ସମ୍ବଲପୁର,୦୨/୦୪: ରସ ଜାମୁଡାଲିରେ... ହାଏ ତୋର୍ ମୁଲକି ହସି, ମାର୍ ଡାଲା ମାର୍ ଡାଲା...କୁଲ୍ଫି ରାନୀ ଚକୋବାର୍... ତୁଇ ଗୁଡ୍ନୁ ମୁନ୍ଡକେ ଏକ ନମ୍ବର... ସଜନୀ ଗୋ ଆମର୍ ଲାଗି ସମିୟାଁ ଦେବ ଟିକେ... ମୋ କ୍ୟୁଟ୍ ଗେଲି... ଏଭଳି ସମ୍ବଲପୁରୀ ଗୀତ ଏବେ ଟ୍ରେଣ୍ଡରେ । ତେଣୁ ଏହି ଗୀତଗୁଡ଼ିକରେ ନିର୍ବାଚନ ପ୍ରଚାର ପାଇଁ ଆଗୁଆ ବୁକିଂ ଆରମ୍ଭ ହୋଇଯାଇଛି । ଗୀତର କ୍ରେଜ୍କୁ ଦେଖି ସାରା ଓଡିଶାର ନେତା ଏବେ ସଙ୍ଗୀତ ନିର୍ଦ୍ଦେଶକ, ଷ୍ଟୁଡିଓ ମାଲିକ ଏବଂ ଗୀତିକାରଙ୍କ ପାଖକୁ ଧାଉଁଛନ୍ତି । ଟିକଟ୍ ମିଳିନଥିଲେ ସୁଦ୍ଧା ବଇନା ଦେଇସାରିଛନ୍ତି । ନେତା ଓ ତାଙ୍କ ସମର୍ଥକ ଆଗୁଆ ସ୍ଲଟ୍ ବୁକିଂ କରି ଗୀତ ଠିକ୍ ସମୟରେ ଦେବାକୁ ଅଗ୍ରୀମ ପଠାଇ ସାରିଛନ୍ତି ।
ସଙ୍ଗୀତ ନିର୍ଦ୍ଦେଶକ ତଥା ଗୀତିକାର ରତନ ପୂଜାରୀ କହିଛନ୍ତି, କିଛି ନେତା ଗୀତ ଲେଖିବାକୁ କହିଛନ୍ତି । ଯେଉଁମାନଙ୍କ ଟିକଟ ପକ୍କା ହୋଇଛି, ସେନେଇ କାମ ଆରମ୍ଭ ହୋଇଛି । କିଛି ଅଗ୍ରୀମ ମଧ୍ୟ ଦେଇଛନ୍ତି । କେବଳ ସମ୍ବଲପୁର, ବରଗଡ଼, ଝାରସୁଗୁଡ଼ା ନୁହେଁ, କଟକ, କେନ୍ଦ୍ରାପଡା, ବାଲେଶ୍ୱର ପଟରୁ ନେତା ମଧ୍ୟ ଗୀତ ପ୍ରସ୍ତୁତ କରିବାକୁ କହିଛନ୍ତି । କିନ୍ତୁ ଟିକଟ୍ ମିଳିନଥିବାରୁ ଏଯାଏ ଗୀତ ସମ୍ପୂର୍ଣ୍ଣ ହୋଇପାରିନି । ହେଲେ ଏବେ ପଶ୍ଚିମ ଓଡ଼ିଶାର କିଛି ଷ୍ଟୁଡିଓରେ ଅଧିକ ଭିଡ଼ ରହିବ । ପୂର୍ବରୁ ଆମେ ଅନେକ ରାଜନେତାଙ୍କ ପାଇଁ ଗୀତ ପ୍ରସ୍ତୁତ କରିଛୁ । ଅବିଭକ୍ତ ସମ୍ବଲପୁର ଜିଲ୍ଲାର ଜଣେ ବରିଷ୍ଠ ନେତାଙ୍କ ସମର୍ଥକ କହିଛନ୍ତି, ଆମ ନେତାଙ୍କୁ ନିଶ୍ଚିତ ଟିକଟ୍ ମିଳିବ । ତେଣୁ ଆଗୁଆ ଗୀତ ରେକର୍ଡ ପାଇଁ ଅଗ୍ରୀମ ଦେଇସାରିଛୁ । ରସ ଜାମୁଡାଲିରେ... ଓ କୁଲଫି ରାନୀ ଚକୋବାର... ଗୀତକୁ ଆମ ନେତାଙ୍କ ପ୍ରଚାର ପାଇଁ ରେକର୍ଡିଂ କରିବାକୁ କହିଛୁ । ଟିକଟ୍ ମିଳିବା ମାତ୍ରେ ପ୍ରଚାର ଗାଡ଼ିରେ ଏହି ଗୀତ ସବୁ ବାଜିବ ।
