ବେଙ୍ଗାଲୁରୁ,୨୯/୦୨: ଚଳିତ ମହିଳା ପ୍ରିମିୟର ଲିଗ୍(ଡବ୍ଲ୍ୟୁପିଏଲ୍) ରେ ଡିଫେଣ୍ଡିଂ ଚାମ୍ପିଅନ୍ ମୁମ୍ବାଇ ଇଣ୍ଡିଆନ୍ସ ପ୍ରଥମ ପରାଜୟର ସାମ୍ନା କରିଛି । ପ୍ରଥମ ୨ଟି ମ୍ୟାଚ୍ ଜିତି ସାରିଥିବା ମୁମ୍ବାଇ ଇଣ୍ଡିଆନ୍ସ ବୁଧବାର ଅନୁଷ୍ଠିତ ଏକ ମ୍ୟାଚ୍ରେ ୟୁପି ୱାରିୟର୍ସ ଠାରୁ ୭ ୱିକେଟ୍ରେ ପରାଜିତ ହୋଇଛି । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ମୁମ୍ବାଇ ଇଣ୍ଡିଆନ୍ସ ୬ ୱିକେଟ୍ ବିନିମୟରେ ୧୬୧ ରନ୍ କରିଥିଲା । ଜବାବରେ ୟୁପି ୱାରିୟର୍ସ ୧୬.୩ ଓଭରରେ ୩ ୱିକେଟ୍ ହରାଇ ଆବଶ୍ୟକ ରନ୍ ସଂଗ୍ରହ କରି ନେଇଥିଲା ।
ଟସ୍ ଜିତି ୟୁପି ୱାରିୟର୍ସ ଫିଲ୍ଡିଂ ନିଷ୍ପତ୍ତି ନେଇଥିଲା । ମୁମ୍ବାଇ ଇଣ୍ଡିଆନ୍ସର ଦୁଇ ଓପନର ହେଲି ମାଥ୍ୟୁସ୍ ଓ ୟସ୍ତିକା ଭାଟିଆ ଆକ୍ରମଣାତ୍ମକ ବ୍ୟାଟିଂ କରି ୫୦ ରନ୍ ସଂଗ୍ରହ କରିଥିଲେ । ବ୍ୟକ୍ତିଗତ ୨୬(୩ଚୌକା, ୧ଛକା) ରନ୍ କରି ୟସ୍ତିକା ପ୍ରଥମେ ଆଉଟ୍ ହୋଇଥିଲେ । ଏହାପରେ ଦଳ ନିୟମିତ ବ୍ୟାବଧାନରେ ୱିକେଟ୍ ହରାଇଥିଲେ ହେଁ ମାଥ୍ୟୁସ ଅର୍ଦ୍ଧଶତକ ଅର୍ଜନ କରିଥିଲେ । ହର୍ମନପ୍ରୀତ କୌରଙ୍କ ଅନୁପସ୍ଥିତିରେ ନେତୃତ୍ୱ ନେଉଥିବା ନାତାଲି ସ୍କିଭର-ବ୍ରଣ୍ଟ ୧୯ ରନ୍ କରି ଆଉଟ୍ ହୋଇଥିଲେ । ପରେ ପରେ ମାଥ୍ୟୁସ୍ ୫୫(୯ଚୌକା, ୧ଛକା)ଙ୍କ ୱିକେଟ୍ର ପତନ ଘଟିଥିଲା । ମଧ୍ୟ ଭାଗରେ ଆମେଲିଆ କେର ୨୩, ପୂଜା ବସ୍ତ୍ରାକର ୧୮, ଇସି ୱଙ୍ଗ ଅପରାଜିତ ୧୫ ରନ୍ କରିବା ଫଳରେ ଦଳୀୟ ସ୍କୋର ୧୬୧ରେ ପହଞ୍ଚିଥିଲା ।
ଜବାବରେ ୟୁପି ୱାରିୟର୍ସର ଦୁଇ ଓପନର ଆଲିସା ହିଲି ଓ କିରଣ ନବଗିରେ ବିସ୍ଫୋରକ ବ୍ୟାଟିଂ କରି ୯୪ ରନ୍ ସଂଗ୍ରହ କରିଥିଲେ । କିରଣ ୩୧ଟି ବଲ୍ରୁ ୬ଚୌକା ଓ ୪ଛକା ବଳରେ ୫୭ ରନ୍ କରି ପ୍ରଥମେ ଆଉଟ୍ ହୋଇଥିଲେ । ପରେ ପରେ ତଲିଆ ମ୍ୟାକ୍ଗ୍ରା(୧) ଓ ହିଲି ୩୩ ରନ୍ କରି ପାଭିଲିୟନ ଫେରିଥିଲେ । ଗ୍ରେସ ହ୍ୟାରିସ୍ ଓ ଦୀପ୍ତି ଶର୍ମା ଅପରାଜିତ ରହି ଦଳକୁ ବିଜୟୀ କରାଇଥିଲେ । ହ୍ୟାରିସ୍ ୩୮(୬ଚୌକା, ୧ଛକା) ଓ ଦୀପ୍ତି ୨୭(୪ଚୌକା) ରନ୍ କରିଥିଲେ ।
