ଭୁବନେଶ୍ୱର, ୨୧/୦୯ : ବେତ ତିଆରି ସାମଗ୍ରୀର ବ୍ୟବହାର ତ ସମସ୍ତେ ଜାଣନ୍ତି । ତେବେ ଏଗୁଡିକ ପୂର୍ବରୁ ବହୁଳ ଭାବେ ବ୍ୟବହାର ହେଉଥିବାବେଳେ ଦର ବୃଦ୍ଧି ଯୋଗୁ ପ୍ରାୟ ଲୋକ ଏବେ ବେତ ପରିବର୍ତ୍ତେ ପ୍ଲାଷ୍ଟିକ୍ ସାମଗ୍ରୀ ବ୍ୟବହାର କରିବାକୁ ପସନ୍ଦ କରୁଛନ୍ତି । କିନ୍ତୁ ଏହି ବେତ ତିଆରି ସାମଗ୍ରୀ ଅସ୍ଥିଶଲ୍ୟ ରୋଗ ପାଇଁ ଲାଭଦାୟକ ହେଉଥିବାରୁ ଏହାକୁ ବ୍ୟବହାର କରିବାକୁ ଡାକ୍ତର ପରାମର୍ଶ ଦେଉଛନ୍ତି । ତେଣୁ ବେତ ସାମଗ୍ରୀ ପୁଣି ଖୋଜାପଡ଼ିଲାଣି ।
ଏବେ ଅଧିକାଂଶ ଲୋକଙ୍କର ମେରୁଦଣ୍ଡ, କାନ୍ଧ ଓ ଅଣ୍ଟାରେ ଯନ୍ତ୍ରଣା ହେଉଛି । ସେଥିପାଇଁ ଅସ୍ଥିଶଲ୍ୟ ବିଶେଷଜ୍ଞମାନେ କାଠ ଏବଂ ବେତ ଚୌକି ବ୍ୟବହାର କରିବା ପାଇଁ ସେମାନଙ୍କୁ ପରାମର୍ଶ ଦେଉଛନ୍ତି । ତାର କାରଣ ହେଉଛି ଏହି ଚୌକିରେ ବସିବା ଦ୍ୱାରା ଶରୀରର ବସିବା ଭଙ୍ଗି ସ୍ଥିର ରହୁଛି । ଦୀର୍ଘ ସମୟ ଧରି କାର୍ ଚଲାଇଲାବେଳେ ଯେଉଁମାନଙ୍କର ମେରୁଦଣ୍ଡରେ ଯନ୍ତ୍ରଣା ହେଉଛି ସେମାନଙ୍କୁ ବେତର ଡ୍ରାଇଭିଂ ବ୍ୟାକ୍ସିଟ୍ ବ୍ୟବହାର କରିବାକୁ ଡାକ୍ତର କହୁଛନ୍ତି । କାରଣ ଏହାଦ୍ୱାରା ମେରୁଦଣ୍ଡ ସିଧା ରହୁଛି । ତେଣୁ ଏହି ସାମଗ୍ରୀ କିଣିବାକୁ ଦୋକାନରେ ଭିଡ଼ ହେଉଥିବା ଦେଖିବାକୁ ମିଳୁଛି ।
ରାଜଧାନୀ ବଜାରରେ ମିଳୁଥିବା ଏହି ସାମଗ୍ରୀ ତିଆରି ପାଇଁ ବେତ ମୁଖ୍ୟତଃ ଆସାମରୁ ଆସୁଥିବାବେଳେ ଏହାର ମୂଲ୍ୟ ୮ଶହ ଟଙ୍କାରୁ ଆରମ୍ଭ ହେଉଛି । ୟୁନିଟ୍-୨ରେ ବେତ ସାମଗ୍ରୀ ବିକ୍ରି କରୁଥିବା ନନ୍ଦଲାଲ ଦାସ କହନ୍ତି, ଯିଏ ବେତ ସାମଗ୍ରୀ ବ୍ୟବହାର କରିଛି ସିଏ ଏହାର ମହତ୍ତ୍ୱ ଜାଣିଛି । ଲୋକେ ଏହାକୁ କିଣିବାକୁ ଏବେ ବହୁ ସଂଖ୍ୟାରେ ଆସୁଛନ୍ତି । ସେହିପରି ରାଜମହଲ ଛକରେ ବେତ ସାମଗ୍ରୀ ବିକୁଥିବା ଜି. ଲକ୍ଷ୍ମୀ କହନ୍ତି, ବେତ ସାମଗ୍ରୀର ମୂଲ୍ୟ ଅଧିକ ରହୁଥିବାରୁ ଅନେକ ଲୋକ କେବଳ ଦାମ ବୁଝି ଫେରିଯାଉଛନ୍ତି । ହେଲେ ଯେତେବେଳେ ଅସ୍ଥିଶଲ୍ୟ ରୋଗ ଦେଖାଯାଉଛି ସେତେବେଳେ ଲୋକେ ବେତ ଚୌକି ତଥା ଡ୍ରାଇଭିଂ ବ୍ୟାକ୍ ସିଟ୍ ଖୋଜୁଛନ୍ତି ।
କର କ୍ଲିନିକ୍ ଆଣ୍ଡ୍ ହସ୍ପିଟାଲ୍ର ଅସ୍ଥିଶଲ୍ୟ ବିଶେଷଜ୍ଞ ଡାକ୍ତର ଅରବିନ୍ଦ ଦାସ କହନ୍ତି, ବେତ କିମ୍ବା କାଠ ଚୌକିରେ ବସିବା ଭଲ । ଏହି ଚୌକିରେ ବସିଲା ବେଳେ ମେରୁଦଣ୍ଡ ସିଧା ରହିବା ଆବଶ୍ୟକ । ପ୍ଲାଷ୍ଟିକ୍ ଚୌକି ମୁଖ୍ୟତଃ ବଙ୍କା ରହିଥାଏ । ହେଲେ ବେତ ଚୌକି ଅଧିକ ଶକ୍ତ ହୋଇଥାଏ । ଏଥିରେ ବସିବା ଦ୍ୱାରା ଶରୀରର ବସିବାର ଭଙ୍ଗି ଠିକ୍ ରହେ । ଏହାଦ୍ୱାରା ଆମର ମେରୁଦଣ୍ଡରେ ମଧ୍ୟ କୌଣସି କ୍ଷତି ହୋଇନଥାଏ ବୋଲି ଶ୍ରୀ ଦାସ କହିଛନ୍ତି ।
