ନୂଆଦିଲ୍ଲୀ,୨।୯: ଆଜିର ସମୟରେ ଏଟିଏମ୍‌ କାର୍ଡ ପ୍ରତି ବ୍ୟକ୍ତିଙ୍କ ଦରକାରୀ ଜିନିଷ ପାଲଟି ଯାଇଛି। ପକେଟ୍‌ରେ ମୋଟା ଅଙ୍କର ଟଙ୍କା ରଖିବା ବଦଳରେ ଏଟିଏମ୍ କାର୍ଡ ନେଉଛନ୍ତି ଲୋକେ।   କିନ୍ତୁ ଆପଣ କ’ଣ ଜାଣନ୍ତ କି ବ୍ୟାଙ୍କରୁ ଯେତେବେଳେ ଆପଣଙ୍କ ପାଇଁ ଏଟିଏମ୍ କାଡଁ ଜାରି ହୋଇଥାଏ, ସେଭଳି ଗ୍ରାହକଙ୍କୁ ଦୁର୍ଘଟଣା ବୀମା ଓ ଅସମୟ ମୃତ୍ୟୁର ବୀମା ମିଳିଯାଇଥାଏ। କିନ୍ତୁ ଏହାର ସୂଚନା ଖୁବ୍ କମ୍ ଲୋକଙ୍କ ପାଖରେ ଥାଏ ଓ ବ୍ୟାଙ୍କ ଗ୍ରାହକଙ୍କୁ ଏଭଳି ସୂଚନା ଦେଇନଥାଏ।

ବିହାରର ପରିବହନ ବିଭାଗ ସଚିବ ସଞ୍ଜୟ କୁମାର ଅଗ୍ରଓ୍ବାଲ କହିଛନ୍ତି ଯେ, ବ୍ୟାଙ୍କ ଯେତେବେଳେ କୌଣସି ଗ୍ରାହକଙ୍କ ଏଟିଏମ୍ କାର୍ଡ ଜାରି କରିଥାଏ, ତା ସହିତ ଗ୍ରାହକଙ୍କୁ ଦୁର୍ଘଟଣା କିମ୍ବା ଅସମୟ ମୃତ୍ୟୁର ବୀମା ମିଳିଯାଇଥାଏ। କିନ୍ତୁ ସୂଚନା ଅଭାବରୁ ଏଟିଏମ୍ କାର୍ଡ ଧାରକଙ୍କ ଦୁର୍ଘଟଣା କିମ୍ବା ଅସମୟ ମୃତ୍ୟୁ ପରେ ତାଙ୍କ ପରିବାର ଲୋକଙ୍କୁ ବୀମାର ଲାଭ ମିଳିପାରିନଥାଏ। ସେ କହିଛନ୍ତି, ଦୁର୍ଘଟଣାର ଏକ ମାସ ଭିତରେ ଏଟିଏମ୍ କାର୍ଡ ଧାରକ ସେହି ବ୍ୟାଙ୍କ ଶାଖାରେ ଆବେଦନ କରି ପାରିବେ। କ୍ଲେମ କରିବାର ସୂଚନା ପରିବହନ ବିଭାଗର ଓ୍ବେବସାଇଟ୍‌ରେ ଉପଲବ୍ଧ ହେବ। ସଞ୍ଜୟ ଅଗ୍ରଓ୍ବାଲ ବ୍ୟାଙ୍କକୁ କହିଛନ୍ତି ସେମାନେ ନିଜ ଗ୍ରାହକଙ୍କୁ ଏହି ସୁବିଧା ବିଷୟରେ କୁହନ୍ତୁ ଓ ଏହାର ପ୍ରଚାର ପ୍ରସାର କରନ୍ତୁ, ଯାହାଫଳରେ ଦୁର୍ଘଟଣାରେ କୌଣସି ପୀଡିତ କିମ୍ବା ମୃତକଙ୍କ ପରିବାର ଲୋକଙ୍କୁ ଲାଭ ମିଳିପାରିବ।

କେଉଁ ଏଟିଏମ୍‌ରେ କେତେ ଟଙ୍କାର ବୀମା? 

