ନୂଆଦିଲ୍ଲୀ: ମାର୍ଚ୍ଚ ୨୨ରୁ ଆରମ୍ଭ ହେବାକୁ ଯାଉଛି ଆଇପିଏଲ-୨୦୨୪ । ଆଉ ଏହାରି ମଧ୍ୟରେ ଶୁଭମନ ଗିଲଙ୍କ ନେତୃତ୍ବାଧୀନ ଗୁଜରାଟ ଟାଇଟନ୍ସ ଟିମ୍ର ଜଣେ ଖେଳାଳି ଆଇପିଏଲ ପୂର୍ବରୁ ଚର୍ଚ୍ଚାକୁ ଆସିଛନ୍ତି । ଆହତ ପରେ ଅନ୍ତର୍ଜାତୀୟ ଟିମ୍କୁ ଫେରିବା ପରେ ଏଭଳି ପ୍ରଦର୍ଶନ କରିଛନ୍ତି ଯେ ସେ ଆଇସିସି ରାଙ୍କିଂରେ ବହୁ ଆଗକୁ ଆସିଛନ୍ତି । ଆମେ କହୁଛୁ ଆଫଗାନିସ୍ତାନର ରାଶିଦ ଖାନଙ୍କ କଥା ।
ଏଥର ଆଇପିଏଲରେ ଗୁଜରାଟ ଟାଇଟନ୍ସ ଉପରେ ସମସ୍ତଙ୍କ ନଜର ରହିବ । ଦୁଇଟି ସିଜ୍ନରେ ଅଂଶଗ୍ରହଣ କରିଥିବା ଟିମ୍ ଗୋଟିଏରେ ଚାମ୍ପିୟନ ହୋଇଥିଲା ଏବଂ ଥରେ ରନର ଅପ୍ ହୋଇଥିଲା । ଅର୍ଥାତ ପ୍ରତି ଥର ଟିମ୍ ଖୁବ ଭଲ ପ୍ରଦର୍ଶନ କରିଛି । ସେତେବେଳେ ଟିମ୍ର ନେତୃତ୍ବ ନେଇଥିଲେ ହାର୍ଦ୍ଦିକ ପାଣ୍ଡ୍ୟା । ହେଲେ ଏବେ ସେ ମୁମ୍ବାଇ ଇଣ୍ଡିଆନ୍ସରେ ସାମିଲ ହୋଇଥିବା ବେଳେ ଟିମ୍ର ନେତୃତ୍ବ ନେଇଛନ୍ତି ।
ସେପଟେ ଗୁଜରାଟ ଟାଇଟନ୍ସର ମଙ୍ଗ ସମ୍ଭାଳିବେ ଶୁଭମନ ଗିଲ । ରାଶିଦ ଖାନ ଟିମ୍ ଉପ ଅଧିନାୟକ ରହିବେ । ଦିନିକିଆ ବିଶ୍ବକପ ପରେ ଆହତ ହୋଇଥିବା ରାଶିଦଙ୍କର ସର୍ଜରୀ ହୋଇଛି । ଏଥିପାଇଁ ସେ ଦୀର୍ଘ ସମୟ ଧରି କ୍ରିକେଟ ମଇଦାନରୁ ଦୂରେଇ ରହିଥିଲେ । କିନ୍ତୁ ଆୟାର୍ଲାଣ୍ଡ ବିପକ୍ଷରେ ଆୟୋଜିତ ଟି-୨୦ ସିରିଜ୍ରେ ପ୍ରତ୍ୟାବର୍ତ୍ତନ କରିବା ସହ ସେ ଖୁବ ଭଲ ପ୍ରଦର୍ଶନ କରିଛନ୍ତି । ଆଉ ତାଙ୍କର ଏହି ସଫଳତା ଆଇସିସି ରାଙ୍କିଂ ତାଲିକାରେ ପ୍ରତିଫଳିତ ହୋଇଛି ।
ଆଇସିସି ଟି-୨୦ ରାଙ୍କିଂରେ ସେ ୪ଟି ସ୍ଥାନ ଉପରକୁ ଉଠିବା ସହ ଏବେ ଦଶମ ସ୍ଥାନରେ ପହଞ୍ଚି ଯାଇଛନ୍ତି । ତେବେ ରାଶିଦଙ୍କୁ ଆଗକୁ ଆଇପିଏଲରେ ଦେଖିବାକୁ ମିଳିବ । ମାର୍ଚ୍ଚ ୨୪ରେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଆଇପିଏଲ-୨୦୨୪ର ଯାତ୍ରା ଆରମ୍ଭ କରିବ ଗୁଜରାଟ ଟାଇଟନ୍ସ ।
