ରାଉରକେଲା,୧୮/୦୩: ପଡୋଶୀ ରାଜ୍ୟ ଝାଡ଼ଖଣ୍ଡରୁ ୨୦୦ଟଙ୍କାରେ ଆଣୁଥିଲେ । ରାଉରକେଲା ଏବଂ ଆଖପାଖ ଅଞ୍ଚଳରେ ୮୦୦ଟଙ୍କାରେ ବିକ୍ରି କରୁଥିଲେ । ଆବଶ୍ୟକ ପଡିଲେ ଅସେଣ୍ଟ(ତରଳ ସୁଗନ୍ଧ) ପକାଉଥିଲେ । ବିକ୍ରି କରିବାକୁ ନେଉଥିବା ବେଳେ ଅବକାରୀ ବିଭାଗ ହାତରେ ଧରା ପଡିଗଲେ । ଗିରଫ ଅଭିଯୁକ୍ତମାନେ ହେଲେ କାରବାରର ମୁଖ୍ୟ ରାଜୁ ସାହୁ(୩୮), ଅଟୋ ଚାଳକ ଓମ୍ ବାଘ(୪୨) ଓ ସହଯୋଗୀ ବସନ୍ତ ସାହୁ(୩୦) ।
ରାଜୁ ଝାଡ଼ଖଣ୍ଡରୁ ୨୦୦ଟଙ୍କାରେ ୭୫୦ଏମ୍ଏଲ (ଫୁଲ୍) ମଦ ଆଣୁଥିଲେ । ଏହି ମଦ ନକଲି ହୋଇଥିବା ବେଳେ ସେଠାକାର ପ୍ରସ୍ତୁତକର୍ତ୍ତା ଏହାକୁ ନାଇଟ୍ ଗାର୍ଲ ନାମକ ଏକ କମ୍ପାନିର ଲୋଗୋ ଲଗାଇ ବିକ୍ରି କରୁଥିଲେ । ରାଜୁ ଏହି ଫୁଲ୍ ବୋତଲକୁ ଆଣି ତାକୁ ଚାରି ଭାଗ ଅର୍ଥାତ କ୍ୱାଟରରେ ପରିଣତ କରୁଥିଲେ । କ୍ୱାଟର ବୋତଲରେ ବିଭିନ୍ନ ମଦ କମ୍ପାନିର ଷ୍ଟିକର ଲଗାଇ ବଜାରରେ ବିକ୍ରି କରୁଥିଲେ । ଆବଶ୍ୟକ ପଡ଼ିଲେ ମଦ ବାସ୍ନା ହେଉଥିବା ଆସେଣ୍ଟ ମଧ୍ୟ ମିଶାଉଥିଲେ । ଶନିବାର ରାତିରେ ସେକ୍ଟର-୨ ଅଞ୍ଚଳକୁ ଅଟୋରେ ମଦ ବୋତଲ ବିକ୍ରି କରିବାକୁ ଯାଉଥିବା ବେଳେ ଅବକାରୀ ବିଭାଗ ହାତରେ ଧରା ପଡିଯାଇଥିଲେ । ଏହିକ୍ରମରେ ଅବକାରୀ ବିଭାଗ ଅଟୋ ଓଡ଼ି ୧୪ୟୁ ୩୭୮୬, ଏକ ମଟରସାଇକଲ ଓଡ଼ି ୧୪ଏଚ୍ ୧୯୫୦, ୯୬ ବୋତଲ ମଦ, ମଦ ବୋତଲ ଠିପି, ଲେବଲ, ଖାଲି ବୋତଲ ଆଦି ଧରିଛି। ତେବେ ଏହି ନକଲି ମଦକୁ କେଉଁ ଅଞ୍ଚଳ କିମ୍ବା କେଉଁ ଦୋକାନରେ ବିକ୍ରି କରାଯାଉଛି ସେ ନେଇ ବିଭାଗ ତଦନ୍ତ କରୁଛି ବୋଲି ଡିଏସ୍ଇ ଅର୍ଚ୍ଚନା ବାରିକ ସୂଚନା ଦେଇଛନ୍ତି ।