ଝାରସୁଗୁଡ଼ା,୧୧/୦୯: ଝାରସୁଗୁଡ଼ାରେ ରେଳ ଭିତ୍ତିଭୂମିର ବିକାଶ ଘଟିବ । ବିଶ୍ୱସ୍ତରୀୟ ଷ୍ଟେସନରେ ଏହି ପୁରାତନ ଷ୍ଟେସନ ରୂପାନ୍ତର ହେବ । ଦୁଇ ନୂଆ ଫୁଟ୍ ଓଭରବ୍ରିଜ୍ ନିର୍ମାଣ ସହ ପ୍ଲାଟଫର୍ମ ସଂପ୍ରସାରଣ ପୂର୍ବକ ଏହାର ସଂଖ୍ୟା ୧୨କୁ ବୃଦ୍ଧି ପାଇବ । ଅତ୍ୟାଧୁନିକ ରେଳ ଷ୍ଟେସନର ସୌନ୍ଦର୍ଯ୍ୟତା ଭିତରେ ରେଳ ସେବା କ୍ଷେତ୍ରରେ ବିରାଟ ପରିବର୍ତ୍ତନ ଲକ୍ଷ୍ୟ ରଖି ରେଳ ବିଭାଗ ଯେଭଳି ଆଗେଇବାରେ ଲାଗିଛି ସେଥିରେ ଆଗାମୀ ଦୁଇ ବର୍ଷରେ ଝାରସୁଗୁଡ଼ାର ଚେହେରା ବଦଳିବ । ପ୍ରାୟ ତିନି ଶହ କୋଟି ଟଙ୍କା ବ୍ୟୟରେ ଆରମ୍ଭ ହୋଇଥିବା ନୂତନ ଷ୍ଟେସନ୍ ବିଲଡିଂ ଏବଂ ଅନ୍ୟ ଭିତ୍ତିଭୂମି ବିକାଶ ଆଗକୁ ରେଳ ମାନଚିତ୍ରରେ ଝାରସୁଗୁଡ଼ା ଗୁରୁତ୍ୱପୂର୍ଣ୍ଣ ସ୍ଥାନ ଅଧିକାର କରିବା ସମ୍ଭାବନାକୁ ଉଜ୍ଜୀବିତ କରିଛି ।
ଗତି ଶକ୍ତି ଯୋଜନାନୁଯାୟୀ ରେଳ ବିଭାଗ ପକ୍ଷରୁ ଝାରସୁଗୁଡ଼ା ରେଳ ଷ୍ଟେସନର ବିକାଶ କାର୍ଯ୍ୟ ହାତକୁ ନିଆଯାଇଛି । ଯେଉଁଥିରେ ଦୁଇଟି ନୂତନ ଫୁଟ ଓଭରବ୍ରିଜ ନିର୍ମାଣ ସହ ଷ୍ଟେସନ ବିଲଡିଂର କାୟାକଳ୍ପରେ ବିରାଟ ପରିବର୍ତ୍ତନ ଅଣାଯାଉଛି । ଏଥିସହ ନୂତନ ପ୍ଲାଟଫର୍ମ ସେଡ୍ ନିର୍ମାଣ କରାଯିବ । ଏବେ ଥିବା ଷ୍ଟେସନର ହେରିଟେଜ ବିଲଡିଂକୁ କୌଣସି କ୍ଷତି ନ ପହଞ୍ଚାଇ ସେଭଳି ସୁରକ୍ଷିତ ଏବଂ ସଂରକ୍ଷିତ ଅବସ୍ଥାରେ ରଖାଯିବା ଯୋଜନା କରାଯାଇଛି । ରେଳ ଷ୍ଟେସନର ବର୍ତ୍ତମାନର ମୁଖ୍ୟ ଦ୍ୱାର ତଥା ପ୍ରବେଶ ପଥ ସମ୍ମୁଖରେ ଦୁଇଟି ରେଳ ଲାଇନ ବିଛା ଯିବ । ଠିକ ସେହିପରି ଷ୍ଟେସନର ଅପର ପାଶ୍ୱର୍ରେ ଅର୍ଥାତ ରେଳବାଇ କଲୋନି ପଟେ ମଧ୍ୟ ଦୁଇଟି ରେଳ ଲାଇନ ତିଆରି ହେବ । ଏବେ ପ୍ଲାଟଫର୍ମରେ ୮ଟି ଲାଇନଟି ଥିବା ବେଳେ ଏହା ୧୨ ଲାଇନ ବିଶିଷ୍ଟ ହେବ । ଠିକ ଅନୁରୂପ ଭାବେ ପ୍ଲାଟଫର୍ମ ସଂଖ୍ୟା ମଧ୍ୟ ବୃଦ୍ଧି ପାଇବ । ଏବେ ୫ଟି ପ୍ଲାଟଫର୍ମ ଥିବା ବେଳେ ଏହା ୧୨ଟିରେ ରୂପାନ୍ତର ହେବ । ଯେଉଁ ନୂତନ ଫୁଟ ଓଭରବ୍ରିଜ ନିର୍ମାଣ କରାଯାଉଛି ସେଥିରେ ଉପରେ ଯାତ୍ରୀମାନେ ଟ୍ରେନକୁ ଅପେକ୍ଷା କରିବା ଲାଗି ବସିବା ବନ୍ଦୋବସ୍ତ ରହିବ ।
