ରାଞ୍ଚି,୨୭/୦୨: ଯୁବ ଖେଳାଳିମାନେ ସିରିଜ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିବା ସିନିୟର ଖେଳାଳିଙ୍କ ପାଇଁ ସତର୍କ ଘଣ୍ଟି ହୋଇଛି। ଏଣିକି ଟେଷ୍ଟ କ୍ରିକେଟ୍‌ ଖେଳିବାକୁ ପ୍ରୟାସରତ ଯୁବ ଖେଳାଳିଙ୍କୁ ଟେଷ୍ଟ ଦଳ ଚୟନ ବେଳେ ପ୍ରାଥମିକତା ଦିଆଯିବ ବୋଲି ରୋହିତ  ଶର୍ମା ସ୍ପଷ୍ଟ କରିଦେଇଛନ୍ତି । ଇଶାନ କିଷନ ଓ  ଶ୍ରେୟାସ ଆୟର ଘରୋଇ କ୍ରିକେଟ୍‌କୁ ଅଣଦେଖା କରିବା ନେଇ ଚାଲିଥିବା ବିବାଦକୁ ନେଇ ରୋହିତ ଏଭଳି ବୟନ ଦେଇଥିବା ଆଶଙ୍କା କରାଯାଉଛି ।  

Rohit Sharma Press conference

Only those hungry to play Test cricket will be given opportunity: Rohit Sharma pic.twitter.com/8paR2rYZ0p

— Krishan Kumar 🇮🇳 (@krishanofficial) February 27, 2024

ଚଳିତ ଇଂଲଣ୍ଡ ବିପକ୍ଷ ଟେଷ୍ଟ ସିରିଜରେ  ବିରାଟ କୋହଲି, କେଏଲ ରାହୁଲ, ମହମ୍ମଦ  ସାମିଙ୍କ ଭଳି ଅଭିଜ୍ଞ ଖେଳାଳି ନାହାନ୍ତି । ରବିନ୍ଦ୍ର ଜାଡେଜା, ମହମ୍ମଦ ସିରାଜ ଓ ଯଶପ୍ରୀତ ବୁମରା  ମଧ୍ୟ ସାମୟିକ ବିରତି ନେଇଛନ୍ତି । ଏତେ  ସଂଖ୍ୟକ ତାରକା ଖେଳାଳିଙ୍କ ଅନୁପସ୍ଥିତି ସତ୍ତେ୍ୱ  ଭାରତ ଶକ୍ତିଶାଳୀ ଇଂଲଣ୍ଡକୁ ହରାଇବାରେ  ସଫଳ ହୋଇଛି । ଯୁବ ତାରକାମାନେ ସୁଯୋଗର  ସଦୁପଯୋଗ କରିବା ଫଳରେ ଭାରତ ଗୋଟିଏ  ଟେଷ୍ଟ ବାକି ଥାଇ ୩-୧ରେ ସିରିଜ ଜିତି ସାରିଛି ।  ଦ୍ୱିତୀୟ ଓ ତୃତୀୟ ଟେଷ୍ଟରେ ଯଶସ୍ୱୀ  ଜୈସ୍ୱାଲ, ତୃତୀୟ ଟେଷ୍ଟରେ ସର୍ଫରାଜ ଖାନ ଓ  ଚତୁର୍ଥ ଟେଷ୍ଟରେ ଧ୍ରୁବ ଜୁରେଲ ଓ ଶୁଭମନ  ଗିଲ ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ  କରିଛନ୍ତି । ଅନଭିଜ୍ଞ ଖେଳାଳିଙ୍କ ପ୍ରଦର୍ଶନ ବଳରେ  ସିରିଜ ବିଜୟ ବେଶ୍‌ ପ୍ରଶଂସନୀୟ ରହିଛି ।  

ଇଂଲଣ୍ଡ ଖେଳାଳିମାନେ ମଧ୍ୟ ଭାରତୀୟ ଯୁବ  ତାରକାଙ୍କୁ ପ୍ରଶଂସା କରିବାକୁ ପଛାଇ ନାହାନ୍ତି ।  ରୋହିତ କହିଛନ୍ତି, ଯେଉଁ ଖେଳାଳିମାନେ ଟେଷ୍ଟ  କ୍ରିକେଟ୍‌ ଖେଳିବାକୁ ସର୍ବଦା ଚେଷ୍ଟିତ ରହିବେ,  କିମ୍ବା ଟେଷ୍ଟ କ୍ରିକେଟ୍‌ରେ ସଫଳ ହେବା ପାଇଁ ସ୍ୱପ୍ନ  ଦେଖୁଥିବେ ସେମାନଙ୍କୁ ଟେଷ୍ଟ ଦଳ ଚୟନ ବେଳେ  ପ୍ରାଥମିକତା ମିଳିବ । ଟେଷ୍ଟ କ୍ରିକେଟ୍‌ ସବୁଠୁ କଷ୍ଟକର  ଫର୍ମାଟ୍‌ । ଏହି ଫର୍ମାଟ୍‌ ଖେଳାଳିଙ୍କ ଦକ୍ଷତାକୁ ଶାଣିତ  କରିଥାଏ । ଟେଷ୍ଟ କ୍ରିକେଟ୍‌ ଖେଳିବା ପାଇଁ ଭୋକିଲା  ଥିବା ଖେଳାଳି ସର୍ବଦା ଶ୍ରେଷ୍ଠ ପ୍ରଦର୍ଶନ କରିବାକୁ  ଚେଷ୍ଟା କରିଥାଏ । ତେଣୁ ଏଭଳି ଖେଳାଳିଙ୍କୁ ପ୍ରଥମେ  ସୁଯୋଗ ମିଳିବା ଆବଶ୍ୟକ । ଟେଷ୍ଟ କ୍ରିକେଟ  ଖେଳିବା ପାଇଁ ଆଗ୍ରହୀ ନଥିବା ଖେଳାଳିମାନଙ୍କୁ  ଟେଷ୍ଟ ଖେଳିବାକୁ ବାଧ୍ୟ କରିବାର ଯଥାର୍ଥତା ନାହିଁ ।