସେ ମୋବାଇଲରେ କିଛି ଫଟୋ ଉଠାଉଥିବା ରେକର୍ଡ କରୁଥିବା ବଡ଼ ପାଟିରେ ଚିତ୍କାର କରୁଥିବାର ମଧ୍ୟ ଭିଜୁଆଲରେ ଦେଖାଯାଇଛି। ସେହି ସବୁ ଭିଜୁଆଲରୁ ମହିଳାଙ୍କ ଆଚରଣ ଅସ୍ୱାଭାବିକ ମନେ ହେଉଛି। କିନ୍ତୁ କିଛି ଆକ୍ରମଣ କିମ୍ବା ମାଡ଼ପିଟର ଭିଜୁଆଲ ଆମର ହସ୍ତଗତ ହୋଇନାହିଁ। ସେ ନେଇ ମଧ୍ୟ ଆମେ ସ୍ପଷ୍ଟ ନୋହୁଁ।
ଏହିସବୁ ଦୃଶ୍ୟରୁ ସେହି ରାତିରେ ତା ପରେ କ’ଣ ଘଟିଛି, କାହିଁକି ଓ କିପରି ଘଟିଛି ତାହା ଅନୁମାନ କରିବା କଷ୍ଟକର। ଏହା ଏଥିପାଇଁ ଯେ, ପରବର୍ତ୍ତି ସମୟର ଅଭିଯୋଗ ଏବଂ, ସମ୍ପୃକ୍ତ ମହିଳାଙ୍କ ଅଭିଯୋଗ ସବୁକୁ ନେଇ ତର୍ଜମା କରିବା କଠିନ। ତେବେ କ୍ରାଇମବ୍ରାଞ୍ଚ ତଦନ୍ତରୁ ଘଟଣା ଉପରୁ ପରଦା ଉଠିବ ଓ ସବୁକିଛି ସତ୍ୟାସତ୍ୟ ସ୍ପଷ୍ଟ ହେବ ବୋଲି ଆଶା କରାଯାଉଛି। କିନ୍ତୁ ଏହିସବୁ ଭିଜୁଆଲ ଯେ ଘଟଣାକୁ ଆହୁରି ଗୋଳମାଳିଆ କରିଦେଉଛି, ତାହାକୁ ଅସ୍ୱୀକାର କରିହେବନି।
