ନୂଆଦିଲ୍ଲୀ: ଭୋଟ୍ ଫର ଟ୍ରମ୍ପ, ସେଭ୍ ଟିକଟକ୍ । ଦିନେ ସର୍ଟ ଭିଡିଓ ଆପ୍ ଟିକଟକ୍ ଉପରେ ପ୍ରତିବନ୍ଧକ ଲଗାଇବାକୁ ନିଷ୍ପତ୍ତି ନେଇଥିବା ଡୋନାଲ୍ଡ ଟ୍ରମ୍ପ ପୁଣି ଥରେ ଏହାକୁ ନିଜର ନିର୍ବାଚନୀ ଅସ୍ତ୍ର କରିଛନ୍ତି । ଟିକ୍ଟକ୍କୁ ରକ୍ଷା କରିବାକୁ ଚାହୁଁଥିଲେ ଟ୍ରମ୍ପଙ୍କୁ ଭୋଟ ଦେଇ ଜିତାନ୍ତୁ ବୋଲି ସେ ଆମେରିକୀୟଙ୍କୁ ଅପିଲ କରିଛନ୍ତି । ନିଜ ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ ସୋଶାଲ’ରେ ପୋଷ୍ଟ କରି ଆମେରିକୀୟଙ୍କୁ ଏଭଳି କହିଛନ୍ତି ରିପବ୍ଲିକାନ୍ ପାର୍ଟିର ରାଷ୍ଟ୍ରପତି ପ୍ରାର୍ଥୀ ଡୋନାଲ୍ଡ ଟ୍ରମ୍ପ । ଏହା ସହ ଡେମୋକ୍ରାଟିକ ପାର୍ଟି ଏବଂ ତାଙ୍କର ପ୍ରତିଦ୍ବନ୍ଦୀ କମଲା ହ୍ୟାରିସ ଟିକ୍ଟକ୍କୁ ସମ୍ପୂର୍ଣ୍ଣ ବନ୍ଦ କରାଇଦେବାକୁ ଚାହୁଁଛନ୍ତି ବୋଲି ଟ୍ରମ୍ପ ଅଭିଯୋଗ କରିଛନ୍ତି । ତେଣୁ ଟିକଟକ୍କୁ ରକ୍ଷା କରିବାକୁ ଚାହୁଁଥିଲେ ଟ୍ରମ୍ପଙ୍କୁ ଭୋଟ ଦିଅନ୍ତୁ ବୋଲି ସେ ଭୋଟରଙ୍କୁ ଅପିଲ କରିଛନ୍ତି ।
ସେ ଏକ ଭିଡିଓ ଜାରି କହିଛନ୍ତି, ପ୍ରତିପକ୍ଷ ଏହାକୁ ବନ୍ଦ କରିବାକୁ ଚାହୁଁଛନ୍ତି କିନ୍ତୁ ମୁଁ ଟିକଟକ୍ରେ ଏବେ ବଡ଼ ଷ୍ଟାର । ଟ୍ରମ୍ପ ୩ ମାସ ପୂର୍ବରୁ ଟିକଟକ୍ ସହ ଯୋଡ଼ି ହୋଇଥିଲେ । ଏହି ଆପ୍ରେ ତାଙ୍କର ୧୦.୮ ମିଲିୟନ୍ ଫଲୋୟର୍ସ ଅଛନ୍ତି । ସେହିଭଳି ଡେମୋକ୍ରାଟ ରାଷ୍ଟ୍ରପତି ପ୍ରାର୍ଥୀ କମଲା ହ୍ୟାରିସ ଦୁଇ ମାସ ପୂର୍ବରୁ ଟିକଟକ୍ରେ ଯୋଡ଼ି ହେବା ସହ ତାଙ୍କୁ ୫ ମିଲିୟନ୍ ୟୁଜର୍ସ ଫଲୋ କରୁଛନ୍ତି । ଟ୍ରମ୍ପ କହିଛନ୍ତି ଯେ, ‘ ଆମେ ଟିକଟକ୍କୁ ବନ୍ଦ କରିବୁ ନାହିଁ କିନ୍ତୁ ଆମ ପ୍ରତିପକ୍ଷ ଏହାକୁ ବନ୍ଦ କରିଦେବେ । ଯଦି ଟିକଟକ୍କୁ ଭଲ ପାଉଛନ୍ତି ତେବେ ବାହାରକୁ ଆସନ୍ତୁ ଏବଂ ଟ୍ରମ୍ପଙ୍କୁ ଭୋଟ ଦିଅନ୍ତୁ ।’
ସେପଟେ ଯୁବପୀଢ଼ିଙ୍କ ଗହଣରେ ଟିକ୍ଟକ୍ର କ୍ରେଜ୍ ଖୁବ ଅଧିକ । ତେଣୁ ଉଭୟ ଦଳର ରାଷ୍ଟ୍ରପତି ଟିକ୍ଟକକୁ ନେଇ ସକାରତ୍ମକ ମନୋଭାବ ପୋଷଣ କରୁଛନ୍ତି । ବର୍ତ୍ତମାନ ପରିସ୍ଥିତିରେ ଟ୍ରମ୍ପ କିମ୍ବା ବାଇଡେନ୍ ପ୍ରଶାସନ କେହି ଟିକଟକ୍ ବ୍ୟାନ ସପକ୍ଷରେ ମତ ଦେଉନାହାନ୍ତି । କିନ୍ତୁ ଏହା ପୂର୍ବରୁ ବାଇଡେନ୍ ପ୍ରଶାସନ ଚୀନ୍ କମ୍ପାନି ‘ବାଇଟ୍ ଡ୍ୟାନ୍ସ’କୁ ଭିଡିଓ ସେୟାରିଂ ଆପ୍ ଟିକଟକ୍କୁ ବିକ୍ରି କରିଦେବାକୁ ଅଲ୍ଟିମେଟମ ଦେଇଥିଲେ । ଜାନୁଆରୀ ୨୦୨୫ ଡେଡଲାଇନ୍ ଦିଆଯାଇଥିବା ବେଳେ ଏହାକୁ ବିରୋଧ କରିଥିଲେ ଟ୍ରମ୍ପ । କିନ୍ତୁ ରାଷ୍ଟ୍ରପତି ଥିବା ବେଳେ ଖୋଦ ଟ୍ରମ୍ପ ‘ଏକ୍ଜିକ୍ୟୁଟିଭ ଅର୍ଡର’ ଜରିଆରେ ଟିକଟକ୍ ଉପରେ ବ୍ୟାନ ଲଗାଇବାକୁ ଚେଷ୍ଟା କରିଥିଲେ ।