ଏବେ ଥିବା ରେଳ ଷ୍ଟେସନ ବିଲଡିଂ ତଥା ହେରିଟେଜ୍ ବିଲଡିଂର ପୂର୍ବ ପାଶ୍ୱର୍ରେ ପୁରୁଣା ବସଷ୍ଟାଣ୍ଡ ତଥା ଶୁକ୍ରବଜାର ପଟେ ପ୍ରାୟ ୮ ଶହ ମିଟର ପର୍ଯ୍ୟନ୍ତ ଷ୍ଟେସନର ପ୍ଲାଟଫର୍ମ ସଂପ୍ରସାରଣ ହେବ । ରେଳ ଷ୍ଟେସନର ଶୁକ୍ରବଜାର ପଟ ପ୍ରବେଶ ପଥ ସମ୍ମୁଖରେ ପାର୍କିଂ ଜୋନ ଏବଂ ଅନ୍ୟାନ୍ୟ ବ୍ୟବସ୍ଥା ରହିବ । ଅପରପାଶ୍ୱର୍ରେ ରେଲୱେ କଲୋନି ପଟେ ଏଡିଇଏନ୍ଙ୍କ ଅଫିସ ପାଶ୍ୱର୍ରେ ଷ୍ଟେସନର ମୁଖ୍ୟ ପ୍ରବେଶ ପଥ ରହିବ । ଜାତୀୟ ରାଜପଥ-୪୯ର ସହରର ବମ୍ବେ ଛକ ଠାରୁ ପ୍ରଶସ୍ତ ରାସ୍ତା ଷ୍ଟେସନର ମୁଖ୍ୟ ପ୍ରବେଶ ପଥକୁ ସଂଯୋଗ କରିବ । ଷ୍ଟେସନ୍କୁ ଉଭୟ ପାଶ୍ୱର୍ରୁ ଯାତ୍ରୀ ପ୍ରବେଶ ଏବଂ ପ୍ରସ୍ଥାନ ପାଇଁ ବ୍ୟବସ୍ଥା ହେବ ବୋଲି ଜଣାପଡ଼ିଛି ।
ଏବେ ଷ୍ଟେସନର ରୂପାନ୍ତରିକରଣ କାର୍ଯ୍ୟ ଆରମ୍ଭ ହୋଇସାରିଛି । ଆଗକୁ ପ୍ରାୟ ଦୁଇ ବର୍ଷ ମଧ୍ୟରେ ରେଳ ଭିତ୍ତିଭୂମିର ବିକାଶ ସହ ଝାରସୁଗୁଡ଼ାର ଚେହେରା ବଦଳିଯିବ ବୋଲି ଯୋଜନା ପ୍ରସ୍ତୁତ ହୋଇଛି । ଏବେ ରେଳବାଇ ଜମିରେ ଥିବା ଶୁକ୍ରବଜାରକୁ ସ୍ଥାନାନ୍ତର କରିବା ଲାଗି ପ୍ରକ୍ରିୟା ଆରମ୍ଭ ହୋଇ ସାରିଛି । ଏଥିସହ ପୁରୁଣା ବସଷ୍ଟାଣ୍ଡ ଠାରେ ରେଳ ଲାଇନ ପାଶ୍ୱର୍ରେ ଥିବା ଦୋକାନ ଗୁଡ଼ିକୁ ଭାଙ୍ଗିବା ଲାଗି ନୋଟିସ ଜାରି ହୋଇ ସାରିଛି । ଆର୍ପିଏଫ୍ ବ୍ୟାରାକ୍ ପାଖ ବସ୍ତି ଉଚ୍ଛେଦ କରାଯିବାକୁ ପଦକ୍ଷେପ ନିଆଯାଉଛି । ଯେଉଁଠି ପ୍ରାୟ ୨୦ ପରିବାର ରହୁଛନ୍ତି ।
ସେହିପରି ପୁରୁଣା ବସଷ୍ଟାଣ୍ଡ ପାଖରେ ଥିବା ରେଳ ଓଭରବ୍ରିଜର ବିକଳ୍ପ ଭାବେ ଆଉ ଏକ ଓଭରବ୍ରିଜ ନିର୍ମାଣ ଲାଗି ପ୍ରକ୍ରିୟା ଆରମ୍ଭ ହୋଇ ସାରିଛି । ଏହି ପୁରାତନ ଓଭର ବ୍ରିଜ ଜରାଜୀର୍ଣ୍ଣ ହୋଇ ସାରିଥିବାରୁ ଭବିଷ୍ୟତର ଟ୍ରାଫିକ ଭିଡ଼ ଏବଂ ଏବେ ହେଉଥିବା ରେଳ ଲାଇନ ସଂପ୍ରସାରଣକୁ ଦୃଷ୍ଟିରେ ରଖି ଏହି ନୂତନ ଓଭରବ୍ରିଜର ନିର୍ମାଣ ପାଇଁ ରେଳ ବିଭାଗ ପଦକ୍ଷେପ ନେଉଥିବା ଜଣାପଡ଼ିଛି । ରେଳ ଭିତ୍ତିଭୂମିକୁ ନେଇ ଯେଭଳି ବିରାଟ ପରିବର୍ତ୍ତନ ଏବଂ ନିର୍ମାଣର ସୂଚନା ରହିଛି ତାହା ଝାରସୁଗୁଡ଼ାର ଚିତ୍ର ବଦଳାଇ ଦେବ ନିଶ୍ଚିତ ।
