ସମ୍ବଲପୁର,୧୦/୧୨: ଆଇଟି ରେଡ୍‌ ପରେ ମଦ ଅଫିସରୁ  ଜବତ ଲାଲ୍‌ ଡାଏରିକୁ ନେଇ ସାରା ସମ୍ବଲପୁରରେ କୋକୁଆଭୟ  ଦେଖିବାକୁ ମିଳିଲାଣି । ଏହି ଡାଏରିରେ ମାସିକିଆ ତଥା ବିଭିନ୍ନ  କାର୍ଯ୍ୟକ୍ରମ ବାହାନାରେ ଚାନ୍ଦା ନେଉଥିବା ବ୍ୟକ୍ତିବିଶେଷଙ୍କ ନାମ ଥିବାରୁ ଏହାକୁ ନେଇ ଚର୍ଚ୍ଚା ସରଗରମ ରହିଛି । ତେବେ, ବିଶେଷ  କରି ଏଥିରେ ନାମ ଥିବା ବ୍ୟକ୍ତିଙ୍କ ମଧ୍ୟରେ ଅଧିକାଂଶ ଖାକି  ବାବୁଙ୍କ ନାମ ଥିବା ନେଇ ଜଣେ ଅବସରପ୍ରାପ୍ତ ପୁଲିସ ଅଧିକାରୀ  ପ୍ରକାଶ କରିଛନ୍ତି । 

ତାଙ୍କ କହିବା ଅନୁସାରେ ସମ୍ବଲପୁରରେ ପୂର୍ବରୁ ଏମିତି କେହି ପୁଲିସ କର୍ମଚାରୀ ତଥା ଅଧିକାରୀ ନଥିଲେ ଯିଏ  ବଡବଜାର ଅଫିସରୁ ପକେଟ ଗରମ କରିନଥିବେ । ଏପରିକି  ଥାନାର ବାହାରିଆ ଖର୍ଚ୍ଚ ବି କୁଆଡେ ଏହି ମଦ ଅଫିସ ତୁଳାଉଥିଲା  ବୋଲି ଚର୍ଚ୍ଚା ହେଉଛି । ଏଭଳି ସ୍ଥିତିରେ ବର୍ତ୍ତମାନ ଜିଲ୍ଲାରେ  ଥିବା ତଥା ବଦଳି ହୋଇ ଅନ୍ୟ ଜିଲ୍ଲାରେ ଥିବା ଖାକି ବାବୁଙ୍କୁ  ବର୍ତ୍ତମାନ ଚାକିରି ଭୟ ଘାରିଥିବା ବେଳେ ଅନ୍ୟ ସାମ୍ବାଦିକ ଏବଂ  ରାଜନେତାଙ୍କୁ ଇଜ୍ଜତ ଭୟ ଘାରିଥିବା ଆଲୋଚନା ହେଉଛି । ଏହାର  କାରଣ ହେଲା ଯେ, ଏହି ଅଫିସ ପରିଚାଳନା ଦାୟିତ୍ୱରେ ଥିବା  ବିହାରୀ ବାବୁ ଉକ୍ତ ଲାଲ ଖାତାରେ ଚାନ୍ଦା ନେଉଥିବା ଲୋକଙ୍କ ନାମ  ସହ ଟିକିନିଖି ହିସାବ ରଖୁଥିବା କଥା ସମସ୍ତଙ୍କୁ ଜଣା।