ନୂଆଦିଲ୍ଲୀ: ମୁମ୍ବାଇ ଏବଂ ନାଭି ମୁମ୍ବାଇକୁ ଯୋଡୁଥିବା ଦେଶର ଦୀର୍ଘତମ ସାମୁଦ୍ରିକ ସେତୁ ଅଟଳ ସେତୁ ଉଦଘାଟନ ହେବାର ସାତ ମାସରୁ ଅଧିକ ସମୟ ହୋଇଯାଇଛି । ଏହାକୁ ନେଇ ପ୍ରଥମଥର ପାଇଁ ମୁମ୍ବାଇ ମହାନଗର ନିଗମ ବିକାଶ ପ୍ରାଧିକରଣ (MMRDA) ପକ୍ଷରୁ ଏକ ରିପୋର୍ଟ ପ୍ରକାଶ କରାଯାଇଛି । ଏହି ରିପୋର୍ଟରେ କୁହାଯାଇଛି ଯେ, ଏହି ସମୟ ମଧ୍ୟରେ ୫୦ ଲକ୍ଷରୁ ଅଧିକ ଯାନ ଏହି ସେତୁ ଦେଇ ଯାତାୟାତ କରିଛନ୍ତି । ୨୨୭ ଦିନର ଅବଧି ମଧ୍ୟରେ, ପ୍ରତିଦନ ହାରାହାରି ପ୍ରାୟ ୨୨ ହଜାର ଯାନ ଏହାକୁ ବ୍ୟବହାର କରିଛନ୍ତି ।

ଏମଏମଆରଡିଏ (MMRDA) ଦ୍ବାରା ଜାରି ଏହି ବିବୃତ୍ତିରେ କୁହାଯାଇଛି ଯେ, ଜାନୁଆରୀ ୧୩ ରୁ ଅଗଷ୍ଟ ୨୬ ପର୍ଯ୍ୟନ୍ତ ଅଟଳ ସେତୁ ଦେଇ ମୋଟ ୫୦ ଲକ୍ଷ ୪୩୫୦ ଗାଡି ଯାତ୍ରା କରିଛନ୍ତି । ଏହି ଯାନ ଗୁଡିକ ମଧ୍ୟରେ ବେଷ୍ଟ,ନାଭି ମୁମ୍ବାଇ ମ୍ୟୁନିସିପାଲିଟି ଟ୍ରାନ୍ସପୋର୍ଟ (NMMT) ଏବଂ ମହାରାଷ୍ଟ୍ର ରାଜ୍ୟ ସଡକ ପରିବହନ ନିଗମ (MSRTC) ମଧ୍ୟ ଅନ୍ତର୍ଭୁକ୍ତ ।

ମୁମ୍ବାଇ ଟ୍ରାନ୍ସ ହାରବର୍ ଲିଙ୍କ୍ (MTHL) କୁ ଆନୁଷ୍ଠାନିକ ଭାବରେ ଅଟଳ ବିହାରୀ ବାଜପେୟୀ ସେୱ୍ରି-ନାଭା ସେବା ଅଟଳ ସେତୁ ନାମରେ ନାମିତ କରାଯାଇଛି । ଏହାକୁ ଜାନୁଆରୀ ୧୨ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦଘାଟନ କରିଥିଲେ । ଏହା ପରେ, ପରଦିନ ଏହା ସାଧାରଣ ଜନତାଙ୍କ ପାଇଁ ଖୋଲା ଯାଇଥିଲା । MMRDA କହିଛି ଯେ ଏହି ସେତୁ ଖୋଲିବା ସହିତ ଦକ୍ଷିଣ ମୁମ୍ବାଇ ଏବଂ ପାନଭେଲ, ପୁଣେ ଏବଂ ନାଭି ମୁମ୍ବାଇ ଯିବା ପାଇଁ ଯାତ୍ରା ସମୟ ଯଥେଷ୍ଟ ହ୍ରାସ ପାଇଛି । ଏହାର ଆରମ୍ଭ ହେବା ଦ୍ବାରା ଆଗାମୀ ନାଭି ମୁମ୍ବାଇ ଅନ୍ତର୍ଜାତୀୟ ବିମାନବନ୍ଦର ସହିତ ସଂଯୋଗ ମଧ୍ୟ ଉନ୍ନତ ହୋଇଛି ।