ଲକ୍ଷ୍ନୌ, ୨୭/୦୨: ପ୍ରସିଦ୍ଧ ଫିଲ୍ମ ଅଭିନେତ୍ରୀ ଓ ରାମପୁରର ପୂର୍ବତନ ସାଂସଦ ଜୟା ପ୍ରଦାଙ୍କୁ ଫେରାର୍ ଘୋଷଣା କରିଛନ୍ତି କୋର୍ଟ । ୨୦୧୯ ସାଧାରଣ ନିର୍ବାଚନ ସମୟରେ ବିଜେପି ପ୍ରାର୍ଥୀ ଜୟା ପ୍ରଦା ପ୍ରଚାର ସମୟରେ ଆଚରଣ ବିଧି ଉଲ୍ଲଂଘନ କରିଥିବା ନେଇ ରାମପୁରରେ ୨ଟି ମାମଲା ଦାଏର କରା ଯାଇଥିଲା । ଯାହାର ଶୁଣାଣି ରାମପୁର ଏମପି-ଏମଏଲଏ ସ୍ପେସାଲ୍ କୋର୍ଟ (ମାଜିଷ୍ଟ୍ରେଟ୍ ଟ୍ରାଏଲ୍)ରେ ଚାଲିଛି ।
ସୂଚନା ଅନୁସାରେ, କୋର୍ଟରେ ଶୁଣାଣି ଚାଲିଥିବା ବେଳେ ଏକାଧିକ ବାର ସମନ ସତ୍ତ୍ୱେ ଜୟ ପ୍ରଦା କୋର୍ଟରେ ହାଜର ହୋଇ ନାହାନ୍ତି । ଏହା ପରେ ତାଙ୍କ ବିରୋଧରେ ୱାରେଣ୍ଟ ସହ ଜାମିନ୍ ବିହୀନ ପରୱାନା ଜାରି କରାଯାଇଥିଲା । ତଥାପି କୋର୍ଟରେ ହାଜର ହୋଇ ନଥିଲେ ଜୟ ପ୍ରଦା । ଅଭିନେତ୍ରୀଙ୍କ ବିରୋଧରେ କୋର୍ଟ ୭ ଥର ଜାମିନ୍ ବିହୀନ ପରୱାନା ଜାରି କରିଛନ୍ତି । ଏହା ପରେ ରାମପୁର ଏସପି ବାରମ୍ବାର ଜୟ ପ୍ରଦାଙ୍କୁ ହାଜର ହେବାକୁ ନୋଟିସ୍ କରିବା ସତ୍ତ୍ୱେ ସେ ହାଜର ହୋଇ ନାହାନ୍ତି ।
ମଙ୍ଗଳବାର କୋର୍ଟ କଡ଼ା ପଦକ୍ଷେପ ଗ୍ରହଣ କରିଛନ୍ତି । ପୂର୍ବ ସାଂସଦ ତଥା ଅଭିନେତ୍ରୀ ଜୟା ପ୍ରଦାଙ୍କୁ କୋର୍ଟ ଫେରାର୍ ଘୋଷଣା କରିବା ସହ ତାଙ୍କ ବିରୋଧରେ ସିଆରପିସି ୮୨ରେ ପଦକ୍ଷେପ ନେଇଛନ୍ତି । ରାମପୁର ଏସପିଙ୍କୁ ନିର୍ଦ୍ଦେଶ ଦେଇଛନ୍ତି, ଜଣେ ଡେପୁଟି ଏସପିଙ୍କ ନେତୃତ୍ୱରେ ଟିମ୍ ପ୍ରସ୍ତୁତ କରି ୨୦୨୪ ମାର୍ଚ୍ଚ ୬ ସୁଦ୍ଧା ଜୟ ପ୍ରଦାଙ୍କୁ କୋର୍ଟରେ ହାଜର କରାଯାଉ ।
ଜୟ ପ୍ରଦାଙ୍କ ଫୋନ୍ ସ୍ୱିଚ୍ ଅଫ୍
ମାମଲାରେ ବରିଷ୍ଠ ଅଧିକାରୀ ଅମରନାଥ ତିୱାରୀ କହିଛନ୍ତି, ବାରମ୍ବାର ସମନ ସତ୍ତ୍ୱେ ଜୟ ପ୍ରଦା ହାଜର ହେଉ ନାହାନ୍ତି । ପୋଲିସ ରିପୋର୍ଟ ଅନୁସାରେ, ଜୟ ପ୍ରଦାଙ୍କ ଫୋନ୍ ସ୍ୱିଚ୍ ଅଫ୍ ରହିଛି । ଏବେ ୮୨ ସିଆରପିସିରେ ପଦକ୍ଷେପ ନେଇ ମାର୍ଚ୍ଚ ୬ ସୁଦ୍ଧା କୋର୍ଟରେ ହାଜର କରିବାକୁ ନିର୍ଦ୍ଦେଶ ଦିଆ ଯାଇଛି ।
