ପ୍ରମୂଖ ଖବର
  • ଜନ୍ମବେଦିରୁ ବାହୁଡ଼ିଲେ ଦାରୁବ୍ରହ୍ମ,ବୁଧବାର ସୁନାବେଶ, ଗୁରୁବାର ଅଧରପଣା, ଶୁକ୍ରବାର ନୀଳାଦ୍ରି ବିଜେ
  • ||
  • ଝାରସୁଗୁଡ଼ା: ଧାର ଟଙ୍କା ଫେରସ୍ତକୁ ନେଇ ଗୁଳିକାଣ୍ଡ, ଜଣେ ଆହତ
  • ||
  • ବିଶ୍ୱ ସର୍ପ ଦିବସ: ବର୍ଷା ଦିନେ ସତର୍କତା ଜରୁରି, ୫ ବର୍ଷରେ ଗଲାଣି ୫୨୧୯ ଜୀବନ
  • ||
  • ବାରିପଦା : ସ୍କୁଟିକୁ ଧକ୍କା ଦେଲା ଟ୍ରକ୍, ୨ ମୃତ
  • ||
  • ମୁମ୍ବାଇ ଏକ୍ସପ୍ରେସ ହାଇୱେରେ ବସ୍-ଟ୍ରାକ୍ଟର ମୁହାଁମୁହିଁ ଧକ୍କା, ୫ମୃତ, ୪୨ ଆହାତ
  • ||
  • ସଇଁନ୍ତଳା ରାଇସମିଲ ନିକଟରେ ହାଇୱା ଟ୍ରକକୁ ପିଟିଲା ଯାତ୍ରୀବାହୀ ବସ୍‌, ଏକାଧିକ ଯାତ୍ରୀ ଆହତ
  • ||
  • ରାଜ୍ୟରେ ଲଘୁଚାପ ସକ୍ରିୟ: ୧୭ରୁ ବଢ଼ିବ ବର୍ଷା, ଉତ୍ତର ଓ ଦକ୍ଷିଣ ଓଡ଼ିଶାରେ ଅଧିକ ବର୍ଷିବ
  • ||

ଦୁଇ ଜିଲ୍ଲାର ପାହାଡ଼ ମଝି ଗାଁ ‘ଡଙ୍ଗାମରା’, ସରକାରୀ ସୁବିଧାଠୁ ବଞ୍ଚିତ ୪୫ ବନବାସୀ ପରିବାର

ବଲାଙ୍ଗୀର,୨୩/୦୪(ମୁକେଶ ବହିଦାର): ‘ଜଙ୍ଗଲରୁ  କାଠ ପାଉଛୁ, ମାଟି ଚୂଆଁରୁ ପାଣି ପିଉଛୁ । ଦିନବେଳା ସୂର୍ଯ୍ୟ ଆଲୁଅ, ରାତିରେ ନିଆଁହୁଲା । ବିକଳାଙ୍ଗ,ବିଧବା ଭତ୍ତାକୁ ଭରସା ନାହିଁ । ମନରେଗା କାର୍ଡ ଅଛି, ହେଲେ କାମ ମିଳୁନି । ପିଡ଼ିଏସ ଚାଉଳ ଭାଗ୍ୟରେ ଥିଲେ ମିଳେ । ରୋଗ ହେଲେ ଜଙ୍ଗଲୀ ଜଡିବୁଟି  ସାହା । ଜନ୍ମରୁ ମରଣ ପ୍ରକୃତି କୋଳରେ । ଯାହା  ଖାଉଛୁ, ପ୍ରକୃତିଠାରୁ ଖାଉଛୁ, ତଥାପି ଥରକୁଥର ଭୋଟ ଦେଇ ସରକାର ଗଢୁଛୁ’ । 

ଏ ହେଉଛି ବଲାଙ୍ଗିର-ନୂଆପଡା ସୀମାନ୍ତ ଡ଼ଙ୍ଗାମରା ଗାଁର ଲୋକଙ୍କ ଦରଦୀ କଥା । ଏହି  ବନବାସୀମାନେ ସରକାରୀ ଯୋଜନାରୁ ବଞ୍ଚିତ ବୋଲି ଆଦୌ ପଶ୍ଚାତାପ କରୁନାହାନ୍ତି । ଓଲଟା ସରକାର ଆମ  କଥା ବୁଝୁ ଅବା ନବୁଝୁ ଆମେ ଗଣତାନ୍ତ୍ରିକ ଅଧିକାର ପ୍ରତି ଆଦୌ ଅବହେଳା କରିବୁ ନାହିଁ । ପ୍ରତିବର୍ଷ ଭଳି ଏଥର ବି ଭୋଟଦେବୁ ବୋଲି କହୁଛନ୍ତି । ସେମାନଙ୍କ କଥାରୁ ସିଧାସଳଖ ପ୍ରତିବାଦର ସ୍ୱର ଆସୁ ନଥିଲେ  ବି ବ୍ୟବସ୍ଥା ଓ ସରକାରୀ ଯୋଜନା ପ୍ରତି ସେମାନଙ୍କର କୌଣସି ମୋହ ନଥିବା ସିଧାସିଧା ଶୁଣାଇଦେଉଛନ୍ତି । 

