ବ୍ରହ୍ମପୁର/ସାନଖେମୁଣ୍ଡି,୧୫/୦୯: ଦେଶର ସର୍ବଶ୍ରେଷ୍ଠ ଥାନାକୁ ପୁରସ୍କୃତ କରାଯିବ । ଏଥିପାଇଁ ପ୍ରତି ରାଜ୍ୟରୁ ୨ରୁ ୩ଟି ଥାନାକୁ କେନ୍ଦ୍ର ଗୃହ ମନ୍ତ୍ରାଳୟ ଚୟନ କରିଛି । ଓଡ଼ିଶାରୁ ବଛା ହୋଇଛି ଗଞ୍ଜାମର ଧରାକୋଟ ଓ ପାଟପୁର ଥାନା । ଅପରାଧ ଓ ଆଇନଶୃଙ୍ଖଳାକୁ ନେଇ ରାଜ୍ୟରେ ସବୁବେଳେ ଚର୍ଚ୍ଚାରେ ରହି ଆସୁଥିବା ଗଞ୍ଜାମ ଜିଲ୍ଲାରୁ କିଛି ବର୍ଷ ହେଲା ଦେଶର ସର୍ବଶ୍ରେଷ୍ଠ ଥାନା ପୁରସ୍କାର ମିଳୁଛି ।
୨୦୨୨ ମସିହାରେ ଗଞ୍ଜାମ ଜିଲ୍ଲାର ଆସିକା ଥାନା ସର୍ବଶ୍ରେଷ୍ଠ ପୁରସ୍କାର ପାଇଥିଲା । ଏହାପୂର୍ବରୁ ଗାଙ୍ଗପୁର ଥାନାକୁ ଦେଶର ୩ୟ ସର୍ବଶ୍ରେଷ୍ଠ ଥାନା ପୁରସ୍କାର ମିଳିଥିଲା । ଗୁରୁତ୍ୱପୂର୍ଣ୍ଣ ବିଷୟ ହେଲା, ଚଳିତବର୍ଷ ରାଜ୍ୟର ୨ଟି ଥାନା ଗଞ୍ଜାମ ଜିଲ୍ଲାରୁ ଚୟନ ହୋଇଛି । ଏଥିରୁ କୌଣସି ଗୋଟିଏ ଥାନା ପୁରସ୍କାର ପାଇବାର ଆଶା କରାଯାଉଛି ।
କ୍ରାଇମ୍ ଆଣ୍ଡ୍ କ୍ରିମିନାଲ୍ ଟ୍ରାକିଂ ନେଟ୍ୱର୍କ ଆଣ୍ଡ୍ ସିଷ୍ଟମ (ସିସିଟିଏନ୍ଏସ୍)ରେ କାର୍ଯ୍ୟଦକ୍ଷତା ଅନୁସାରେ କେନ୍ଦ୍ର ଗୃହ ମନ୍ତ୍ରାଳୟ ପୁରସ୍କୃତ କରିବା ପାଇଁ ଥାନା ଚୟନ କରିଥାଏ । ସମ୍ଭାବ୍ୟ ପୁରସ୍କାର ତାଲିକାରେ ଥିବା ଏହି ଦୁଇ ଥାନାର ସବୁ କାର୍ଯ୍ୟକୁ ଏବେ ଅନୁଧ୍ୟାନ କରିବ କେନ୍ଦ୍ର ଗୃହ ବିଭାଗ ଟିମ୍ । କେନ୍ଦ୍ରୀୟ ଟିମ୍ର ପରିଦର୍ଶନ ପୂର୍ବରୁ ଗଞ୍ଜାମ ଏସ୍ପି ଜଗମୋହନ ମୀନାଙ୍କ ନିର୍ଦ୍ଦେଶ ପ୍ରକାରେ ପ୍ରସ୍ତୁତି ଆରମ୍ଭ ହୋଇଛି ।
ଏସ୍ପି ମୀନା ଓ ଅନ୍ୟ ବରିଷ୍ଠ ଅଧିକାରୀ ଥାନା ପରିର୍ଶନ କରି ସବୁ କାର୍ଯ୍ୟ ତଦାରଖ କରୁଛନ୍ତି । ଥାନା ପରିସରକୁ ପରିଷ୍କାର ରଖିବା ସହ ସୌନ୍ଦର୍ଯ୍ୟକରଣ କରାଯାଉଛି । ଦୀର୍ଘବର୍ଷ ଧରି ପଡ଼ି ରହିଥିବା ଜବତ ଗାଡ଼ିକୁ ଠିକ୍ ଭାବେ ରଖାଯାଉଛି । ପାଟପୁର ଥାନା ପରିସରରେ ଥିବା ପୁରୁଣା କୋଠା ଭଙ୍ଗାଯାଇଛି । ଚାରିପାଶ୍ୱର୍ ସଫେଇ କରାଯିବା ସହ ରଙ୍ଗ ଦେବାକୁ ଯୋଜନା ରହିଛି । ଥାନା କ୍ୟାମ୍ପସ୍କୁ ସୌନ୍ଦର୍ଯ୍ୟକରଣ କରିବା ପାଇଁ ଆଲୋକସଜ୍ଜା ସାଙ୍ଗକୁ ଫୁଲ ଚାରାରୋପଣ କରାଯାଉଛି । ମୁକ୍ତାକାଶ ଜିମ୍ ସହ ଅନ୍ୟ ଉପକରଣ ଲଗାଯାଉଛି ।
