ଭୁବନେଶ୍ୱର,୧୦/୦୮: ଦେଶରେ ମୋବାଇଲ ସେବାକୁ ୨୮ ବର୍ଷ ପୂରିଲାଣି । ବିଡ଼ମ୍ବନା ଏହି ଯେ ଓଡ଼ିଶାର ୩୮୫୩ ଗାଁରେ ଏଯାଏ ମୋବାଇଲ ସେବା ଅପହଞ୍ଚ । ମୋବାଇଲ ସେବା ନଥିବାରୁ ଲୋକମାନେ ଯୋଗାଯୋଗ ପାଇଁ ହଇରାଣ ହରକତ ହେଉଛନ୍ତି । ରାଜ୍ୟ ଡିଜିଟାଲ ଅର୍ଥନୀତିରେ ମଧ୍ୟ ପଛରେ ପଡ଼ିଛି । ରାଜ୍ୟର ଦୁର୍ଗମ ଅଞ୍ଚଳରେ ଯେଉଁଠି ଟେଲି ସେବା ନାହିଁ ମୋବାଇଲ ସେବା ପହଞ୍ଚାଇବାକୁ ରାଜ୍ୟ ଦାବି କରିଆସୁଛି । କେନ୍ଦ୍ର ସରକାର ଏ ଦିଗରେ ପଦକ୍ଷେପ ନେଇ ଖୁବଶୀଘ୍ର ସବୁ ଗାଁକୁ ମୋବାଇଲ ସେବା ପହଞ୍ଚାଇବେ ବୋଲି ପ୍ରତିଶ୍ରୁତି ଦେଇଛନ୍ତି ।
ଓଡ଼ିଶାରେ ଏବେ ୩ କୋଟି ୩୭ ଲକ୍ଷ ମୋବାଇଲ ଉପଭୋକ୍ତା ଅଛନ୍ତି । ଗ୍ରାମାଞ୍ଚଳରେ ଅଛନ୍ତି ୨.୨୩ କୋଟି । ଉପଭୋକ୍ତା ସଂଖ୍ୟା ମଧ୍ୟ ବଢ଼ି ବଢ଼ି ଚାଲିଛି । ରାଜ୍ୟରେ ଇଣ୍ଟରନେଟ୍ ଗ୍ରାହକଙ୍କ ସଂଖ୍ୟା ଗତ ୬ ବର୍ଷରେ ଅଢ଼େଇ ଗୁଣ ବଢ଼ିଛି । ଏବେ ରାଜ୍ୟରେ ପ୍ରତି ୧୦୦ ଲୋକରେ ୫୨ ଜଣ ଇଣ୍ଟରନେଟ୍ ବ୍ୟବହାର କରୁଛନ୍ତି । ଜାତୀୟ ହାର କିନ୍ତୁ ରହିଛି ୬୪ । ଜାତୀୟ ହାରଠାରୁ ଓଡ଼ିଶାରେ ଟେଲି ସାନ୍ଦ୍ରତା, ମୋବାଇଲ ଗ୍ରାହକ ଓ ଇଣ୍ଟରନେଟ୍ ବ୍ୟବହାରକାରୀ ସଂଖ୍ୟା ଢେର କମ୍ ରହିଛି ।
ସରକାରୀ ସୂଚନା କହୁଛି, ଗତ ଏପ୍ରିଲ ମାସ ସୁଦ୍ଧା ଓଡ଼ିଶାର ୫୧ ହଜାର ୧୭୬ ଗାଁରୁ ୪୭,୩୨୩ ଗାଁରେ ମିଳୁଛି ମୋବାଇଲ ନେଟୱର୍କ। ବାକି ୩୮୫୩ ଗାଁ ଏଥିରୁ ବଞ୍ଚିତ । ୪୬ ହଜାର ୫୦ ଗାଁରେ ୩ଜି/୪ଜି ମୋବାଇଲ ସେବା ମିଳୁଛି । ରାଜ୍ୟର ୬,୭୮୮ ପଞ୍ଚାୟତ ମଧ୍ୟରୁ ଭାରତନେଟ୍ରେ ୬,୭୮୫କୁ ସଂଯୋଗ କରାଯାଇଛି । ଟେଲି ଯୋଗାଯୋଗ ହେଉଛି ଡିଜିଟାଲ ଅର୍ଥନୀତିର ବଡ଼ ମାଧ୍ୟମ। ରାଜ୍ୟରେ ମୋବାଇଲ ଟେଲି ସାନ୍ଦ୍ରତା ୭୫.