ଗଞ୍ଜାମ, ୨୯।୪: ଗୋଳନ୍ଥରା ଥାନା ଅଧିନ ରଣ୍ଢା ଛକ ନିକଟରେ ଦୁର୍ଘଟଣା । ଦୁର୍ଘଟଣାରେ ମୃତ୍ୟୁବରଣ କରିଥିବା ମହିଳା ଜଣକ ୬୫ ବର୍ଷୀୟ ଚିକରଡ଼ା ଗ୍ରାମର ମାଳତୀ ବେହେରା ବୋଲି ଜଣାପଡ଼ିଛି । ମାଳତୀ ପ୍ରତିଦିନ ଭୋରୁ ରଣ୍ଢା ପରିବା ବଜାରରୁ ପରିବା ନେଇ ବ୍ରହ୍ମପୁରରେ ବିକ୍ରି କରିବା ଲାଗି ଯାଆନ୍ତି । ସୋମବାର ପରିବା ଆଣିବା ଲାଗି ରାସ୍ତା ପାର୍ ହେଉଥିବା ସମୟରେ ଇଚ୍ଛାପୁରରୁ ବ୍ରହ୍ମପୁର ପଟେ ଯାଉଥିବା ଗୋଟେ ମାଛ ବୋଝେଇ ପିକ୍ଆପ ଭ୍ୟାନ୍ ଧକ୍କା ଦେଇଥିଲା । 

ଫଳରେ ମାଳତୀ ଛିଟିକି ପଡ଼ି ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ଘଟଣାକୁ ନେଇ ଚିକରଡ଼ା ଗ୍ରାମବାସୀ କିଛି ସମୟ ପାଇଁ ରାସ୍ତାରୋକ କରିଥିଲେ । ଘଟଣାସ୍ଥଳରେ ଗୋଳନ୍ଥରା ଥାନା ଅଧିକାରୀ ବିବେକାନନ୍ଦ ସ୍ୱାଇଁ ପହଞ୍ଚି ଲୋକମାନଙ୍କୁ ବୁଝାସୁଝା କରିବା ପରେ ଗ୍ରାମବାସୀମାନେ ରାସ୍ତାରୁ ହଟିଥିଲେ । ଏଥିସହ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ମେଡିକାଲକୁ ପଠାଇ ଦୁର୍ଘଟଣା ଘଟାଇଥିବା ପିକ୍ଆପ ଭ୍ୟାନକୁ ଜବତ କରିଛି ଗୋଳନ୍ଥରା ପୋଲିସ ।