ଓ୍ବାସିଂଟନ: ବିଶ୍ବର ସର୍ବଶ୍ରେଷ୍ଠ ଧନୀ କ୍ୟକ୍ତି ଏଲନ ମସ୍କଙ୍କୁ ଆମେରିକାର ଏକ କୋର୍ଟ ଶକ୍ତ ଝଟକା ଦେଇଛନ୍ତି । ନିଜର ଇଭି କାର କମ୍ପାନି ଟେସଲାରୁ ମସ୍କଙ୍କ ମୋଟା ଅଙ୍କର ଦରମା ଉପରେ ଆପତ୍ତି ଉଠାଇଛନ୍ତି କୋର୍ଟ । ଏତେ ଦରମା ନେବା ପାଇଁ ମସ୍କଙ୍କ ପାଖରେ ଅଧୀକାର ନାହିଁ ବୋଲି ମଧ୍ୟ କୋର୍ଟ କହିଛନ୍ତି । ଟେସଲା ବୋର୍ଡ ଏଲନ ମସ୍କଙ୍କୁ ନୂଆ ପ୍ୟାକେଜ ଲାଗି ମଞ୍ଜୁରି ଦେଇଛି । ଟେସଲା କମ୍ପାନିରୁ ଏଲନ ମସ୍କ ପ୍ରାୟ ୫୬ ବିଲିୟନ୍ ଡଲାର ଦରମା ନେଉଛନ୍ତି । ଭାରତୀୟ ମୁଦ୍ରାରେ ମସ୍କଙ୍କ ଦରମା ୪୬ ହଜାର କୋଟି ଟଙ୍କାରୁ ଅଧିକ ହେବ ।
ମସ୍କଙ୍କ ଦରମା ଏତେ ଅଧିକ ଯେ, ଦୁନିଆରେ ହାତ ଗଣତି କେତେଜଣ ବ୍ୟକ୍ତିଙ୍କ ପାଖରେ ଥିବା ମୋଟ ସମ୍ପତ୍ତିର ମୂଲ୍ୟ ୪୬ ହଜାର କୋଟି ହେବ । ଫୋର୍ବସ୍ର ରିୟଲଟାଇମ୍ ବିଲେନିୟର୍ସ ଲିଷ୍ଟ ଅନୁସାରେ, ଏବେ ବିଶ୍ବରେ ଏଭଳି ୨୬ ଜଣ ବ୍ୟକ୍ତି ଅଛନ୍ତି ଯେଉଁମାନଙ୍କ ସଂପତ୍ତି ୪୫ ବିଲିୟନ ଡଲାରରୁ ଅଧିକ । ଭାରତରେ କେବଳ ମୁକେଶ ଅମ୍ବାନୀ ଏବଂ ଗୌତମ ଆଦାନୀଙ୍କ ପାଖରେ ହିଁ ଏତେ ପରିମାଣର ସଂପତ୍ତି ରହିଛି ।
ଡେଲାଓ୍ବେର କୋର୍ଟ ମସ୍କଙ୍କ ଦରମା ବରୋଧରେ ହୋଇଥିବା ଆବେଦନର ଶୁଣାଣି କରି କହିଛନ୍ତି ଯେ, ଏତେ ବଡ଼ ପ୍ୟାକେଜରେ ତ୍ରୁଟି ରହିଛି । ଏପରିକି ବୋର୍ଡର ନିଷ୍ପତ୍ତିକୁ କୋର୍ଟ ଭୁଲ ବୋଲି କହିବା ସହ ଦରମା ନେବା ପଛରେ ମସ୍କଙ୍କ ହାତ ରହିଛି ବୋଲି କହିଛନ୍ତି । ଏହା କମ୍ପାନି ନୀତି ବିରୋଧୀ ବୋଲି କୋର୍ଟ କହିଛନ୍ତି ।
ସେପଟେ ଅଦାଲତଙ୍କ ରାୟ ଆସିବା ପରେ ମସ୍କ ଏକ୍ସରେ ନିଜର ପ୍ରତିକ୍ରିୟା ରଖିଛନ୍ତି । କେବେ ବି ଡେଲାଓ୍ବେରରେ କମ୍ପାନି ପ୍ରତିଷ୍ଠା ନକରିବାକୁ ସେ କହିଛନ୍ତି । ଏଲନ ମସ୍କ ଇଭି କାର କମ୍ପାନିର ଟେସଲାର ପ୍ରତିଷ୍ଠାତା । କମ୍ପାନିର ୧୩ ପ୍ରତିଶତ ଶେୟାର ତାଙ୍କ ପାଖରେ ରହିଛି । ନିକଟରେ କମ୍ପାନିରେ ନିଜର ଶେୟାର ୨୫ ପ୍ରତିଶତକୁ ବୃଦ୍ଧି କରିବା ସହ ପ୍ୟାକେଜ ବଢ଼ାଇବାକୁ ବୋର୍ଡକୁ କହିଛନ୍ତି ମସ୍କ ।
