ଦାରିଙ୍ଗବାଡ଼ି,୨୭/୯ : ଦିନକୁ ଦିନ ଋଣ ପ୍ରଦାନ କରୁଥିବା ଫାଇନାନ୍ସ କମ୍ପାନୀର କର୍ମଚାରୀଙ୍କ ଦାଦାଗିରି ବୃଦ୍ଧି ପାଇବାରେ ଲାଗିଛି । ସୁଦ୍ଧ ଆଶାରେ ଲୋକଙ୍କୁ ଋଣ ଯାଚି ଯାଚି ଦେଉଥିବାବେଳେ କିସ୍ତି ଟଙ୍କା ଦେବାରେ ଟିକିଏ ବିଳମ୍ବ ହେଲେ ଦେଖାଉଛନ୍ତି ଦାଦାଗିରି । ଫାଇନାନ୍ସ କମ୍ପାନୀର କର୍ମଚାରୀମାନେ ଅଶିକ୍ଷିତ ଆଦିବାସୀ ଲୋକଙ୍କୁ କିସ୍ତି ଟଙ୍କା ଆଦାୟ କରିବାବେଳେ ସବୁ ସୀମା ଟପି ଯାଉଛନ୍ତି । ଅଶ୍ଳିଳ ଭାଷା ବ୍ୟବହାର କରିବା ସହ ହତ୍ୟା ଧମକ ଦେଇ ଭୟଭୀତ କରାଇ କିସ୍ତି ଟଙ୍କା ଆଦାୟ କରୁଛନ୍ତି  । 

ଏଭଳି କିଛି ଅଭିଯୋଗ ଆସିଛି ଦାରିଙ୍ଗବାଡି ଥାନା ଅନ୍ତର୍ଗତ  ସିମନବାଡ଼ି ଅଞ୍ଚଳରୁ  । ସିମନବାଡ଼ି ବଜାରରେ ପରିବା ଦୋକାନ କରିଛନ୍ତି ଆଦିବାସୀ ଯୁବକ ଅମରେନ୍ଦ୍ର ପ୍ରଧାନ । ନିଜ ପରିବା ଦୋକାନ ଚଲେଇବା ପାଇଁ  ଅମରେନ୍ଦ୍ର   ବିଭିନ୍ନ ଫାଇନାନ୍ସ କମ୍ପାନୀରୁ ତାଙ୍କ ସ୍ତ୍ରୀ ଓ ମା’ଙ୍କ ନାମରେ ଋଣ କରିଥିଲେ। ସ୍ତ୍ରୀଙ୍କ ନାମରେ କରିଥିବା ଋଣ ପରିଶୋଧ କରିଥିବାବେଳେ ବ୍ୟବସାୟ ମାନ୍ଦା ଥିବାରୁ ମା’ଙ୍କ ନାମରେ ଥିବା ଋଣର ମାସିକିଆ କିସ୍ତି ଟଙ୍କା ପରିଶୋଧ କରିବାରେ ବିଳମ୍ବ ହୋଇଛି । ଅର୍ଥ ପରିଶୋଧ ବିଳମ୍ବ ହୋଇଥିବା ଯୋଗୁଁ ରାଇକିଆରେ ଥିବା ଆରବିଏଲ୍ ଫାଇନାନ୍ସ କମ୍ପାନୀର ଜଣେ କର୍ମଚାରୀ ଅମରେନ୍ଦ୍ରଙ୍କୁ ଫୋନ୍‌ କରି ତାଙ୍କ ମା’,ଭଉଣୀ ଓ ସ୍ତ୍ରୀଙ୍କୁ ନେଇ ଅନେକ ଅଶ୍ଳୀଳ ଭାଷାରେ ଗାଳିଗୁଲଜ କରିଥିବା ସହ ହତ୍ୟା ଧମକ ଦେଇଥିଲେ । ଏପରିକି ଜାତିଆଣ ଆକ୍ଷେପ ମଧ୍ୟ କରିଥିବା ନେଇ ଅମରେନ୍ଦ୍ର ଦାରିଙ୍ଗବାଡି ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଏ ନେଇ ତଦନ୍ତ କରୁଥିବାବେଳେ ଶନିବାର ଉକ୍ତ କମ୍ପାନୀର କର୍ମଚାରୀଙ୍କୁ ଥାନାକୁ ଡକାଯାଇଥିବା ପୋଲିସ ସୂଚନା ଦେଇଛି ।