ଚାନ୍ଦବାଲି,୨୦/୦୯: ଦିନକୁ ଦିନ ବଢ଼ିବାରେ ଲାଗିଛି ଚିଙ୍ଗୁଡ଼ି ମାଫିଆମାନଙ୍କ ଦୌରାତ୍ମ୍ୟ । ଚାଷୀଙ୍କୁ ସ୍ଲୁଇସଗେଟର ବ୍ୟବହାର କରିବାକୁ ଦେଉନାହାନ୍ତି ଚିଙ୍ଗୁଡ଼ି ମାଫିଆ । ଏହି କାରଣରୁ ଚାଷୀ ମାନଙ୍କ ବିଲରେ ଚିଙ୍ଗୁଡ଼ି ପୋଖରୀରୁ ଲୁଣିପାଣି ଆସି ମାଡୁଛି । ଯାହା ଫଳରେ ନଷ୍ଟ ହେଉଛି ଚାଷ । ଭଦ୍ରକ ଜିଲ୍ଲା ଚାନ୍ଦବାଲି ଏନଏସି ଅଧିନ ହରିପୁର ଗ୍ରାମରେ ଏଭଳି ଘଟଣା ଘଟଛି ।

ସୂଚନା ମୁତାବକ, ଅଧିକ ରୋଜଗାର ପାଇଁ ଚିଙ୍ଗୁଡ଼ି ମାଫିଆମାନେ ଚାଷୀଙ୍କ ପେଟକୁ ପ୍ରହାର କରୁଛନ୍ତି । ଚାନ୍ଦବାଲି ଏନଏସି ଅଧିନ ହରିପୁର ଗ୍ରାମରେ ଚାଷୀ ମାନଙ୍କ ଆବଶ୍ୟକ ନିମନ୍ତେ ମଧୁର ଜଳ ସଞ୍ଚୟ ପାଇଁ ସରକାର ଏକ ସ୍ଲୁଇସଗେଟ ନିର୍ମାଣ କରିଥିଲେ । କିଛି ଚିଙ୍ଗୁଡ଼ି ମାଫିଆମାନେ ନିଜର ଲାଭ ପାଇଁ ସେହି ସ୍ଲୁଇସଗେଟକୁ ଚାଷୀମାନଙ୍କୁ ବ୍ୟବହାର କରିବାକୁ ଦେଉନାହାନ୍ତି । ଫଳରେ ଚାଷୀ ତାର ଜୀବିକା ହରାଉଛି । ଏହି କାରଣରୁ ୨୦୦ରୁ ଅଧିକ ଚାଷୀମାନଙ୍କ ବିଲରେ ଚିଙ୍ଗୁଡ଼ି ପୋଖରୀରୁ ଲୁଣାପାଣି ମାଡିଯାଇଛି । ଯାହା ଫଳରେ ଧାନତଳି ସମ୍ପୂର୍ଣ୍ଣ ନଷ୍ଟ ହୋଇ ଯାଇଛି । ଏବିଷୟରେ ଚାଷୀମାନେ ଚିଙ୍ଗୁଡ଼ି ମାଫିଆଙ୍କୁ ଅଭିଯୋଗ କଲେ, ସେମାନେ ଗାଳିଗୁଲଜ କରିବା ସହିତ ମାଡ ମାରିବାକୁ ମଧ୍ୟ ପଛାଉ ନାହାନ୍ତି । ତେଣୁ ଏନେଇ ଚାଷୀମାନେ ଚାନ୍ଦବାଲି ମତ୍ସ୍ୟ ଅଧିକାରୀଙ୍କୁ ଏକ ଲିଖିତ ଅଭିଯୋଗ କରିଥିଲେ । ଏଥିସହିତ ଯଥାଶୀଘ୍ର ତଦନ୍ତ କରି କ୍ଷତିପୂରଣ ଦେବା ସହିତ ଚିଙ୍ଗୁଡ଼ି ମାଫିଆ ମାନଙ୍କ ଉପରେ ଦୃଢ଼ କାର୍ଯ୍ୟନୁଷ୍ଠାନ ନେବା ପାଇଁ ଦାବି କରଛନ୍ତି  ଚାଷୀ ।