ଭୁବନେଶ୍ଵର, ୧୩/୦୪ : ଗୁଜରାଟର ଜଣେ ଦମ୍ପତି ନିଜର ୨୦୦ କୋଟିର ସମ୍ପତ୍ତି ଦାନ କରି ସନ୍ନ୍ୟାସୀ ହୋଇଛନ୍ତି । ସାବରକାଣ୍ଠା ଜିଲ୍ଲାର ହିମ୍ମତନଗର ବାସିନ୍ଦା ବ୍ୟବସାୟୀ ଭାବେଶ ଭାଈ ଭଣ୍ଡାରୀ ଓ ତାଙ୍କ ପତ୍ନୀ ଏହି ମହତ କାର୍ଯ୍ୟ କରିଛନ୍ତି । ସାଂସାରିକ ମୋହ ତ୍ୟାଗ କରି ସନ୍ନ୍ୟାସ ମାର୍ଗ ଆପଣେଇଛନ୍ତି । ସମସ୍ତ ପ୍ରକାର ସୁଖ ସୁବିଧାରେ ବଡ଼ ହୋଇଥିବା ଭାବେଶ ଜୈନ ସମାଜରେ ସର୍ବଦା ଦୀକ୍ଷାର୍ଥୀ ଓ ଗୁରୁଜନଙ୍କୁ ଭେଟୁଥିଲେ । ଭାବେଶଙ୍କର ୧୬ ବର୍ଷୀୟ ପୁଅ ଓ ୧୯ ବର୍ଷୀୟା ଝିଅ ଦୁଇ ବର୍ଷ ପୂର୍ବେ ସଂଯମୀ ଜୀବନ ନିର୍ବାହ କରି ଜୈନ ସମାଜରେ ଦୀକ୍ଷା ନେବାକୁ ନିଷ୍ପତ୍ତି ନେଇଥିଲେ । ଗୃହ ନିର୍ମାଣ ବ୍ୟବସାୟ ସମେତ ଅହମଦାବାଦର କାର୍ଯ୍ୟ ଛାଡ଼ି ହଠାତ୍‌ ଦୀକ୍ଷାର୍ଥୀ ହେବାକୁ ଭାବେଶ ନିଷ୍ପତ୍ତି ନେଇଛନ୍ତି । 

ତାଙ୍କର ଜଣେ ପରିଚିତ କହିଛନ୍ତି, ଜୈନ ସମାଜରେ ଦୀକ୍ଷାର ଖୁବ୍‌ ମହତ୍ତ୍ୱ ରହିଛି । ଦୀକ୍ଷା ଗ୍ରହଣ କରିଥିବା ବ୍ୟକ୍ତିକୁ ଭିକ୍ଷା ମାଗି ଜୀବନଯାପନ କରିବାକୁ ପଡ଼େ । ସମସ୍ତ ସୁଖ ସୁବିଧା ତ୍ୟାଗ କରିବାକୁ ପଡ଼େ । ସମଗ୍ର ଦେଶରେ ଖାଲି ପାଦରେ ଭ୍ରମଣ କରିବାକୁ ପଡ଼େ । ସନ୍ନ୍ୟାସୀ ହେବାକୁ ଯାଉଥିବା ଭାବେଶଙ୍କର ୪ କିମି ଲମ୍ବା ଶୋଭାଯାତ୍ରା ଖୁବ୍‌ ଧୂମ୍‌ଧାମରେ ହୋଇଛି । ଆସନ୍ତା ୨୨ ତାରିଖରେ ହିମ୍ମତନଗର ରିଭର ଫ୍ରଣ୍ଟ୍‌ରେ ଭଣ୍ଡାରୀ ପରିବାର ସମେତ ୩୫ ଜଣ ସନ୍ନ୍ୟାସ ନେବେ ।