ଭୁବନେଶ୍ୱର,୨୫/୦୮: ବିଧାନସଭା ପ୍ରଶିକ୍ଷଣ କାର୍ଯ୍ୟକ୍ରମକୁ ବିଜେଡି ଗଲା ନାହିଁ । ନିଜ ଦଳର ବିଧାୟକଙ୍କୁ ତାଲିମ ଦେବାକୁ ଶଙ୍ଖ ଭବନରେ ଆୟୋଜନ କରିଛି ବିଜେଡି । ରବିବାର ବିଜେଡି ବିଧାୟକମାନେ ସେଠାରେ ତାଲିମ ନେବେ ।  

ରବିବାର ପୂର୍ବାହ୍ନ ୧୦ଟାବେଳେ ବିଧାୟକଙ୍କ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ ହେବ । ନବାଗତଙ୍କ ସମେତ  ଦଳର ସମସ୍ତ ୫୧ ବିଧାୟକ ଉପସ୍ଥିତ  ରହିବେ ଏହି କାର୍ଯ୍ୟକ୍ରମରେ । ବିରୋଧୀ  ଦଳ ନେତା ତଥା ବିଜେଡି ସଭାପତି  ନବୀନ ପଟ୍ଟନାୟକ ଏହି ପ୍ରଶିକ୍ଷଣ  କାର୍ଯ୍ୟକ୍ରମର ଉଦ୍‌ଘାଟନ କରିବେ । ଏହି ପ୍ରଶିକ୍ଷଣ କାର୍ଯ୍ୟକ୍ରମରେ  ସବୁଠାରୁ ଅଭିଜ୍ଞ ବିଧାୟକ ରଣେନ୍ଦ୍ର  ପ୍ରତାପ ସ୍ୱାଇଁ, ଗଣେଶ୍ୱର ବେହେରା,  ବିକ୍ରମ କେଶରୀ ଆରୁଖ, ପ୍ରତାପ  କେଶରୀ ଦେବ, ବରିଷ୍ଠ ନେତା  ପ୍ରଫୁଲ୍ଲ ସାମଲ, ପ୍ରମିଳା ମଲ୍ଲିକ,  ଅତନୁ ସବ୍ୟସାଚୀ ନାୟକ, ପ୍ରଦୀପ  ଅମାତ ପ୍ରମୁଖ ବିଧାୟକମାନଙ୍କୁ  ଜ୍ଞାନ ପ୍ରଦାନ କରିବେ । 

ରାଜ୍ୟ  ପ୍ରସଙ୍ଗ ସହ ସ୍ଥାନୀୟ ପ୍ରସଙ୍ଗକୁ  କିଭଳି ଉପସ୍ଥାପନ କରିବେ, ସେ  ବାବଦରେ ସେମାନଙ୍କୁ ବିସ୍ତୃତ  ଭାବେ ବୁଝାଯିବ । ସ୍ୱାଧିକାର ଭଙ୍ଗ  ଓ ଘରୋଇ ବିଲ୍‌ ବାବଦରେ ବି  ଜ୍ଞାନ ଦିଆଯିବ । ବରିଷ୍ଠ ନେତା  ଦେବୀ ପ୍ରସାଦ ମିଶ୍ର କାର୍ଯ୍ୟକ୍ରମ  ପରିଚାଳନା କରିବେ । ସାମ୍ବାଦିକ ସମ୍ମିଳନୀରେ ବିଧାୟକ ଅରୁଣ  ସାହୁ ପ୍ରଶିକ୍ଷଣ କାର୍ଯ୍ୟକ୍ରମ ନେଇ ସୂଚନା ଦେଇଛନ୍ତି ।