ଭୁବନେଶ୍ବର,୧୧/୦୨: ବିଶିଷ୍ଟ ସାହିତ୍ୟିକ ସାତକଡ଼ି ହୋତାଙ୍କର ୯୫ ବର୍ଷ ବୟସରେ ପରଲୋକ ହୋଇଛି। ଭୁବନେଶ୍ବରରେ ସେ ଶେଷ ନିଶ୍ବାସ ତ୍ୟାଗ କରିଥିବା ସୂଚନା। ଦିବଂଗତ ସାହିତ୍ୟିକ ସାତକଡ଼ି ହୋତା ସାହିତ୍ୟ ଏକାଡେମୀର ପୂର୍ବତନ ସଭାପତି ଥିଲେ। ସେ କଲମ ରୁପକ ତୁଳୀ ଧରି ମନ୍ଦିର ରୁପକ ସାଧା କାଗଜରେ ଖୋଦିତ କରିଥିଲେ ଗଳ୍ପ, ଉପନ୍ୟାସ, କବିତା, ଅନୁବାଦ ଓ ଆତ୍ମଜୀବନୀ ରୁପକ କାରୁକାର୍ଯ୍ୟ। 

ସାହିତ୍ୟର ବିଭିନ୍ନ ବିଭାଗରେ ଲେଖନୀ ଚାଳନା କରି ନିଜ ମାତୃଭାଷା ସାଧନାର ସଫଳ ସୂତ୍ରକୁ ବାଣ୍ଟିଥିଲା ଆଗାମୀ ଦିନର ଲେଖକ ଓ ଲେଖିକାଙ୍କ ପାଇଁ। ସେ ଭାରତୀୟ ରେଳସେବାରୁ ଅବସର ନେଇଥିଲେ । ଓଡ଼ିଶା ସାହିତ୍ୟ ଏକାଡେମୀର ସଭାପତି ଓ ସମୟ ଖବରକାଗଜର ସମ୍ପାଦକଭାବରେ ମଧ୍ୟ ନିଜର ଦାୟିତ୍ବ ସମ୍ପାଦନ କରିଥିଲେ।   

୧୯୮୫ମସିହାରେ "ଭୁବନେଶ୍ୱର ପୁସ୍ତକ ମେଳା" ଆରମ୍ଭ କରିବାରେ ସେ ଥିଲେ ଅନ୍ୟତମ ଉଦ୍ୟୋକ୍ତା । ସାତକଡ଼ିଙ୍କର ୨୭ଟି ଗଳ୍ପ, ୨୧ଟି ଉପନ୍ୟାସ ଓ ଗୋଟିଏ କବିତା ବହି ପ୍ରକାଶ ପାଇସାରିଛି । କବିତାରୁ ସେ ନିଜ ସାହିତ୍ୟର ପ୍ରଥମ ପାହାଚ ଚଢ଼ିଥିଲେ। ୧୯୬୭ରେ ତାଙ୍କର ପ୍ରଥମ ଉପନ୍ୟାସ "ବ୍ୟାକୁଳ ହୃଦୟ" ଓ ୧୯୭୧ରେ ପ୍ରଥମ ଗପ ପ୍ରକାଶ ପାଇଥିଲା। ଆଜି ଏଭଳି ଜଣେ ସାହିତ୍ୟ ସାଧକଙ୍କୁ ହରାଇ ସ୍ବବ୍ଧ ପାଲଟିଯାଇଛନ୍ତି ସାହିତ୍ୟକୁ ସାଧନାରେ ପରିଣତ କରିଥିବା କବି, ଲେଖକ, ଔପନ୍ୟାସିକ ଓ କଥାକାରମାନେ।

୧୯୮୭ରେ 'ଅଶାନ୍ତ ଅରଣ୍ୟ' ପାଇଁ ତାଙ୍କୁ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପ୍ରଦାନ କରାଯାଇଥିଲା। ୨୦୦୪ରେ 'ମୁକ୍ତିମନ୍ତ୍ର ଓ ଜନନୀ ଜନ୍ମଭୂମୀ' ପାଇଁ ଶାରଳା ପୁରସ୍କାର ଏବଂ ୨୦୧୭ରେ ସାହିତ୍ୟ ଭାରତୀ ସମ୍ମାନରେ ସମ୍ନାନୀତ କରାଯାଇଥିଲା।