ପାଟପୁର ଥାନା ଆଇଆଇସି ଅଜୟ କୁମାର ସ୍ୱାଇଁ, ପୂର୍ବତନ ଆଇଆଇସି ତଥା ବର୍ତ୍ତମାନ ଆର୍.ଉଦୟଗିରି ଥାନା ଆଇଆଇସି ସବ୍ୟସାଚୀ ମଲ୍ଲ, ଧରାକୋଟ ଥାନା ଆଇଆଇସି ଚନ୍ଦ୍ରିକା ସ୍ୱାଇଁ ଓ ଆସିକା ଏସ୍ଡିପିଓ ସଞ୍ଜୟ ମହାପାତ୍ର ଏସବୁ କାର୍ଯ୍ୟ ତଦାରଖ କରୁଛନ୍ତି । ଏସ୍ପି ଜଗମୋହନ ମୀନା କହିଛନ୍ତି, ଜିଲ୍ଲାରେ ସିସିଟିଏନ୍ଏସ୍କୁ ଗୁରୁତ୍ୱ ଦିଆଯାଇଛି । ଫଳରେ ଅଫିସରଙ୍କ କାମ ସ୍ମାର୍ଟ ହେବ ଏବଂ ଅଧିକାରୀମାନେ କମ୍ପ୍ୟୁଟର କାମ ଜାଣିବାକୁ ବାଧ୍ୟ ହେଉଛନ୍ତି । ଲଗାତାର ଭାବେ ଜିଲ୍ଲାର ବିଭିନ୍ନ ଥାନା ଦେଶର ସର୍ବଶ୍ରେଷ୍ଠ ତାଲିକାରେ ସ୍ଥାନ ପାଉଥିବାରୁ ଆମ ପାଇଁ ଗୌରବ । ଏହାର ଶ୍ରେୟ ସମସ୍ତ ଅଧିକାରୀଙ୍କୁ ଯିବ ।
ଗତବର୍ଷ ଦେଶରେ ୭୫ଟି ଥାନାକୁ ନେଇ ଏହିସର୍ଭେ ହୋଇଥିଲା । ଓଡ଼ିଶାର ଆସିକା ଓ ବଅଁରପାଳ ଥାନା ସମ୍ଭାବ୍ୟ ପୁରସ୍କାର ତାଲିକାରେ ଥିଲା । କେନ୍ଦ୍ର ଗୃହ ମନ୍ତ୍ରଣାଳୟ ଟିମ୍ ଆସିକା ଥାନା ପରିଦର୍ଶନରେ ଆସିଥିଲେ । ବ୍ୟବସାୟୀ, ପରିବହନ ସଂଘ, ଥାନାକୁ ଆସୁଥିବା ଲୋକଙ୍କ ମତ ନିଆଯାଇଥିଲା । ଏଥିସହ ଥାନାରେ ଜିମ୍, କ୍ରୀଡ଼ା, ମନୋରଞ୍ଜନ ବ୍ୟବସ୍ଥା ତଦାରଖ କରାଯାଇଥିଲା । ବୃତ୍ତିଗତ ପାରଦର୍ଶିତା, ସ୍ୱଚ୍ଛତା, ନିଷ୍ଠାପରତା, ତ୍ୱରିତ କାର୍ଯ୍ୟାନୁଷ୍ଠାନ, ବ୍ୟବହାର, ପ୍ରତିବଦ୍ଧତା, ଦଣ୍ଡବିଧାନ, ଦଳଗତ କାର୍ଯ୍ୟ, ପ୍ରଯୁକ୍ତିବିଦ୍ୟା, ସମୟ ସୀମା ଆଦି ୧୬୫ଟି ପ୍ରସଙ୍ଗରେ ବିଭିନ୍ନ ଥାନାର ପ୍ରଦର୍ଶନ ନେଇ ମୂଲ୍ୟାଙ୍କନ କରାଯାଇଥିଲା ।
ଥାନାଗୁଡ଼ିକର ଦୈନନ୍ଦିନ କାର୍ଯ୍ୟ ପରିଚାଳନା, ତ୍ୱରିତ ସେବା ପ୍ରଦାନ, ମେଡିକାଲ କେସ୍, ଲୋକଙ୍କ ଅଭିଯୋଗ ଶୁଣାଣି ଓ ସମାଧାନ, ମାମଲାର ଉପଯୁକ୍ତ ପରିଚାଳନା ସହ ଅଭିଯୁକ୍ତଙ୍କୁ ଚିହ୍ନଟ, ଚାର୍ଜସିଟ୍ ଦାଖଲ, ଅପରାଧ ଓ ଅପରାଧୀଙ୍କ ତଥ୍ୟ ପ୍ରସ୍ତୁତି ସହ ଫଟୋ ଅପ୍ଲୋଡ୍ କରିବା, ମାମଲାରେ ଅଭିଯୁକ୍ତଙ୍କୁ ଅଦାଲତର ଦଣ୍ଡାଦେଶ ଆଦି ତଥ୍ୟକୁ ହିସାବକୁ ନେଇ ମୂଲ୍ୟାୟନ କରାଯାଉଛି । ଏ ଦିଗରେ ଉତ୍ତମ ପ୍ରଦର୍ଶନ କରି ଆସିକା ଥାନା ଏବଂ ତା’ ପୂର୍ବରୁ ଗାଙ୍ଗପୁର ଥାନା ପୁରସ୍କୃତ ହୋଇଛି ।
