ନୂଆଦିଲ୍ଲୀ ୧୬/୧୧: ଏଭରେଷ୍ଟ ଶୃଙ୍ଗ ସାମ୍ନାରେ ୨୧,୫୦୦ ଫୁଟ ଉଚ୍ଚତାରୁ ହେଲିକପ୍ଟରରୁ ଲମ୍ଫ ଦେଇଥିବା ବିଶ୍ୱର ପ୍ରଥମ ମହିଳା ଟାଇଟଲ୍‌ ହାସଲ କରିଛନ୍ତି ଭାରତର ଜଣାଶୁଣା ସ୍କାଇଡାଇଭର୍‌ ଶୀତଲ ମହାଜନ । ୪୧ ବର୍ଷୀୟା ମହାଜନ ଭାରତର ଚତୁର୍ଥ ସର୍ବୋଚ୍ଚ ନାଗରିକ ସମ୍ମାନ ପଦ୍ମଶ୍ରୀ ସମେତ ଅନେକ ସ୍କାଇଡାଇଭିଂ ରେକର୍ଡର ଅଧିକାରିଣୀ । ଚଳିତ ମାସ ୧୩ ତାରିଖରେ ବିଶ୍ୱର ସର୍ବୋଚ୍ଚ ଶୃଙ୍ଗ ମାଉଣ୍ଟ ଏଭରେଷ୍ଟ ସାମ୍ନାରେ ସେ ସ୍କାଇଡାଇଭିଂ କରିଛନ୍ତି । 

ମହାଜନ ସୋସିଆଲ ମିଡିଆରେ କହିଛନ୍ତି ‘ଏଭରେଷ୍ଟ ସାମ୍ନାରେ ମୋ ଜୀବନର ସର୍ବଶ୍ରେଷ୍ଠ ଲମ୍ଫ ଦେଇଛି ଏବଂ ୧୭,୪୪୪ ଫୁଟ ଉଚ୍ଚରେ ଥିବା କାଲାପଥରରେ ଅବତରଣ କରିଛି ।’ ଜଣେ ମହିଳାଙ୍କ ଦ୍ୱାରା କରାଯାଇଥିବା ଏହା ବିଶ୍ୱର ସର୍ବୋଚ୍ଚ ସ୍କାଇଡାଇଭିଂ । ଗତ ୧୧ ତାରିଖରେ ମହାଜନ ୧୭,୫୦୦ ଫୁଟ ଉଚ୍ଚତାରେ ପ୍ରଥମ ୫ ହଜାର ଫୁଟ ଲମ୍ଫ ଦେଇ ସଫଳତାପୂର୍ବକ ୧୨,୫୦୦ ଫୁଟ ଉଚ୍ଚ ସ୍ୟାଙ୍ଗବୋଚ ବିମାନବନ୍ଦରରେ ଅବତରଣ କରିଥିଲେ । ପ୍ରଶିକ୍ଷକ ଭାବେ ତାଙ୍କ ସହ ଥିଲେ ନ୍ୟୁଜିଲ୍ୟାଣ୍ଡର କିମ୍ବଦନ୍ତୀ ସ୍କାଇଡାଇଭର ୱେଣ୍ଡି ସ୍ମିଥ୍‌ । ୧୨ ତାରିଖରେ ମହାଜନ ସ୍ୟାଙ୍ଗବୋଚ ବିମାନବନ୍ଦରରେ ଜାତୀୟ ପତାକା ସହିତ ୮ ହଜାର ଫୁଟ ଉଚ୍ଚରୁ ଲମ୍ଫ ଦେଇଥିଲେ ।