ନୂଆଦିଲ୍ଲୀ ୨୧/୧୧: ଅନ୍ତର୍ଜାତୀୟ ଖ୍ୟାତିସମ୍ପନ୍ନ ପୁଷ୍କର ପଶୁ ମେଳାରେ ବିକ୍ରି ପାଇଁ ଆସୁଥିବା ପଶୁଙ୍କ ସଂଖ୍ୟା ଦିନକୁ ଦିନ ବଢୁଛି । ମେଳାରେ ୩୫ ଘୋଡ଼ା ରାଜସ୍ଥାନ ବାହାରୁ ଆସିଛନ୍ତି । ଏମାନଙ୍କ ମଧ୍ୟରେ ଆକର୍ଷଣର କେନ୍ଦ୍ର ହୋଇଛି ମାରୱାଡ଼ି ପ୍ରଜାତିର ଏକ ଘୋଡ଼ା । ନାଁ ଫ୍ରେଜେଣ୍ଡ୍ । ଗୁଜରାଟରୁ ଏହା ମେଳାକୁ ଆସିଛି । ଘୋଡ଼ାର ମୂଲ୍ୟ ଓ ତା’ର ଦୈନନ୍ଦିନ ଖାଦ୍ୟ ତାଲିକା ଶୁଣି ସମସ୍ତେ ଚକିତ ହେଉଛନ୍ତି । ଜାଣି ଆଶ୍ଚର୍ଯ୍ୟ ହେବେ, ଫ୍ରେଜେଣ୍ଡ୍ର ମୂଲ୍ୟ ୭ କୋଟି ଟଙ୍କା ।
ଏହାର ମାଲିକ ଯୁବରାଜ ଜାଡେଜା କହିଛନ୍ତି, ଗତ ଦେଢ଼ ବର୍ଷରୁ ଫ୍ରେଜେଣ୍ଡ୍ ତାଙ୍କ ପାଖରେ ଅଛି । ଏହାକୁ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ନେବା ପାଇଁ ସ୍ୱତନ୍ତ୍ର ଆମ୍ବୁଲାନ୍ସ ଭଳି ବାହନ ନିର୍ମାଣ କରାଯାଇଛି । ଫ୍ରେଜେଣ୍ଡ୍ ପ୍ରତିଦିନ ଗୀର୍ ଗାଈର ୧୫ ଲିଟର କ୍ଷୀର ପିଏ । ୫ କିଲୋ ଚଣା ଓ ୫ କିଲୋ ଡାଲି ମଧ୍ୟ ଖାଏ । ଜାଡେଜାଙ୍କ ଅନୁସାରେ, ଏହା ସାଧାରଣ ପାଣି ନୁହେଁ, ବରଂ ମିନେରାଲ ୱାଟର୍ ପିଏ । ଏହାର ଲମ୍ବ ୬୪ ଇଞ୍ଚ, ଓଜନ ୩୫୦ କିଲୋ । ଫ୍ରେଜେଣ୍ଡ୍ ହେଉଛି ରାଜସ୍ଥାନୀ ପ୍ରଜାତିର ପ୍ରସିଦ୍ଧ ଘୋଡ଼ା ରୁହିର ପୁଅ । ତା’ ମା’ ନାଁ ରତ୍ନାଗିରୀ ।
ଫ୍ରେଜେଣ୍ଡ୍ ଅଦ୍ୟାବଧି ଗୁଜରାଟ, ମହାରାଷ୍ଟ୍ର ଓ ମଧ୍ୟପ୍ରଦେଶର ବିଭିନ୍ନ ପ୍ରତିଯୋଗିତାରେ ଭାଗ ନେଇଛି । କୌଣସି ଘୋଡ଼ା ତାକୁ ଆଜି ପର୍ଯ୍ୟନ୍ତ ହରାଇ ପାରିନାହାନ୍ତି । ଜାଡେଜା କିନ୍ତୁ ଘୋଡ଼ାକୁ ବିକ୍ରି କରିବା ଉଦ୍ଦେଶ୍ୟରେ ଆଣିନାହାନ୍ତି । ସେ ଏହାକୁ ପ୍ରଥମ ଥର ଅନ୍ତର୍ଜାତୀୟ ପୁଷ୍କର ମେଳାରେ ଆୟୋଜିତ ପ୍ରତିଯୋଗିତାରେ ସାମିଲ କରିବାକୁ ଆଣିଛନ୍ତି । ଦୀପାବଳି ପରଦିନଠୁ ଆରମ୍ଭ ହୋଇଥିବା ପୁଷ୍କର ପଶୁ ମେଳାରେ ବିଭିନ୍ନ ଶ୍ରେଣୀର ହଜାର ହଜାର ପଶୁ ସାମିଲ ହୋଇଛନ୍ତି । ସର୍ବାଧିକ ୩୬୫୯ ଓଟ ସାମିଲ ହୋଇଛନ୍ତି ।
