ବ୍ରହ୍ମପୁର,୧୭/୦୯: ବ୍ରହ୍ମପୁର ଆଇଟିଆଇ କର୍ତ୍ତୃପକ୍ଷ ଓ ଏହାର ଛାତ୍ରଛାତ୍ରୀ ନଷ୍ଟକୁ ଶ୍ରେଷ୍ଠରେ ରୂପାନ୍ତରିତ କରି ଚର୍ଚ୍ଚାରେ ରହିଛନ୍ତି । ଭିନ୍ନ ଭିନ୍ନ କଳାକୃତି କରି ରେକର୍ଡ କରିବାର ଲାଗିଛନ୍ତି । ଏଥର ବିଶ୍ୱକର୍ମା ପୂଜା ଅବସରରେ ଭଗବାନ ବିଷ୍ଣୁଙ୍କ ଦଶାବତାର ଆକୃତି ଉନ୍ମୋଚନ ହେବ । ଅଟୋମୋବାଇଲ୍ ସ୍କ୍ରାପ୍ରେ ମତ୍ସ୍ୟ, କଚ୍ଛପ, ବରାହ, ବାମନ, ନୃସିଂହ, ରାମ, ବଳରାମ, ପର୍ଶୁରାମ ଆଦି ଭଗବାନ ବିଷ୍ଣୁଙ୍କ ଦଶ ଅବତାର ତିଆରି କରାଯାଇଛି ।
୧୫ ଦିନ ହେବ ଫିଟର୍, ଇଲେକ୍ଟ୍ରିସିଆନ୍, ୱେଲ୍ଡର୍, ପେଣ୍ଟର୍, ମେକାନିକ୍ସ ଟ୍ରେଡ୍ ଛାତ୍ରଛାତ୍ରୀ ଓ ଶିକ୍ଷକଙ୍କ ଉଦ୍ୟମରେ ସ୍କ୍ରାପ୍ ଦଶାବତାର ତିଆରି ହୋଇଛି । ପ୍ରତିକୃତିଗୁଡ଼ିକ ୬ ଫୁଟ୍ ଉଚ୍ଚତା ଓ ୧୦୦ରୁ ୧୨୦ କେଜି ଓଜନ ରହିଛି । ବର୍ତ୍ତମାନ ସେଗୁଡ଼ିକରେ ଶେଷ ସ୍ପର୍ଶ ଦିଆଯାଉଛି । ବିଶ୍ୱକର୍ମା ପୂଜା ମଣ୍ଡପରେ ଦଶାବତାର ପ୍ରତିକୃତି ଶୋଭାପାଇବ ବୋଲି ଆଇଟିଆଇ କର୍ତ୍ତୃପକ୍ଷ କହିଛନ୍ତି । ବିଶ୍ୱକର୍ମା ପୂଜା ପରେ ଏଗୁଡ଼ିକୁ ଆଇଟିଆଇ ପରିସରସ୍ଥ ଓପନ୍ ସ୍କ୍ରାପ୍ ମ୍ୟୁଜିୟମ୍ରେ ପ୍ରଦର୍ଶିତ କରାଯିବ ।
ବ୍ରହ୍ମପୁର ଆଇଟିଆଇ ଛାତ୍ରଛାତ୍ରୀ ଅଟୋମୋବାଇଲ୍ ଓ ଅନ୍ୟାନ୍ୟ ସ୍କ୍ରାପ୍ ବ୍ୟବହାର କରି କିଛି ନା କିଛି ନୂଆ କରିବାକୁ ପ୍ରୟାସ କରୁଛନ୍ତି ଏବଂ ସଫଳ ମଧ୍ୟ ହେଉଛନ୍ତି । ଏଥର ଦଶାବତାର ନିର୍ମାଣ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଛନ୍ତି ବୋଲି ଆଇଟିଆଇ ଅଧ୍ୟକ୍ଷ ଡ. ରଜତ କୁମାର ପାଣିଗ୍ରାହୀ କହିଛନ୍ତି ।