୫ ରହିଛି । ସର୍ବଭାରତୀୟସ୍ତରରେ ଏହି ହାର କିନ୍ତୁ ୮୪.୫ । ଓଡ଼ିଶାରେ ଗ୍ରାମୀଣ ଟେଲି ଘନତ୍ୱ ୬୩% ଛୁଇଁଛି । ୧୦ ବର୍ଷରେ ଏଥିରେ ୧୦ ପ୍ରତିଶତ ବୃଦ୍ଧି ହୋଇଛି । ରାଜ୍ୟରେ ବିଶେଷ କରି ନକ୍ସଲ ପ୍ରଭାବିତ ଗାଁଗୁଡିକୁ ତୁରନ୍ତ ମୋବାଇଲ୍ ସେବା ଉପଲବ୍ଧ କରାଇବା ଉପରେ ଉଭୟ କେନ୍ଦ୍ର ଓ ରାଜ୍ୟ ସରକାର ଜୋର୍ ଦେଉଛନ୍ତି । ଅଭିଯୋଗ ହେଉଛି ଯେ ଅଧିକାଂଶ ଗାଁରେ ମୋବାଇଲ୍ ସଂଯୋଗ ଥିଲେ ମଧ୍ୟ ନେଟ୍ୱର୍କ ଅତି ଦୁର୍ବଳ । ଲୋକମାନେ ଡିଜିଟାଲ ପେମେଣ୍ଟ ଭଳି ସେବାରୁ ବଞ୍ଚିତ ହେଉଛନ୍ତି ।
ମୋବାଇଲ ସେବାରେ ଉନ୍ନତି ଆଣିବାକୁ ୟୁନିଭର୍ସାଲ ସର୍ଭିସ ଓବ୍ଲିଗେସନ ଫଣ୍ଡ୍ (ୟୁଏସ୍ଓଏଫ୍)ରୁ ପାଣ୍ଠି କେନ୍ଦ୍ର ଯୋଗାଇ ଅଧିକ ମୋବାଇଲ ନେଟ୍ୱର୍କ ସହ ବ୍ରଡବ୍ୟାଣ୍ଡ ସେବାରେ ଉନ୍ନତି ଆଣିବାକୁ ପଦକ୍ଷେପ ନେଉଛନ୍ତି । ଏଥିପ୍ରତି କେନ୍ଦ୍ର ଧ୍ୟାନ ଦେବାକୁ ବାରମ୍ବାର ଓଡ଼ିଶା ସରକାର ଦାବି କରି ଆସୁଛନ୍ତି । ଡିଜିଟାଲ ଯୋଗାଯୋଗ ଭିତ୍ତିଭୂମି ବଢ଼ାଇବାକୁ ଜାତୀୟ ବ୍ରଡ୍ବ୍ୟାଣ୍ଡ ମିଶନ ସହ ଗତିଶକ୍ତି ସଂଚାର ପୋର୍ଟାଲ ଜରିଆରେ କେନ୍ଦ୍ର ସରକାର ପଦକ୍ଷେପ ନେଉଛନ୍ତି । ‘ଫିନ୍ଟେକ୍’ ଓ ‘ଏଡଟେକ୍’କୁ ଆଗକୁ ବଢ଼ାଇ ରାଜ୍ୟରେ ଡିଜିଟାଲ ଅର୍ଥନୀତିକୁ ସୁଦୃଢ଼ କରିବାକୁ ମଧ୍ୟ କେନ୍ଦ୍ର ସରକାର ଯୋଜନା କରୁଛନ୍ତି ।
