ଭୁବନେଶ୍ୱର, ୦୨/୦୯: ଆସନ୍ତା ୫ ତାରିଖରେ ଦିଆଯିବ ମୁଖ୍ୟମନ୍ତ୍ରୀ ଓଡ଼ିଆ ଭାଷା ବୃତ୍ତି ସମ୍ମାନ ୨୦୨୪ । ଓଡ଼ିଶା  ମାଧ୍ୟମିକ ଶିକ୍ଷା ପରିଷଦ ପରିଚାଳିତ ମାଟ୍ରିକ୍‌  ପରୀକ୍ଷାରେ ଚଳିବର୍ଷ ମାତୃଭାଷା(ଓଡ଼ିଆ) ରେ ସର୍ବାଧିକ ନମ୍ବର ରଖିଥିବା  ଶିକ୍ଷାର୍ଥୀଙ୍କୁ ଏହି ବୃତ୍ତି ପ୍ରଦାନ କରାଯିବ ।  

ଓଡ଼ିଆ ଭାଷା ବିଷୟରେ ସର୍ବାଧିକ  ନମ୍ବର ରଖିବା ପ୍ରତି ବ୍ଲକ୍‌, ମହାନଗର  ନିଗମ, ପୌରପାଳିକା, ବିଜ୍ଞାପିତ  ଅଞ୍ଚଳ ପରିଷଦ ସ୍ତରରେ ଶିକ୍ଷାର୍ଥୀ ଏହି  ପୁରସ୍କାର ପାଇବେ । ରାଜ୍ୟରେ ମୋଟ୍‌  ପ୍ରାୟ ୭ହଜାରରୁ ଅଧିକ ପିଲା ଏହି  ଛାତ୍ର ବୃତ୍ତି ପାଇବେ ବୋଲି ଜଣାପଡ଼ିଛି । ତେବେ ଆସନ୍ତା ୫ ତାରିଖରେ ହେବାକୁ  ଥିବା ରାଜ୍ୟସ୍ତରୀୟ ମୁଖ୍ୟମନ୍ତ୍ରୀ ଭାଷା ବୃତ୍ତି ସମ୍ମାନ କାର୍ଯ୍ୟକ୍ରମରେ ୩୦ ଜିଲ୍ଲାର  ୩୩ ପିଲାଙ୍କୁ ପୁରସ୍କୃତ କରିବାକୁ ଚୟନ  କରାଯାଇଛି । ଏନେଇ ସମସ୍ତ ଜିଲ୍ଲା ଶିକ୍ଷା  ଅଧିକାରୀଙ୍କୁ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ  ପକ୍ଷରୁ ଚିଠି କରାଯାଇଛି। 

ସୂଚନାଯୋଗ୍ୟ, ଗତ ମାର୍ଚ୍ଚ ୧୬ରେ  ମୁଖ୍ୟମନ୍ତ୍ରୀ ଓଡ଼ିଆ ଭାଷା ବୃତ୍ତି ପ୍ରଦାନ  ସମ୍ପର୍କରେ ରାଜ୍ୟ ସରକାର ନିଷ୍ପତ୍ତି  ନେଇଥିଲେ । ଏନେଇ ଏକ ସଂକଳ୍ପ ପତ୍ର  ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ  ଜାରି କରାଯାଇଥିଲା । ଓଡ଼ିଆ ଭାଷା ପ୍ରତି  ପିଲାଙ୍କ ଆଦର ବୃଦ୍ଧି କରିବା, ଓଡ଼ିଆ ଭାଷା  ଓ ସାହିତ୍ୟର ପ୍ରଚାର ଓ ପ୍ରସାର ପାଇଁ  ମୁଖ୍ୟମନ୍ତ୍ରୀ ଓଡ଼ିଆ ଭାଷା ବୃତ୍ତି ପଦକ୍ଷେପ  ନିଆଯାଇଛି । ଏହି ପଦକ୍ଷେପ ଦ୍ୱାରା ଓଡ଼ିଶା  ସୀମାନ୍ତ ଅଞ୍ଚଳରେ ଥିବା ଓଡ଼ିଆ ପିଲାଙ୍କ  ମଧ୍ୟରେ ଓଡ଼ିଆ ଭାଷା ପ୍ରତି ବିଶେଷ  ଆଗ୍ରହ ବୃଦ୍ଧି ପାଇବ । ଏଥିସହ ଓଡ଼ିଆ  ଭାଷା ସାହିତ୍ୟ ସମୃଦ୍ଧ କରିବାରେ ଏହା  ସହାୟକ ହେବ । ସୂଚନା ଅନୁଯାୟୀ, ବ୍ଲକ୍‌  ଓ ମହାନଗର ନିଗମ ସ୍ତରରେ ୨୦ଜଣ,  ପୌରପାଳିକା ସ୍ତରରେ ୧୦ ଜଣ ଏବଂ  ବିଜ୍ଞାପିତ ଅଞ୍ଚଳ ପରିଷଦ ସ୍ତରରେ ଓଡ଼ିଆ  ଭାଷା ବିଷୟରେ ଶ୍ରେଷ୍ଠ ୫ଜଣ ଶିକ୍ଷାର୍ଥୀଙ୍କୁ  ଏହି ଛାତ୍ରବୃତ୍ତି ପ୍ରଦାନ କରାଯିବ ।