ସମ୍ବଲପୁର,୦୮/୦୯: ନୂଆଦିଲ୍ଲୀରେ  ଜି-୨୦ ସମ୍ମିଳନୀ ପାଇଁ ବିଶ୍ୱର ବିଭିନ୍ନ ରାଷ୍ଟ୍ରର  ମୁଖ୍ୟଙ୍କ ସମେତ ଆନ୍ତର୍ଜାତିକ ସଂଗଠନର ମୁଖ୍ୟଙ୍କ ଆଗମନ ହେବାରେ ଲାଗିଛି । ଏହି ପରିପ୍ରେକ୍ଷୀରେ  ଏହି ଅତିଥିଙ୍କୁ ସ୍ୱାଗତ ସମ୍ବର୍ଦ୍ଧନା ବେଳେ ବିରଳ ଦୃଶ୍ୟ ଦେଖିବାକୁ ମିଳିଛି । ଅତିଥିଙ୍କୁ ସ୍ୱାଗତ ପାଇଁ  ଚାଲିଥିବା ପାରମ୍ପାରିକ ସମ୍ବଲପୁରରୀ ଡାଲଖାଇ  ନୃତ୍ୟର ତାଳେ ତାଳେ ଇଣ୍ଟରନ୍ୟାସନାଲ୍‌ ମନିଟାରି  ଫଣ୍ଡ (ଆଇଏମ୍‌ଏଫ୍‌)ର ମୁଖ୍ୟ ଖ୍ରୀଷ୍ଟାଲିନା ଜର୍ଜିଭା  ନୃତ୍ୟ କରିବା ଦୃଶ୍ୟ ଏବେ ଭାଇରାଲ ହେବାରେ  ଲାଗିଛି ।

ନୂଆଦିଲ୍ଲୀରେ ଆୟୋଜିତ ହୋଇଥିବା  ଜି-୨୦ ଶିଖର ସମ୍ମିଳନୀ ପାଇଁ ବିଶ୍ୱ ନେତାଙ୍କ ସୁଅ ଛୁଟିବାରେ ଲାଗିଛି । ଏହି ପରିପ୍ରେକ୍ଷୀରେ  ସମସ୍ତ ଆନ୍ତର୍ଜାତିକ ସଂଗଠନର ମୁଖ୍ୟମାନେ  ବି ଏହି ସମ୍ମିଳନୀରେ ଭାଗ ନେବାକୁ ଦିଲ୍ଲୀରେ  ପହଞ୍ଚୁଛନ୍ତି । ଆଉ ଏମାନଙ୍କୁ ସ୍ୱାଗତ କରିବାକୁ  ଦେଶର ବିଭିନ୍ନ ପ୍ରାନ୍ତର ସାଂସ୍କୃତିକ କାର୍ଯ୍ୟକ୍ରମ  ପରିବେଷିତ ହେଉଛି ।

ତେବେ ଗୁରୁବାର  ଆଇଏମ୍‌ଏଫ୍‌ ମୁଖ୍ୟ ଖ୍ରୀଷ୍ଟିଲିନା ଜର୍ଜିଭା  ଦିଲ୍ଲୀରେ ପହଞ୍ଚିବା ପରେ ତାଙ୍କୁ ଭବ୍ୟ ସ୍ୱାଗତ  କରାଯାଇଥିଲା । ଏହି ସମୟରେ ପଶ୍ଚିମ ଓଡିଶାରୁ  ଯାଇଥିବା କଳାକାରମାନେ ପାରମ୍ପାରିକ ଡାଲଖାଇ  ନୃତ୍ୟ ପରିବେଷଣ କରୁଥିଲେ । ଖ୍ରୀଷ୍ଟିଲିନା ଏହି  ନୃତ୍ୟ ଦେଖି ଆତ୍ମବିଭୋର ହେବା ସହ ନିଜକୁ  ସମ୍ଭାଳିପାରିନଥିଲେ । ଆଉ ନିଜେ ମଧ୍ୟ ନୃତ୍ୟ  କରୁଥିବା ଦେଖିବାକୁ ମିଳିଥିଲା । ଏହି ଭିଡିଓ ଏବେ ସୋସିଆଲ ମିଡିଆରେ ପ୍ରବଳ ମାତ୍ରାରେ  ଭାଇରାଲ ହେଉଥିବା ବେଳେ ପଶ୍ଚିମ ଓଡିଶାରେ  ଖୁସିର ଲହରୀ ଖେଳିଯାଇଛି ।