ଓ୍ବାଶିଂଟନ ଡିସି: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବଡ଼ ଭଉଣୀ ମାରିଆନେ ଟ୍ରମ୍ପ ବ୍ୟାରିଙ୍କ ୮୬ ବର୍ଷ ବୟସରେ ମୃତ୍ୟୁ ହୋଇଯାଇଛି । ବ୍ୟାରିଙ୍କ ମୃତଦେହ ତାଙ୍କ ଆପାର୍ଟମେଣ୍ଟରୁ ଉଦ୍ଧାର ହୋଇଥିବା ଜଣାପଡ଼ିଛି । ଫିଫ୍ଥ ଆଭେନ୍ୟୁ ଆପାର୍ଟମେଣ୍ଟରୁ ଆଜି ଭୋର ୪ଟାରେ ତାଙ୍କର ମୃତଦେହ ଉଦ୍ଧାର ହୋଇଥିବା ନେଇ ବିଶ୍ବସ୍ତ ସୂତ୍ରରୁ ସୂଚନା ମିଳିଥିବା ନେଇ ଅନ୍ତର୍ଜାତୀୟ ଗଣାମଧ୍ୟମରେ ରିପୋର୍ଟ ପ୍ରକାଶ ପାଇଛି । ହେଲେ ବ୍ୟାରିଙ୍କ ମୃତ୍ୟୁ ଦୁର୍ଘଟଣା ଜନିତ ନୁହେଁ ବୋଲି ଡାକ୍ତର ସ୍ପଷ୍ଟ କରିଛନ୍ତି ।
ମାରିଆନେ ବ୍ୟାରି ଜଣେ ଅବସରପ୍ରାପ୍ତ ଜଜ୍ ଥିଲେ । ୧୯୮୩ରେ ତତ୍କାଳୀନ ରାଷ୍ଟ୍ରପତି ରୋନାଲ୍ଡ ରେଗାନ ତାଙ୍କୁ ନ୍ୟୁଜର୍ସି ଜିଲ୍ଲା କୋର୍ଟର ଜଜ୍ ଭାବେ ନିଯୁକ୍ତ କରାଇଥିଲେ । ପରେ ସେ ଫେଡରାଲ ଜଜ୍ ହୋଇଥିଲେ ଏବଂ ୨୦୧୯ରେ ଅବସର ନେଇଥିଲେ । ୨୦୨୦ରେ ମାରିଆନେ ଟ୍ରମ୍ପ ତାଙ୍କ ଭାଇ ଡୋନାଲ୍ଡ ଟ୍ରମ୍ପଙ୍କୁ ଜଣେ ମିଛୁଆ ଏବଂ ନିୟମ ମାନୁନଥିବା ମଣିଷ ବୋଲି କହିଥିବାର ଏକ ରେକର୍ଡିଂ ଭାଇରାଲ ହୋଇଥିଲା । ଆଉ ଏହି ରେକର୍ଡିଂ କରିଥିଲେ ମାରିଆନେଙ୍କ ଝିଆରୀ । ଏପରିକି ସେ ତତ୍କାଳୀନ ଟ୍ରମ୍ପ ପ୍ରଶାସନର କାର୍ଯ୍ୟଶୈଳୀକୁ ବି ନିନ୍ଦା କରିଥିଲେ ।
ଏହାକୁ ନେଇ ଡେନାଲ୍ଡ ଟ୍ରମ୍ପ ପ୍ରତିକ୍ରିୟା ରଖିଥିଲେ । ସେ କହିଥିଲେ, ଏମିତି ସବୁଦିନ ହୁଏ । ତେବେ ମାରିଆନେ ଟ୍ରମ୍ପ ତାଙ୍କ ଭାଇ ଡୋନାଲ୍ଡ ଟ୍ରମ୍ପଙ୍କୁ ସର୍ବଦା ସମର୍ଥନ କରୁଥିଲେ । ସବୁଦିନ ଡୋନାଲ୍ଡ ଟ୍ରମ୍ପ କିଭଳି ତାଙ୍କୁ ସାକ୍ଷାତ କରିବାକୁ ଯାଉଥିଲେ ସେନେଇ ମାରିଆନେ କହିଥିଲେ । ଏପରିକି ଡୋନାଲ୍ଡଙ୍କୁ ଥରେ ଦେଖିଦେଲେ ତାଙ୍କ ପାଇଁ ଯଥେଷ୍ଟ ବୋଲି ସେ କହୁଥିଲେ । ଏହା ସହ ପିଲା ବେଳେ କିଭଳି ଦୁଇ ଜଣଙ୍କ ମଧ୍ୟରେ ପ୍ରତିଯୋଗୀତା ହୁଏ ସେନେଇ କହିଥିଲେ ମାରିଆନେ ଟ୍ରମ୍ପ ବ୍ୟାରି ।
