ନୂଆଦିଲ୍ଲୀ: ପାଞ୍ଚଟି ରାଜ୍ୟର ବିଧାନସଭା ନିର୍ବାଚନ ପରେ ଡିସେମ୍ବର ୬କୁ କଂଗ୍ରେସ ଇଣ୍ଡିଆ ମହାମେଣ୍ଟର ଏକ ବୈଠକ ଡାକିଛି । କଂଗ୍ରେସ ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖଡଗେ ଦିଲ୍ଲୀରେ ଇଣ୍ଡିଆ ମହାମେଣ୍ଟର ପାର୍ଟୀ ଗୁଡିଙ୍କୁ ଭେଟିବେ । ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡ ବିଧାନସଭା ନିର୍ବାଚନ ଫଳାଫଳରେ ପଛରେ ରହିବା ପରେ କଂଗ୍ରେସ ଏହି ବୈଠକ ଘୋଷଣା କରିଛି।
ତେବେ ପାଞ୍ଚ ରାଜ୍ୟର ବିଧାନସଭା ନିର୍ବାଚନ ଫଳାଫଳ ପରେ ଇଣ୍ଡିଆ ମହାମେଣ୍ଟର ବୈଠକ ଡକାଯିବ ବୋଲି ପୂର୍ବରୁ ମଲ୍ଲିକାର୍ଜୁନ ଖଡଗେ ସ୍ପଷ୍ଟ କରିଥିଲେ । ବର୍ତ୍ତମାନ ଆସନ୍ତା ବର୍ଷ ହେବାକୁ ଥିବା ଲୋକସଭା ନିର୍ବାଚନ ପୂର୍ବରୁ ଇଣ୍ଡିଆ ମହାମେଣ୍ଟର ଏହି ବୈଠକରେ ଆସନ ବଣ୍ଟନ ଉପରେ ଆଲୋଚନା ହେବାର ସମ୍ଭାବନା ରହିଛି।
ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡରେ ନିର୍ବାଚନ ଫଳାଫଳ ବିଜେପି ସପକ୍ଷରେ ଆସିଛି । ତେଲେଙ୍ଗାନାରେ କଂଗ୍ରେସ ପ୍ରଥମ ଥର କ୍ଷମତାକୁ ଆସୁଥିବା ଦେଖାଯାଉଛି। ସୂଚନାଥାଉକି, ପାଟନାରେ ଇଣ୍ଡିଆ ମହାମେଣ୍ଟର ପ୍ରଥମ ବୈଠକ ଆୟୋଜିତ ହୋଇଥିଲା । ଦ୍ୱିତୀୟ ବୈଠକ ବାଙ୍ଗାଲୋରରେ ଏବଂ ତୃତୀୟ ମୁମ୍ବାଇରେ ହୋଇଥିବା ବେଳେ ଖଡଗେ ଦିଲ୍ଲୀରେ ଚତୁର୍ଥ ବୈଠକ ଡାକିଛନ୍ତି ।