ଇମ୍ଫାଲ୍, ୨୮/୦୧: ଉତ୍ତରପୂର୍ବ ପାହାଡ଼ୀ ରାଜ୍ୟ ମଣିପୁରରେ ପୁଣି ହିଂସା ଦେଖିବାକୁ ମିଳିଛି । ଶନିବାର ୨ ସଶସ୍ତ୍ର ଗୋଷ୍ଠୀ ମୁହାଁମୁହିଁ ହୋଇଛନ୍ତି । ଉଭୟ ପକ୍ଷ ମଧ୍ୟରେ ହୋଇଥିବା ଗୁଳିମାଡ଼ରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆହତ ହୋଇଛନ୍ତି ୪ ଜଣ । ମଣିପୁରର ରାଜଧାନୀ ଇମ୍ଫାଲର ପୂର୍ବ ସୀମା ଓ କାଙ୍ଗପୋକପି ଜିଲ୍ଲା ମଧ୍ୟରେ ୨ ଗୋଷ୍ଠୀ ମୁହାଁମୁହିଁ ହୋଇଥିବା କହିଛି ପୋଲିସ ।

ସଂଘର୍ଷରେ ଆହତ ହୋଇଥିବା ଲୋକଙ୍କୁ ଚିକିତ୍ସା ଲାଗି ମଣିପୁରର ହସ୍ପିଟାଲରେ ଭର୍ତ୍ତି କରାଯାଇଛି । ୨ ଗୋଷ୍ଠୀ ହାତାହାତି ପରେ ସୁରକ୍ଷାକର୍ମୀ ପହଞ୍ଚିବା ପରେ ଉଭୟ ପକ୍ଷ ଛତ୍ରଭଙ୍ଗ ଦେଇଥିଲେ । ଆହତଙ୍କ ଚିକିତ୍ସା ଚାଲୁଥିବା ବେଳେ ଅବସ୍ଥା ସ୍ଥିର ରହିଛି ।

ସୂଚନାଯୋଗ୍ୟ, ୨୦୨୩ ମେରେ ଭୂମି, ପ୍ରାକୃତିକ ସମ୍ପଦ, ରାଜନୈତିକ ପ୍ରତିନିଧିତ୍ୱକୁ ନେଇ ଅସହମତି ପରେ କୁକି ଓ ମୈତେଇ ସମ୍ପ୍ରଦାୟ ମଧ୍ୟରେ ହିଂସା ଆରମ୍ଭ ହୋଇଥିଲା । ଉକ୍ତ ହିଂସାରୁ ଏ ପର୍ଯ୍ୟନ୍ତ ମୁକୁଳି ପାରିନି ମଣିପୁର । ହିଂସା ପାଇଁ ବିରୋଧୀ ମଣିପୁର ରାଜ୍ୟ ସରକାର ଓ କେନ୍ଦ୍ର ସରକାରଙ୍କୁ ଦାୟୀ କରିଛନ୍ତି । ମଣିପୁରରେ ୬୦ ହଜାର କେନ୍ଦ୍ରୀୟ ସୁରକ୍ଷାକର୍ମୀ ମୁତୟନ ସତ୍ତ୍ୱେ ୮ ମାସ ପରେ ବି ସଂକଟ ଟଳୁନି ।

ଉତ୍ତେଜନା ଭିତରେ ମଣିପୁରର ଇଣ୍ଡିଜିନସ୍ ଟ୍ରାଇବଲ୍ ଲିଡର୍ସ ଫୋରମ୍ ବୟାନ ଜାରି କରି କହିଛି, ଚୁରାଚାନ୍ଦପୁରରେ ଏକ ସାର୍ବଜନିକ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଯେଉଁଥିରେ ଆନ୍ଦୋଳନକୁ ଆଗକୁ ବଢ଼ାଇବା ଲାଗି ଆଲୋଚନା ହୋଇଛି ।