ନୂଆଦିଲ୍ଲୀ: ଭାଷଣ ନୁହେଁ ଶିକ୍ଷା ଦେଲେ ହିଁ ଗରିବୀ ଦୂର ହେବ ବୋଲି କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । କେନ୍ଦ୍ର ସରକାରଙ୍କୁ ଟାର୍ଗେଟ କରି କେଜ୍ରିଓ୍ବାଲ କହିଛନ୍ତି ଯେ, ମୋ ପଛରେ ଯେମିତି ଇଡି ଏବଂ ସିବିଆଇକୁ ଲଗାଇଛନ୍ତି ଏମିତି ଲାଗୁଛି ମୁଁ ହିଁ ଦେଶର ଜଣେ ବଡ଼ ଆତଙ୍କବାଦୀ ।   ଦିଲ୍ଲୀର ପାଲମ ଅଞ୍ଚଳରେ ଏକ ସ୍କୁଲର ଶିଳାନ୍ୟାସ ପାଇଁ ପହଞ୍ଚିଥିବା କେଜ୍ରିଓ୍ବାଲ କହିଛନ୍ତି, ଏଠାରେ ଆଗରୁ ଅଳିଆ ପଡ଼ୁଥିଲା କିନ୍ତୁ ଏବେ ଏଠାରେ ରାଷ୍ଟ୍ରର ଭବିଷ୍ୟତ ନିର୍ମାଣ ହେବ । ଏହା ସହ ପାଲମରେ ସବୁଠୁ ଉନ୍ନତ୍ତ ସ୍କୁଲ ତିଆରି ହେବ ବୋଲି ସେ କହିଛନ୍ତି । 

୭୫ ବର୍ଷ ପୂର୍ବରୁ ଯଦି ଏଭଳି ଉନ୍ନତ୍ତମାନର ସ୍କୁଲ ତିଆରି ହୋଇଥାନ୍ତା ତେବେ ଜଣେ ହେଲେ ବି ଲୋକ ଗରିବ ନଥାନ୍ତେ ।  ପିଲାଙ୍କୁ ପଢ଼ାଇଲେ ଗୋଟିଏ ପିଢ଼ିରେ ଗରିବୀ ଦୂର ହୋଇଯିବ । ଶିକ୍ଷା ଦ୍ବାରା ଗରିବୀ ଦୂର ହେବ ଭାଷଣ ଦେଲେ ନୁହେଁ ବୋଲି କହିଛନ୍ତି କେଜ୍ରିଓ୍ବାଲ । ସାରା ଦେଶରେ ଯଦି ଭଲ ସ୍କୁଲ ତିଆରି କରାଯାଏ ତେବେ ୧୦-୧୫ ବର୍ଷ ଭିତରେ ଦେଶରୁ ଗରିବୀ ଦୂରୀକରଣ ହୋଇପାରିବ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଦୃଢ଼ୋକ୍ତି ବାଢ଼ିଛନ୍ତି । 

ଏହା ବ୍ୟତୀତ ସେ ଆହୁରି କହିଛନ୍ତି ଯେ, ସୁନ୍ଦର ନଗରୀରରେ ବୁଲୁଥିଲି ହେଲେ ଦିଲ୍ଲୀବାସୀ ମୋତେ କେଉଁଠି ବସାଇଛନ୍ତି । ଆଗାମୀ ୭ ଜନ୍ମ ପାଇଁ ଦିଲ୍ଲୀବାସୀଙ୍କ ଭଲପାଇବାର ଅନୁଭୂତିକୁ ଭୁଲିପାରିବି ନାହିଁ । ସେମାନେ କାମ ରୋକିବାକୁ ଚେଷ୍ଟା କଲେ ହାତଯୋଡ଼ି କାମ କରାଇନେବି । ମୋତେ ରୋକିବା ଲାଗି ସେମାନେ ଏତେ ମାମଲା ରୁଜୁ କରିଛନ୍ତି ଯେ, କେତେବେଳେ ଇଡି ତ ଆଉ କେତେବେଳେ ସିବିଆଇର ନୋଟିସ ଆସୁଛି । ମୋତେ କିଛି ବୁଝାପୁଡ଼ିନି । ଏମିତି ଲାଗୁଛି ଦେଶର ସବୁଠାରୁ ବଡ଼ ଆତଙ୍କବାଦୀ ମୁଁ ବୋଲି କେଜ୍ରିଓ୍ବାଲ କହିଛନ୍ତି । 

ସେ ଆହୁରି ମଧ୍ୟ କହିଛନ୍ତି, ଗୀତାରେ ଲେଖାଅଛି ଭଗବାନ ସମସ୍ତଙ୍କୁ କିଛି ନା କିଛି ଉଦ୍ଦେଶ୍ୟ ନେଇ ପୃଥିବୀକୁ ପଠାଇଛନ୍ତି । ହେଲେ ସେମାନଙ୍କୁ (ବିଜେପି ସରକାର) ମିଛ ମାମଲା କରି ଜେଲକୁ ପଠାଇବା ଏବଂ ନୋଟିସ ଦେବା ଲାଗି ପଠାଯାଇଛି । ଆପଣଙ୍କ ଲାଗି ସ୍କୁଲ ତିଆରି କରିବାକୁ ପଠାଯାଇଛି, ମୋତେ ସେମାନଙ୍କ ବିରୋଧରେ କୌଣସି ଅଭିଯୋଗ ନାହିଁ ବୋଲି ଅରବିନ୍ଦ କେଜ୍ରିଓ୍ବାଲ କହିଛନ୍ତି ।