ଭୁବନେଶ୍ବର ୧୬/୦୯: ବିଦ୍ୟୁତ୍ ଆଘାତରେ ଚାଲିଗଲା ବ୍ୟକ୍ତିଙ୍କ ଜୀବନ। ସ୍ତ୍ରୀକୁ ବଞ୍ଚାଇବାକୁ ଯାଇ ସ୍ୱାମୀର ମୃତ୍ୟୁ। ଏପରି କିଛି ଘଟଣା ଦେଖିବାକୁ ମିଳିଛି ଚକେଇସିହାଣୀରେ ।

ସୂଚନା ଅନୁଯାଇ, ଚକେଇସିହାଣୀ ଶ୍ରୀରାମ ନଗର ବସ୍ତିର ପ୍ରଶାନ୍ତ ସାଥୁଆ(୪୦) । ପ୍ରଶାନ୍ତଙ୍କ ସ୍ତ୍ରୀ ସକାଳୁ କିଛି ଓଦାଲୁଗା ଶୁଖାଇବାକୁ  ଛାତ ଉପରକୁ   ଯାଇଥିଲେ। ଯେଉଁ ତାରରେ ଲୁଗା ଶୁଖାଉଥିଲେ ସେଥିରେ ବିଦ୍ୟୁତ୍ ସଂଯୋଗ ହୋଇଯାଇଥିଲା। ଫଳରେ ସେ ବିଦ୍ୟୁତ୍ ସଂସ୍ପର୍ଶରେ ଆସିଥିଲା। ଚିତ୍କାର ଶୁଣି ପ୍ରଶାନ୍ତ ତାଙ୍କୁ ବଞ୍ଚାଇବାକୁ ଚେଷ୍ଟା କରିବାକୁ ଯାଇ ନିଜେ ବିଦ୍ୟୁତ୍ ଆଘାତର ଶିକାର ହୋଇଥିଲେ। ଘଟଣା ସ୍ଥଳରୁ ପ୍ରଶାନ୍ତ ଓ ତାଙ୍କ ସ୍ତ୍ରୀଙ୍କୁ ଗୁରୁତର ଅବସ୍ଥାରେ ନିକଟସ୍ଥ ଏକ ଘରୋଇ ହସ୍ପିଟାଲରେ ଭର୍ତି କରାଯାଇଥିଲା। ପରେ ସେଠାରୁ ତାଙ୍କୁ କ୍ୟାପିଟାଲ୍ ହସ୍ପିଟାଲ୍କୁ ସ୍ଥାନାନ୍ତର କରାଯାଇଥିଲା। ସେଠାରେ ପ୍ରଶାନ୍ତଙ୍କ ସ୍ତ୍ରୀ ସୁସ୍ଥ ଥିବା ବେଳେ ଡାକ୍ତର ପ୍ରଶାନ୍ତଙ୍କୁ ମୃତ ଘୋଷଣା କରିଛନ୍ତି। 

ପ୍ରଶାନ୍ତ ଭିଏସ୍ଏସ୍ ନଗର ହାଟରେ ଏକ ଜୁଏଲରୀ ଦୋକାନ କରିଥିବା ବେଳେ ସେ ଗଡେଶ୍ବର ହାଟ ବଣିକ ସଂଘର କୋଷାଧକ୍ଷ ତଥା ଜଣେ ସକ୍ରିୟ ସଦସ୍ୟ ଥିଲେ।ପ୍ରଶାନ୍ତଙ୍କ ଘର ନୟାଗଡ ଚମ୍ପତିପୁର ଓ ସେ  ଦୀର୍ଘ ୨୦ ବର୍ଷ ହେବ ଭିଏସ୍ଏସ୍ ନଗର ରେ ବ୍ୟବସାୟ କରୁଥିଲେ। ସେଜଣେ ମେଳାପି ଓ ମିଷ୍ଠ ଭାଷି ମଣିଷ ଥିଲେ।