ବିଜେଡି ମାତ୍ର ୭୨ ବିଧାନସଭା ଆସନ ପାଇଁ ପ୍ରାର୍ଥୀଙ୍କ ଟିକଟ ଘୋଷଣା କରିଛି । ହେଲେ ବିଜେପି ୧୧୨ ବିଧାନସଭା ଆସନ ପାଇଁ ପ୍ରାର୍ଥୀଙ୍କ ଟିକଟ ଘୋଷଣା କରିଛି।ହେଲେ କଂଗ୍ରେସ ଗୋଟିଏ ହେଲେ ଆସନ ପାଇଁ ପ୍ରାର୍ଥୀ ଘୋଷଣା କରିନାହାନ୍ତି । ସେମିତି ଲୋକସଭା ପାଇଁ ବିଜେପି ସମ୍ପୂର୍ଣ୍ଣ ୨୧ ଆସନ ଓ ବିଜେଡି ୧୫ ଆସନର ପ୍ରାର୍ଥୀ ଘୋଷଣା କରିଛି । ତଥାପି ନିଜର ପ୍ରଚାର ପାଇଁ ନେତା ଓ ତାଙ୍କ ସମର୍ଥକ ଆଗୁଆ ବଇନା ଦେଇସାରିଛନ୍ତି । ଅଧାରୁ ଅଧିକ ଆସନ ପାଇଁ ନେତାଙ୍କୁ ଟିକଟ ମିଳିନଥିଲେ ବି ସବୁ ଗୀତ ଲାଗି ଅଗ୍ରୀମ ଦେଇସାରିଛନ୍ତି । କଣ୍ଠଶିଳ୍ପୀ ଶାନ୍ତନୁ ସାହୁ କହିଛନ୍ତି, ମତେ ପଶ୍ଚିମ ଓଡ଼ିଶାର ବହୁ ନେତା ଯୋଗାଯୋଗ କରିଛନ୍ତି । ଆଗୁଆ ଗୀତ ପ୍ରସ୍ତୁତ କରିବାକୁ ବରାଦ ଦେଇଛନ୍ତି । ଧର୍ମେନ୍ଦ୍ର ପ୍ରଧାନଙ୍କ ଟିକଟ୍ ଫାଇନାଲ୍ ହୋଇସାରିଥିବାରୁ ତାଙ୍କ ଗୀତ ସରିଯାଇଛି । ହେଲେ ଅନ୍ୟମାନଙ୍କର ଟିକଟ୍କୁ ଅପେକ୍ଷା କରାଯାଇଛି ।
ପ୍ରଚାର ଗୀତ ପ୍ରସ୍ତୁତ ପାଇଁ ପୂର୍ବରୁ ଟ୍ରାକ୍ ମହଜୁଦ ରହୁଛି । ତେଣୁ ବିଶେଷ ସମୟ ଲାଗି ନଥାଏ । ହେଲେ ଏହି ସଙ୍ଗୀତର ତାଳେ ତାଳେ ଗୀତ ଲେଖିବା (ସେ ବି ପ୍ରାର୍ଥୀଙ୍କୁ ନେଇ) ଟିକେ ସମୟ ସାପେକ୍ଷ । ତେଣୁ କିଛି ସଙ୍ଗୀତକୁ ଆଗୁଆ ନିର୍ବାଚନ ଶୈଳୀରେ ଲେଖା ସରିଥାଏ। କେବଳ ପ୍ରାର୍ଥୀଙ୍କ ନାଁ, ତାଙ୍କ ବିକାଶମୂଳକ କାମ ଓ ନିର୍ବାଚନମଣ୍ଡଳୀର ନାଁ ଭର୍ତ୍ତି କରାଯାଏ । ଫଳରେ ଦିନେ, ୨ ଦିନ ମଧ୍ୟରେ ସମ୍ପୂର୍ଣ୍ଣ ଗୀତଟି ଶେଷ ହୋଇଯାଏ ବୋଲି ଷ୍ଟୁଡିଓ ମାଲିକ କହିଛନ୍ତି।