ବଲାଙ୍ଗିରରୁ ୮୦କିମି ଦୂର କଣ୍ଟାବାଞ୍ଜି  ଏବଂ ସେଠାରୁ ପୁଣି ୧୪ କିମି ଗଲା ପରେ ତୁରକେଲା ବ୍ଲକ ଆସେ । ସେଠାରୁ ପୁଣି ବଡଡୁକୁଲା ଦେଇ ପ୍ରାୟ ଦୁଇକିମି ଚାଷ ଜମିରେ ଯିବା ପରେ ଆରମ୍ଭ ହୁଏ ଧାନଘର ପାହାଡ଼ । ପାହାଡରେ ପ୍ରାୟ ୬କିମି ଚଢ଼ିବା  ଏବଂ ପ୍ରାୟ ୫କିମି ଓହ୍ଲାଇବା ପରେ ପଡେ ଡଙ୍ଗାମରା ଗାଁ । ଏହି ଗାଁରେ ପ୍ରାୟ ୪୫ପରିବାର ରହୁଛନ୍ତି ।  ଯହିଁରୁ ପ୍ରାୟ ୨୫ଟି ପରିବାର ବଲାଙ୍ଗିର ଜିଲ୍ଲାର ଏବଂ ୨୦ଟି ପରିବାର ନୂଆପଡା ଜିଲ୍ଲାର ବାସିନ୍ଦା ଅଟନ୍ତି । ମାତ୍ର ଉଭୟ ଜିଲ୍ଲାର ବାସିନ୍ଦା ଗୋଟିଏ ଗାଁରେ ରୁହନ୍ତି ।  ଧାନଘର ଏବଂ ଗଡୁଡଙ୍ଗର ମଝିରେ ଥିବା ଏହି ଗାଁର  ସମସ୍ତ ପରିବାର ଗଣ୍ଡ ଏବଂ ପହରିଆ ସଂପ୍ରଦାୟର  ଅଟନ୍ତି । ସେମାନେ ସମସ୍ତେ ପ୍ରାୟ ୬/୭ ଦଶନ୍ଧି ହେବ ସେଠାରେ ରହିଆସୁଛନ୍ତି । କିନ୍ତୁ ସେଠାକୁ ସାଧାରଣ  ରାସ୍ତାଟିଏ ମଧ୍ୟ ହୋଇପାରି ନାହିଁ । ଗାଁରେ କାହାର  ଦେହ ଅସୁସ୍ଥ ହେଲେ ଖରା,ବର୍ଷାରେ ଖଟରେ ବୋହି  ପାହାଡ଼ ଡେଇଁ ଯିବାକୁ ହୁଏ । ସେହିପରି ଗାଁରେ ପ୍ରାୟ  ୨୫ ପ୍ରତିଶତ ପରିବାର ପାଖରେ ରାସନ କାର୍ଡ ଅଛି।  ହେଲେ ସେଥିରୁ କେହି ବି ସମ୍ପୂର୍ଣ୍ଣ ଚାଉଳ ପାଉନାହାନ୍ତି  ା 