ଉଲ୍ଲେଖନୀୟ ଯେ, ଏଟିଏମ୍‌ କାର୍ଡ ହିସାବରେ ଦୁର୍ଘଟଣା ଓ ଅସମୟ ମୃତ୍ୟୁର ବୀମା ମିଳିଥାଏ। ନିୟମ ଅନୁସାରେ, ଗ୍ରାହକ କୌଣସି ରାଷ୍ଟ୍ରାୟତ/ ଅଣ ରାଷ୍ଟ୍ରାୟତ ବ୍ୟାଙ୍କର ଏଟିଏମ୍‌କୁ ୪୫ ଦିନ ହେବ ବ୍ୟବହାର କରୁଥିବେ। ଏଟିଏମ୍ କାର୍ଡର କାଟାଗୋରୀ ଅନୁସାରେ, ଇନସ୍ୟୁରାନ୍ସର ଟଙ୍କା ଦିଆଯାଇଥାଏ। କ୍ଲାସିକାଲ କାର୍ଡରେ ଏକ ଲକ୍ଷ, ପ୍ଲାଟିନମ୍‌ କାର୍ଡରେ ୨ ଲକ୍ଷ, ସାମାନ୍ୟ ମାଷ୍ଟର କାର୍ଡ ଉପରେ ୫୦ ହଜାର, ପ୍ଲାଟିନମ୍ ମାଷ୍ଟର କାର୍ଡରେ ୫ ଲକ୍ଷ, ଭିସା କାର୍ଡରେ ଦେଢ ଲକ୍ଷରୁ ୨ ଲକ୍ଷ ପର୍ଯ୍ୟନ୍ତ ଇନ୍ସୁରାନ୍ସ କଭରେଜ୍ ମିଳିଥାଏ। ସେଭଳି ରୁପେ କାର୍ଡରେ ୧ରୁ ୨ ଲକ୍ଷ ପର୍ଯ୍ୟନ୍ତ ବୀମା ମିଳିଥାଏ।

କେଉଁ ସ୍ଥିତିରେ କେତେ ଟଙ୍କାର ବୀମା ?

ଯଦି ଏଟିଏମ୍‌ କାର୍ଡ ଧାରକ କୌଣସି ଦୁର୍ଘଟଣାର ଶିକାର ହୁଅନ୍ତି। ଯିଏକି ତାଙ୍କ ହାତ କିମ୍ବା ଗୋଡ ହରାଇଥାନ୍ତି କିମ୍ବା ଦିବ୍ୟାଙ୍ଗ ହୋଇଥାନ୍ତି। ତାଙ୍କୁ ୫୦ ହଜାର ଟଙ୍କାର ବୀମା ମିଳିଥାଏ। ଦୁଇ ହାତ କିମ୍ବା ଦୁଇ ଗୋଡ ହରାଇଥିଲେ ୧ ଲକ୍ଷ ଟଙ୍କାର ବୀମା ମିଳିଥାଏ। ସେଭଳି ମୃତ୍ୟୁ ପରେ କାର୍ଡ ହିସାବରେ ୫ ଲକ୍ଷ ପର୍ଯ୍ୟନ୍ତ ବୀମା କଭରେଜ୍ ମିଳିବାର ନିୟମ ରହିଛି।

ଏଟିଏମ୍ କାର୍ଡରେ ମିଳୁଥିବା ଇନସ୍ୟୁରାନ୍ସକୁ କ୍ଲେମ୍ କରିବା ପାଇଁ କାର୍ଡଧାରକଙ୍କ ନୋମିନିଙ୍କୁ ସମ୍ପର୍କିତ ବ୍ୟାଙ୍କ ଶାଖାରେ ଆବେଦନ କରିବାକୁ ପଡିଥାଏ। ଯେଉଁଥିରେ ଏଫ୍‌ଆଇଆରର କପି, ଚିକିତ୍ସା ପ୍ରମାଣପତ୍ର ଭଳି କାଗଜ ପତ୍ର ଜମା କରିବାକୁ ପଡିଥାଏ। ଏହାର କିଛି ଦିନରେ ବୀମା କ୍ଲେମ ଖାତାକୁ ଆସିଥାଏ। ସେଭଳି ମୃତ୍ୟୁ ସ୍ଥିତିରେ କାର୍ଡ ହୋଲ୍ଡରଙ୍କ ନୋମିନିଙ୍କ ଡେଥ୍‌ ସାର୍ଟିପିକେଟ୍‌, ଏଫ୍‌ଆଇଆର କପି, ଆଶ୍ରିତଙ୍କ ପ୍ରମାଣ ପତ୍ର, ମୃତକଙ୍କ ପ୍ରମାଣ ପତ୍ର ଜମା କରିବାକୁ ପଡିଥାଏ। ଏହି ପୁରା ପ୍ରୋସେସ୍ ପରେ ବୀମାର ଲାଭ ମିଳିଥାଏ।