ନୂଆଦିଲ୍ଲୀ, ୩୦।୧୧: ଅନେକ ଲୋକ କାଜୁ, କିସ୍‌ମିସ୍ ଖାଇବାକୁ ଭଲପାନ୍ତି । ଏସବୁର ଅନେକ ସ୍ୱାସ୍ଥ୍ୟ ଉପକାରିତା ଗୁଣ ମଧ୍ୟ ରହିଛି । ତେବେ ପ୍ରତ୍ୟେକ ଜିନିଷ ଆବଶ୍ୟକତାଠୁ ଅଧିକ ବ୍ୟବହାର କ୍ଷତିକାରକ । ସେହିପରି କାଜୁ ସ୍ୱାଦିଷ୍ଟ ହୋଇଥିଲେ ମଧ୍ୟ ଏହାକୁ ଆବଶ୍ୟକତାଠାରୁ ଅଧିକ ଖାଇଲେ ଏହା ଶରୀର ଉପରେ କୁପ୍ରଭାବ ପକାଇଥାଏ । ଫଳରେ ଓଜନ ବଢ଼ିବା ସହ ଅନ୍ୟାନ୍ୟ ସ୍ୱାସ୍ଥ୍ୟ ସମସ୍ୟା ମଧ୍ୟ ଦେଖାଦିଏ । କିଛି ଲୋକ କାଜୁ ଖାଇବାକୁ ଏତେ ପସନ୍ଦ କରନ୍ତି ଯେ, ବାହାରକୁ ଯିବା ସମୟରେ ମଧ୍ୟ ନିଜ ସହିତ କାଜୁ ରଖିଥାନ୍ତି । ତେବେ ଅଧିକ କାଜୁ ଖାଇଲେ କେଉଁ ସବୁ ସ୍ୱାସ୍ଥ୍ୟ ସମସ୍ୟା ଦେଖାଦିଏ ଆସନ୍ତୁ ଜାଣିବା । 

କାଜୁରେ ଫ୍ୟାଟ୍ ଓ କ୍ୟାଲୋରୀ ପରିମାଣ ଅଧିକ ଥାଏ । ତେଣୁ ଏହାକୁ ମାତ୍ରାଧିକ ଖାଇଲେ ଓଜନ ବୃଦ୍ଧି ପାଏ । ତେଣୁ ପ୍ରତିଦିନ ୫-୧୦ଟି କାଜୁ ଖାଇବା ଶରୀର ପ୍ରତି ହିତକର । ସେହିପରି ଅଧିକ କାଜୁ ଖାଇଲେ ମୁଣ୍ଡବିନ୍ଧା ହୋଇଥାଏ । ଏକ ଅଧ୍ୟୟନ ଅନୁସାରେ, କାଜୁରେ ସୋଡ଼ିୟମ୍ ପରିମାଣ ଅଧିକ ଥାଏ । ତେଣୁ ଏହାକୁ ଆବଶ୍ୟକତାଠାରୁ ଅଧିକ ଖାଇଲେ ଏହା ମାଇଗ୍ରେନ୍‌ର ବି କାରଣ ହୋଇଥାଏ । ଅଧିକ କାଜୁ ଖାଇଲେ ଗ୍ୟାସ୍ ଓ ପାଚନ ସମ୍ୱନ୍ଧୀୟ ସମସ୍ୟା ସୃଷ୍ଟି ହୋଇଥାଏ । ମାତ୍ରାଧିକ କାଜୁ ଖାଇଲେ କିଡନୀ ଉପରେ ମଧ୍ୟ ପ୍ରଭାବ ପଡ଼ିଥାଏ । ଫଳରେ କିଡନୀ ସମ୍ୱନ୍ଧୀୟ ସମସ୍ୟା ବୃଦ୍ଧି ପାଏ । ତେଣୁ ସୀମିତ ପରିମାଣରେ କାଜୁ ଖାଇବା ଆବଶ୍ୟକ ।