ନୂଆଦିଲ୍ଲୀ, ୨୯/୧୧: ଆମେରିକାରେ ଜନ୍ମ, ଦେଶରେ ୩୦ ବର୍ଷର ଡାକ୍ତରୀ ସେବା । ତଥାପି ନାଟକୀୟ ମୋଡ଼ରେ ଚାଲିଗଲା ଭର୍ଜିନିଆର ୬୧ ବର୍ଷୀୟ ଡାକ୍ତରଙ୍କ ନାଗରିକତା । ଏହା ପଛର କାରଣ ହେଉଛି ଡାକ୍ତର ଜନ୍ମ ସମୟରେ ତାଙ୍କ ଦିବଙ୍ଗତ ପିତା ଥିଲେ ଇରାନିଆନ୍ କୂଟନୀତିଜ୍ଞ । 

ରିପୋର୍ଟ ଅନୁସାରେ, ଡକ୍ଟର ସିଆଭାଶ୍ ସୋଭାନିଙ୍କ ପାଦ ଦଳୁ ସେତେବେଳେ ମାଟି ଖସିଗଲା ଯେତେବେଳେ ତାଙ୍କୁ ଏକ ଚିଠି ଆମେରିକାର ଗୃହ ବିଭାଗରୁ ମିଳିଲା । ଚିଠିରେ ଲେଖାଥିଲା, ଆପଣ ଜନ୍ମ ହେବା ବେଳେ ଆପଣଙ୍କୁ ଭୁଲ୍ ବଶତଃ ଆମେରିକାର ନାଗରିକତା ପ୍ରଦାନ କରାଯାଇଥିଲା । ଉକ୍ତ ଚିଠିରେ ଲେଖା ଯାଇଥିଲା, କୂଟନୀତିଜ୍ଞ ଥିବା ଅଭିଭାବକଙ୍କ ଠାରୁ ଆମେରିକାରେ ଜନ୍ମିତ ଛୁଆଙ୍କୁ ସ୍ୱୟଂ ଆମେରିକୀୟ ନାଗରିକତ୍ୱ ମିଳେ ନାହିଁ । 

ଶାନ୍ତି ଚୁକ୍ତିରେ ସ୍ୱାକ୍ଷର କଲା ମଣିପୁରର UNLF, ୬ ଦଶନ୍ଧି ଧରି ଭ୍ୟାଲିରେ ସାଜିଥିଲା ବିଦ୍ରୋହୀ

ଏହି ଚିଠି ପାଇବା ପରେ ସିଆଭାଶ୍ ସୋଭାନି କହିଛନ୍ତି, ମୁଁ ଜଣେ ଡାକ୍ତର । ମୁଁ ସାରା ଜୀବନ ଏଇଠି କାଟିଛି, ଟିକସ ବି ଦେଇଛି । ମୁଁ ରାଷ୍ଟ୍ରପତିଙ୍କୁ ଭୋଟ୍ ବି ଦେଇଛି । କୋଭିଡ୍ ସମୟରେ ଲୋକଙ୍କ ଚିକିତ୍ସା କରିଛି । ମହାମାରୀ ସମୟରେ ନିଜକୁ ଓ ମୋ ପରିବାରକୁ ବିପଦରେ ପକାଇ ସେବା କରିଛି । ତଥାପି ଆପଣ ୬୧ ବର୍ଷ ପରେ କହୁଛନ୍ତି, ଏଥିରେ ଭୁଲ୍ ଥିଲା । ଆପଣ ଆମେରିକାର ନାଗରିକ ନୁହନ୍ତି । ଏହା ନିହାତି ଆଶ୍ଚର୍ଯ୍ୟଜନକ ।

ଗତ ଫେବ୍ରୁଆରୀରେ ଡକ୍ଟର ସିଆଭାଶ୍ ସୋଭାନି ପାସପୋର୍ଟ ନବୀକରଣ ଲାଗି ଆବେଦନ କରିଥିଲେ । ଏହା ପୂର୍ବରୁ ବି ସେ ଏକାଧିକ ବାର ପାସପୋର୍ଟ ନବୀକରଣ କରିଥିବା ବେଳେ କୌଣସି ସମସ୍ୟାର ସାମ୍ନା କରି ନଥିଲେ । ତେବେ ଚଳିତ ଥର ତାଙ୍କୁ ନୂଆ ପାସପୋର୍ଟ ମିଳି ନଥିଲା । ପାସପୋର୍ଟ ପରିବର୍ତ୍ତେ ଗୃହ ବିଭାଗରୁ ଆସିଥିବା ଚିଠିରେ ସେ ଆମେରିକାର ନାଗରିକତା ହରାଇଥିବା ଉଲ୍ଲେଖ ଥିଲା । ଏଥିସହ ଚିଠିରେ ଏକ ୱେବସାଇଟ୍ ଲିଙ୍କ୍ ଦିଆଯାଇଥିଲା, ଯେଉଁଥିରେ ସ୍ଥାୟୀ ବାସିନ୍ଦା ଲାଗି ଆବେଦନ କରିବାକୁ କୁହାଯାଇଛି । 

ଜୟାପ୍ରଦାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ, ଜାଣନ୍ତୁ କ’ଣ ରହିଛି ମାମଲା ?

ଏବେ ଡକ୍ଟର ସୋଭାନି ସ୍ଥାୟୀ ବାସିନ୍ଦା ଲାଗି ଆବେଦନ କରିଛନ୍ତି । ଏଥିପାଇଁ ତାଙ୍କୁ ୪୦ ହଜାରରୁ ଅଧିକ ଆମେରିକୀୟ ଡଲାର୍ ଖର୍ଚ୍ଚ କରିବାକୁ ପଡ଼ିଛି । ତେବେ ତାଙ୍କ ଏହି ମାମଲା କେବେ ଶେଷ ହେବ ସେନେଇ ସେ ବ୍ୟତିବ୍ୟସ୍ତ ଥିବା କହିଛନ୍ତି ।