ଇସଲାମାବାଦ, ୧୧/୦୨: ପାକିସ୍ତାନ ସାଧାରଣ ନିର୍ବାଚନ ଭୋଟ୍ ଗଣତି ସରିଛି । ଜେଲରେ ଥିବା ଇମ୍ରାନ୍ ଖାନଙ୍କ ପିଟିଆଇ ସମର୍ଥିତ ୧୦୧ ପ୍ରାର୍ଥୀ ବିଜୟୀ ହୋଇଛନ୍ତି । ଭୋଟ୍ ବେଳେ ବୁଥ୍ ରିଗିଂ ଅଭିଯୋଗରେ କେତକ ଆସନରେ ଫେବ୍ରୁଆରୀ ୧୫ରେ ହେବ ସାନି ମତଦାନ । ଏନେଇ ପାକିସ୍ତାନ ନିର୍ବାଚନ ଆୟୋଗ ନିର୍ଦ୍ଦେଶନାମା ଜାରି କରିଛନ୍ତି ।
ଫଳାଫଳ ଆସିବା ପରେ ସରକାର ଗଢ଼ିବା ପାଇଁ ପ୍ରୟାସ ଜୋର୍ ଧରିଛି । ପାକିସ୍ତାନ ସେନା ପ୍ରମୁଖ ଜେନରାଲ୍ ଅସୀମ ମୁନୀର ସମସ୍ତ ରାଜନୈତିକ ଦଳକୁ ଚେତାବନୀ ଦେଇ କହିଛନ୍ତି, ତୁରନ୍ତ ସରକାର କରନ୍ତୁ । ସେନାର ଏଭଳି ଆଭିମୁଖ୍ୟ ପରେ ୧୮ରୁ ୨୦ ନିର୍ଦ୍ଦଳୀୟ ସାଂସଦ ପାକିସ୍ତାନ ମୁସଲିମ୍ ଲିଗ୍-ନୱାଜ (PML-N) ସହ ସମ୍ପର୍କରେ ଅଛନ୍ତି ।
ଏହି ନିର୍ଦ୍ଦଳୀୟ ସାଂସଦ ପିଏମ୍ଏଲ୍-ଏନ୍ ଓ ପିପିପି ମେଣ୍ଟରେ ମିଶିବାକୁ ଆଗ୍ରହ ପ୍ରକାଶ କରିଛନ୍ତି । କୁହାଯାଉଛି, ବିଜୟୀ ପ୍ରାର୍ଥୀଙ୍କୁ ଧମକପୂର୍ଣ୍ଣ ଫୋନ୍ ସହ ମେସେଜ୍ ପଠା ଯାଉଛି । ଯେଉଁମାନଙ୍କ ଉପରେ ଚାପ ପଡ଼ୁଛି ସେମାନେ ମେଣ୍ଟକୁ ସରକାର ଗଠନ ଲାଗି ସମର୍ଥନ ଦେଇ ପାରନ୍ତି । କୁହାଯାଉଛି, ପାକିସ୍ତାନ ସେନା ଚାହୁଁଛି ପ୍ରଧାନମନ୍ତ୍ରୀ ହୁଅନ୍ତୁ ନୱାଜ ଶରିଫ୍ ।
ଦ ନ୍ୟୁଜ୍ ରିପୋର୍ଟ ଅନୁସାରେ, ଦକ୍ଷିଣ ପଞ୍ଜାବ, ବଲୁଚିସ୍ତାନ ଓ ରାୱଲପିଣ୍ଡିରୁ ବିଜୟୀ ସାଂସଦ ମେଣ୍ଟ ସରକାରକୁ ସମର୍ଥନ ଦେବାକୁ ନିଷ୍ପତ୍ତି ନେଇଛନ୍ତି । ଏଥିସହ ପିଏମ୍ଏଲ୍-ଏନ୍ ଓ ପିପିପି ଲଗାତାର ନିର୍ଦ୍ଦଳୀୟ ବିଜୟୀ ସାଂସଦଙ୍କ ସମ୍ପର୍କରେ ରହିଥିବା କୁହା ଯାଉଛି ।
ପାକିସ୍ତାନ ଗଣମାଧ୍ୟମ ଅନୁଯାୟୀ, ପିଏମ୍ଏଲ୍-ଏନ୍ ଓ ପିପିପିର ମେଣ୍ଟ ସରକାରରେ ନିର୍ଦ୍ଦଳୀୟ ସାଂସଦଙ୍କ ସଂଖ୍ୟା ଆହୁରି ବଢ଼ିପାରେ । ଅନ୍ୟପଟେ ଇମ୍ରାନ ଖାନଙ୍କ ପିଟିଆଇ କହିଛି, ପ୍ରଚାରରେ କୌଣସି ବାସ୍ତବତା ନାହିଁ । ପିଟିଆଇ ସମର୍ଥିତ ସମସ୍ତ ବିଜୟୀ ସାଂସଦ କୌଣସି ବି ଦଳକୁ ସମର୍ଥନ ଦେବେ ନାହିଁ ।