ଗ୍ରାମର ଜଣେ ବାସିନ୍ଦା ଭରତ ମାଝିଙ୍କ କହିବାନୁସାରେ  ତାଙ୍କ ଘରେ ୬ ପ୍ରାଣୀ । ହେଲେ ତାଙ୍କୁ ମାତ୍ର ୪ଜଣଙ୍କ  ଚାଉଳ ୨୦କେଜି ମିଳେ । ସେହିପରି ଗ୍ରାମର ଭାଗବତ  ମାଝୀଙ୍କ କହିବା ହେଲା ତାଙ୍କ ପାଖରେ ମଧ୍ୟ ସମାନ  ସ୍ଥିତି ଘରେ ୪କୁଟୁମ୍ବ ଥିଲା ବେଳେ ମାତ୍ର ତିନିଜଣଙ୍କୁ ୧୫ କେଜି ଚାଉଳ ମିଳୁଛି । ଯାହା ମିଳୁଛି, ତାହା  ମାସକ ଚଳିବା ପାଇଁ ନିଅଣ୍ଟ, ତେଣୁ ଜଙ୍ଗଲୀ କନ୍ଦମୂଳ  ଖାଇବାକୁ ବାଧ୍ୟ ହେଉଥିବା ସେମାନେ କହିଛନ୍ତି । ପ୍ରାୟ  ପରିବାର ପାଖରେ କାର୍ଡ ଥିଲେହେଁ ଆଧାର କାର୍ଡ  ସହିତ ଟିପଚିହ୍ନ ମେଳ ଖାଉନଥିବା କହି ଚାଉଳ, ଭତ୍ତା ଆଦି ସେମାନଙ୍କୁ ଦିଆଯାଉନଥିବା ଅଭିଯୋଗ କରିଛନ୍ତି ।  ଗାଁ ଆଖପାଖରେ ଭାଲୁ ଓ ହାତୀ ବିଚରଣ କରୁଥିବାରୁ  ଗାଁର ପିଲାମାନେ ପାହାଡଚଢ଼ି ପଢ଼ିଯିବାକୁ ମଙ୍ଗୁ  ନାହାନ୍ତି । ଅନେକ ପରିବାର ଏଭଳି ଅଛନ୍ତି, ଯାହାଘରେ  ପିଲାଟିଏ ଜନ୍ମ ହୋଇ ପାଢପଢ଼ା ଯୋଗ୍ୟ ହୋଇଗଲେ  ତାକୁ ନୂଆପଡା ଜିଲ୍ଲାର ସମ୍ପର୍କୀୟ ନଚେତ କୋମନା  କିମ୍ବା ଦର୍ଲିପଡା ଆଶ୍ରମ ସ୍କୁଲରେ ଛାଡିଦେଉଛନ୍ତି ।  

ଆଲୁଅ ନଥିବାରୁ ରାତି ହେଲେ ଚୁଲିରେ ନିଆଁଜାଳି  ସମସ୍ତଙ୍କ ରାତି କଟେ । ଜଙ୍ଗଲ ଭିତରେ ସ୍ତ୍ରୀ ଛୁଆପିଲା  ଏକା ରହୁଥିବାରୁ ପୁରୁଷମାନେ ଘରଛାଡ଼ି ଯାଉନାହାନ୍ତି ।  ସମାନେ ଜଙ୍ଗଲରୁ ଲଘୁ ବନଜାତ ଦ୍ରବ୍ୟ ସଂଗ୍ରହ କରି  ପେଟ ପୋଷିଥାନ୍ତି । ସେହିପରି ଗାଁରେ ପିଇବାକୁ  ପାଣି ମିଳୁ ନଥିବାରୁ ବାଲିଚୁଆଁର ପାଣି ପିଇ ଜୀବନ  ନିର୍ବାହ କରିଥାନ୍ତି । ଏତେ ସମସ୍ୟା ସତ୍ତେ୍ୱ ସରକାର,  ପ୍ରଶାସନ, କିମ୍ବା ସରକାରୀ ବ୍ୟବସ୍ଥା ପ୍ରତି ସେମାନଙ୍କର  କୌଣସି ଆପତ୍ତି ନାହିଁ । ସେମାନେ ସଭିଏଁ ଉଚ୍ଚମନା  ହୋଇ ଆଧାର ପଞ୍ଜିକରଣ କିମ୍ବା ଭୋଟ ଦେବା ଭଳି ସାମ୍ବିଧାନିକ ବ୍ୟବସ୍ଥା ପ୍ରତି ଅତୁଟ ଆସ୍ଥା ରଖିଛନ୍ତି ।  ତେବେ ସବୁଠି ବିକାଶର ଧାରା ପହଞ୍ଚୁଥିବା ବେଳେ  ଡଙ୍ଗାଘାଟ ଏଥିରୁ କାହିଁକି ବାଦ ବୋଲି ଗାଁର ରମେଶ  ମାଝି, ଚନ୍ଦ୍ରେ ମାଝି, କାନ୍ତୀ ମାଝି, ଉର୍ମିଲା ମାଝି, କୁଟୁଲ  ମାଝି, ତରୁଣ ମାଝି ପ୍ରମୁଖ ଅଭିଯୋଗ କରିଛନ୍ତି।

News7 Is Now On WhatsApp Join And Get Latest News Updates Delivered To You Via WhatsApp

Rath Yatra

Copyright © 2024 - Summa Real Media Private Limited. All Rights Reserved.