ଫିରିଙ୍ଗିଆ, ୨୦।୩  କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଶଲାଗୁଡା ପଞ୍ଚାୟତ ଅଧୀନରେ ଥିବା ଗିଡାପଦର ଠାରେ ହୋଇଥିବା ବହୁଚର୍ଚ୍ଚିତ ୱର୍ଡମେମ୍ବର ଦମ୍ପତି ହତ୍ୟାକାଣ୍ଡ ଘଟଣାରେ ବୁଧବାର ଗୋଛାପଡା ପୋଲିସ ହାତରେ ଆଉ ଜଣେ ଧରାପଡିଛି। ଅଭିଯୁକ୍ତ ଜଣକ ଜଣେ ନାବାଳକ ହୋଇଥିବାରୁ ତାଙ୍କୁ ସ୍ୱଧାର ଗୃହକୁ ପଠାଇ ଦିଆଯାଇଛି I ତେବେ ପୋଲିସ ଆଗରୁ ଏହିଘାଟଣାରେ ମୁଖ୍ୟ ଅଭିଯୁକ୍ତ ସୁନୀଲ ଦିଗାଲ ନାମକ ଜଣେ ଯୁବକ ସହ ଦଶ ଜଣ ଅଭିଯୁକ୍ତ ଙ୍କୁ ଗିରଫ କରି କୋର୍ଟ ଚାଲାଣ କରିସାରିଛି I 

ସୂଚନା ଥାଉକି ଗତ ଆଠ ତାରିଖ ଦିନ ଫିରିଙ୍ଗିଆ ବ୍ଲକ ଲୋଇସିଂ ପଂଚାୟତ ଗୁମାନଦଣୀ ଗାଁ ର ଡାହୀରା କହଁର ଓ ତାଙ୍କ ସ୍ତ୍ରୀ ସଲାଗୁଡା ପଂଚାୟତ ଗିଡାପଦର ଠାରେ ଥିବା ନିଜ ଚାଷ ଜମିରେ ଶୋଇଥିବା ବେଳେ ମୁଖ୍ୟ ଅଭିଯୁକ୍ତ ସହ ନାବାଳକ ଜଣକ ଘରୁ ଡାକି ଆଣି ଅତି ନିର୍ମମ ଭାବରେ ହତ୍ୟା କରିଥିଲେ I ଘଟଣା କୁ ନେଇ ଗୋଛାପଡା ଥାନାରେ ଏକ ହତ୍ୟା ମାମଲା ରୁଜୁକରି ତଦନ୍ତ ଜାରି ରଖିବା ସହ ଏକ ଟିମ ଗଠନ କରାଯାଇଥିଲା I ଗୋଛାପଡା ଥାନା ଅଧିକାରୀ ପ୍ରଭାତ କୁମାର ବେହେରା ଏହି ଟିମ ର ନେତୃତ୍ୱ ନେଇଥିଲେ I ତେବେ ଘଟଣା ର ଦଶ ଦିନ ଭିତରେ ବିଭିନ୍ନ ସୂତ୍ରରୁ ଗୋଛାପଡା ପୋଲିସ ଏହି ହତ୍ୟା ଘଟଣା ର ପର୍ଦାଫାଶ କରିପାରିଥିଲା I ପୋଲିସ ହତ୍ୟାକାଣ୍ଡରେ ବ୍ୟବହୃତ ହାତୁଡିକୁ ଜବତ କରିବା ସହ ୧୦ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିବା ବେଳେ ଗୁଣିଗାରେଡିକୁ ନେଇ ଏହି ହତ୍ୟାକାଣ୍ଡ ହୋଇଥିବା ସ୍ପଷ୍ଟ ହୋଇଥିଲା ।  ଗ୍ରାମବାସୀ ଏକ ବୈଠକ କରି ମୁଖ୍ୟ ଅଭିଯୁକ୍ତକୁ ଚାନ୍ଦା କରି ଏହି ଦମ୍ପତିଙ୍କୁ ମାରିବା ପାଇଁ ସୁପାରୀ ଦେଇଥିବା ନେଇ କନ୍ଧମାଳ ଏସପି ଶୁଭେନ୍ଦୁ ପାତ୍ର ଏକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଥିଲେ I ଘଟଣା ଅଧିକ ତଦନ୍ତ ରହିଥିବା ସୂଚନା ଦେଇଛନ୍ତି ଗୋଛାପଡା ଥାନା ଅଧିକାରୀ ପ୍ରଭାତ କୁମାର ବେହେରା I

ଆହୁରି ପଢନ୍ତୁ : କୁଳଡିହା ଅଭୟାରଣ୍ୟରେ ବନ୍ଧୁକ କାରଖାନା ଠାବ : ୪ ବନ୍ଧୁକ ଜବତ , ଜଣେ ଗିରଫ