ମାହାଙ୍ଗା, ୧୪/୦୫ : କଟକ ଜିଲ୍ଲା ମାହାଙ୍ଗା ବିଧାନସଭା ଆସନ ପାଇଁ ବିଜେଡିରୁ ପ୍ରାର୍ଥୀପତ୍ର ଦାଖଲ କଲେ ଅଙ୍କିତ ପ୍ରତାପ ଜେନା। ବାପା ପ୍ରତାପ ଜେନା ଓ ଅଳ୍ପ କିଛି ସମର୍ଥକଙ୍କ ସହ ଆସି ଅତିରିକ୍ତ ଜିଲ୍ଲାପାଳଙ୍କ ନିକଟରେ ପ୍ରାର୍ଥୀପତ୍ର ଦାଖଲ କରିଛନ୍ତି ଅଙ୍କିତ। ଗତକାଲି ଅଙ୍କିତ ବିଶାଳ ଶୋଭାଯାତ୍ରାରେ ନାମାଙ୍କନପତ୍ର ଦାଖଲ ପାଇଁ ଜିଲ୍ଲାପାଳଙ୍କ ଅଫିସରେ ପହଞ୍ଚିଥିଲେ। କିନ୍ତୁ ହଠାତ୍ ପ୍ରାର୍ଥୀପତ୍ର ଦାଖଲ ନକରି ଫେରିଯାଇଥିଲେ। ଆଜି ନାମାଙ୍କନପତ୍ର ଦାଖଲ ପରେ ଅଙ୍କିତ କହିଛନ୍ତି ଯେ, ଗତକାଲି ଶୁଭ ମୁହୂର୍ତ୍ତ ଗଡିଯିବାରୁ ସେ ନାମାଙ୍କନପତ୍ର ଦାଖଲ କରିନଥିଲେ।

ସୂଚନାନୁଯାୟୀ, ଗତ ଏପ୍ରିଲ ୩ ତାରିଖରେ ମାହାଙ୍ଗା ବିଜେଡି ପ୍ରାର୍ଥୀ ଭାବେ ଅଙ୍କିତ୍‌ଙ୍କ ନାଁ ଘୋଷଣା ହେବା ପରଠାରୁ ପ୍ରତାପ ଜେନାଙ୍କ ନେତୃତ୍ୱରେ ମାହାଙ୍ଗା ବିଜେଡି ପକ୍ଷରୁ ପ୍ରଚାର ଜୋରଦାର ଚାଲିଛି। ଅନେକ ସାଧାରଣ ସଭାରେ ପ୍ରତାପ ପୁଅ ଅଙ୍କିତ୍‌ଙ୍କ ହାତ ଧରି ତାଙ୍କୁ ଆଗକୁ ନେଉଥିବା ଦେଖିବାକୁ ମିଳିଛି। ମାହାଙ୍ଗା ନିର୍ବାଚନ ମଣ୍ଡଳୀର ପ୍ରାୟ ସବୁ ପଞ୍ଚାୟତରେ ଅଙ୍କିତ୍‌ ପହଞ୍ଚି ସାରିଛନ୍ତି ।