ବେଲବାହାଳି, ୧୩/୧୧ : ବେଆଇନ ଭାବେ ଗୋ' ଚାଲାଣ ବେଳେ କଣ୍ଟେନରରୁ ୬୦ରୁ ଉର୍ଦ୍ଧ୍ଵ ଗୋରୁ ଜବତ। ଆନନ୍ଦପୁର ଉପଖଣ୍ଡ ୨୦ନଂ ଜାତୀୟ ରଜପଥର ହସନପୁର ଟୋଲ୍ ଗେଟ୍ ନିକଟରେ ସୋମବାର ସକାଳୁ ଏକ ଗୋରୁ ବୋଝେଇ କଣ୍ଟେନର ଗାଡିକୁ କାଞ୍ଜିପାଣି ପୋଲିସ ସ୍ଥାନୀୟ ଲୋକଙ୍କ ସହାୟତାରେ ଅଟକ ରଖିଛି। କଣ୍ଟେନରରେ ୬୦ରୁ ଉର୍ଦ୍ଧ୍ଵ ଗୋରୁ ଅମାନୁଷିକ ଭାବେ ଦୁଇଥାକ ହୋଇ ରହିଥିବାବେଳେ ଚାଲାଣ ସମୟରେ ୩ଟି ଗୋରୁଙ୍କ ମୃତ୍ୟୁ ଘଟିଛି । ସେହିପରି ଅନେକ ଗୋରୁ ଅସୁସ୍ଥ ହୋଇପଡିଥିବାରୁ ସେମାନଙ୍କୁ ଘସିପୁରା ପଶୁ ଚିକିତ୍ସକଙ୍କ ସହାୟତାରେ ଚିକିତ୍ସା ଆରମ୍ଭ ହୋଇଛି। 

ସୂଚନାନୁଯାୟୀ, ସୋମବାର ସକାଳୁ କାଞ୍ଜିପାଣି ପୋଲିସ ବେଆଇନ ଗୋଚାଲାଣ ହେଉଥିବା ଖବର ପାଇ ଘାଟୀ ରାସ୍ତାରେ ଜଗି ରହିଥିଲେ। ୩ଟି ଗୋରୁ ଗାଡିକୁ ଅଟକାଇବାକୁ ଉଦ୍ୟମ କରିଥିଲେ। ସେମାନଙ୍କ ମଧ୍ୟରୁ ୨ଟି ଅଟକି ଥିବାବେଳେ ଗୋଟିଏ ଟ୍ରକ୍ ଖସିଯାଇ ଆନନ୍ଦପୁର ଅଭିମୁଖେ ପଳାଇ ଆସିଥିଲା। ସ୍ଥାନୀୟ ଲୋକମାନଙ୍କ ସହାୟତାରେ ରାମଚନ୍ଦ୍ରପୁର ଥାନା ହସନପୁର ଟୋଲ ପ୍ଲାଜା ନିକଟରେ ମଧ୍ୟରାତିରେ ପୋଲିସ କାବୁ କରିବାରେ ସଫଳ ହୋଇଛି । ସକାଳୁ ଖବର ପାଇ ସାଇଁକୁଳ ଫାଣ୍ଡି ଅଧିକାରୀ ସୁରେଶ କୁମାର ମାଝି ଘଟଣାସ୍ଥଳରେ ପହଞ୍ଚି ଉତ୍ତେଜିତ ଲୋକଙ୍କୁ ବୁଝାସୁଝା କରି କାଞ୍ଜିପାଣି ପୋଲିସ ସହ ମିଶି ତଦନ୍ତରେ ସହଯୋଗ କରିଛନ୍ତି । ଏହିଭଳି ବାରମ୍ବାର ଅନେକ ସମୟରେ ଗୋରୁମାନଙ୍କୁ ଅମାନୁଷିକ ଭାବେ ଗୋମାଫିଆମାନେ ଚୋରିକରି ବାହାର ଦେଶକୁ ଚାଲାଣ କରୁଥିବା ଅଭିଯୋଗ ହେଉଥିଲେ ମଧ୍ୟ ଏଥିପ୍ରତି କାହାରି ଦୃଷ୍ଟି ପଡୁନଥିବା ଅଭିଯୋଗ ହୋଇଛି। ଘଟଣା ସ୍ଥଳରେ ବଜରଙ୍ଗ ଦଳ ସଦସ୍ୟମାନେ ଉପସ୍ଥିତ ରହି ଏଥିପ୍ରତି ପ୍ରଶାସନ ତୁରନ୍ତ ପଦକ୍ଷେପ ନେବା ପାଇଁ ଆହ୍ୱାନ ଦେଇଛନ୍ତି।