ବାଙ୍କୀ, ୨୧/୧୧ : କନ୍ୟା ସନ୍ତାନ ଜନ୍ମ ହେଲା ବୋଲି ଶ୍ଵଶୁର ଘରେ ଜ୍ଵାଇଁଙ୍କ ଉନ୍ମତ୍ତ କାଣ୍ଡ। ରାତିରେ ନିଜ କନ୍ୟା ସନ୍ତାନକୁ ଜୀବନରୁ ମାରିଦେବାକୁ ଉଦ୍ୟମ କଲା ଜନ୍ମକଲା ବାପା। ଏହାକୁ ପ୍ରତିବାଦ କରିବାରୁ ଶ୍ବଶୁରକୁ ଗୋଡ଼ାଇ ଗୋଡ଼ାଇ ଶାବଳରେ ମୁଣ୍ଡକୁ ପିଟିପିଟି ଲହୁ ଲୁହାଣ କଲା ଜ୍ଵାଇଁ। ଏଭଳି ଅଭାବନୀୟ ଘଟଣା ଘଟିଛି କଟକ ଜିଲ୍ଲା ବାଙ୍କୀ ବ୍ଲକ ବୈଦେଶ୍ୱର ଥାନା ଅନ୍ତର୍ଗତ ବଳଭଦ୍ରପୁର ପଞ୍ଚାୟତ ଗୋପିନାଥପୁର ଗ୍ରାମରେ। 

ସୂଚନାନୁଯାୟୀ, ଗୋପୀନାଥପୁର ଗ୍ରାମର ନିତ୍ୟାନନ୍ଦ କରଙ୍କ ବଡ଼ ଝିଅ ନୟାଗଡ଼ ଜିଲ୍ଲା ଫତେଗଡ ଥାନା ବାଲିଆପଟା ଗ୍ରାମର ମାନସ କରଙ୍କୁ ୧୦ ବର୍ଷ ତଳେ ବିବାହ କରିଥିଲେ। ମାନସଙ୍କର ଗୋଟିଏ ଆଠ ବର୍ଷର ପୁଅ ଅଛି। ମାତ୍ର ଦ୍ୱିତୀୟ ପ୍ରସବ ପାଇଁ ବାଙ୍କୀ ଗୋପୀନାଥପୁର ଶ୍ବଶୁର ଘରେ ରହୁଥିଲେ। ଗତ ସପ୍ତାହ ତଳେ ତାଙ୍କର ଏକ କନ୍ୟା ସନ୍ତାନ ଜନ୍ମ ହୋଇଛି। ତେବେ କାହିଁକି କନ୍ୟା ସନ୍ତାନ ଜନ୍ମ ହେଲା ବୋଲି ତାକୁ ଜୀବନରୁ ମାରିଦେବାକୁ ଧମକ ଦେଇ ଶ୍ୱଶୁର ଘରେ ସନ୍ଧ୍ୟାରେ ପହଞ୍ଚି ସମସ୍ତଙ୍କୁ ଗାଳି ଗୁଲଜ କରିଥିଲେ। ରାତିରେ କନ୍ୟା ସନ୍ତାନକୁ ମାରିବାକୁ ଉଦ୍ୟମ କରୁଥିବା ବେଳେ ଶାଶୁ ଓ ଶ୍ବଶୁର ବିରୋଧ କରିବାରୁ ଏକ ଧାରୁଆ ଅସ୍ତ୍ର ଓ ଶାବଳରେ ଶ୍ବଶୁରଙ୍କୁ ମୁଣ୍ଡକୁ ପିଟି ରକ୍ତାକ୍ତ କରି ପକାଇଥିଲେ ମାନସ କର। ଚିତ୍କାର କରିବାରୁ ଗ୍ରାମବାସୀମାନେ ପହଞ୍ଚି ଅଭିଯୁକ୍ତ ମାନସକୁ କାବୁ କରି ଅଟକ ରଖି ପୋଲିସ ଜିମା ଦେଇଛନ୍ତି। ସେପଟେ ଶ୍ବଶୁର ନିତ୍ୟାନନ୍ଦ କରଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି। ବୈଦେଶ୍ୱର ପୋଲିସ ମାନସକୁ ଗିରଫ କରି ତଦନ୍ତ ଆରମ୍ଭ କରିଛି।