ନୂଆଦିଲ୍ଲୀ, ୩।୧୧: ସମଗ୍ର ବିଶ୍ୱରେ ଅଣ୍ଡାର ଚାହିଦା ରହିଛି । କେତେକ ଦେଶରେ ଏହା ମୁଖ୍ୟ ଆହାର । ତେବେ ଏକ ରିପୋର୍ଟରୁ ଜଣାପଡ଼ିଛି ଯେ, ଭାରତରେ ଅଣ୍ଡା ସବୁଠୁ ଶସ୍ତା । ବିଭିନ୍ନ ଦେଶ ଏବଂ ସହରରେ ମୁଦ୍ରାସ୍ଫୀତି ଅଙ୍କ ପ୍ରଦାନ କରୁଥିବା ସଂସ୍ଥା ନୁମ୍‌ବିଓ ଅନୁସାରେ, ଭାରତରେ ଅଣ୍ଡା ସବୁଠୁ ଶସ୍ତା । ଏଠାରେ ଡଜନ୍‌ ଅଣ୍ଡା ଦାମ୍ ୦.୯୪ ଡଲାର ବା ୭୮.୨୮ ଟଙ୍କା । ଅର୍ଥାତ୍‌ ଗୋଟିଏ ଅଣ୍ଡା ଦର ପାଖାପାଖି ସାଡେ ୬ ଟଙ୍କା । ଦେଶର ଅନେକ ସହରରେ ଦାମ ଆହୁରି କମ୍‌ ରହିଛି ।  

ଅନ୍ୟପକ୍ଷରେ, ସୁଇଜରଲାଣ୍ଡରେ ଡଜନ ଅଣ୍ଡା କିଣିବା ପାଇଁ ୬.୭୭ ଡଲାର ବା ପ୍ରାୟ ୫୬୪ ଟଙ୍କା ଖର୍ଚ୍ଚ କରିବାକୁ ପଡ଼ିଥାଏ । ଅର୍ଥାତ୍‌ ଏଠାରେ ଗୋଟିଏ ଅଣ୍ଡା ଦାମ ୪୭ ଟଙ୍କା । ଏହି ଦର ଭାରତ ତୁଳନାରେ ପ୍ରାୟ ୮ ଗୁଣା ଅଧିକ । ବିଶ୍ୱରେ ସୁଇଜରଲାଣ୍ଡରେ ଅଣ୍ଡା ଦାମ ସବୁଠାରୁ ମହଙ୍ଗା । ଏହି ତାଲିକାରେ ଦ୍ୱିତୀୟ ସ୍ଥାନରେ ରହିଛି ନ୍ୟୁଜିଲାଣ୍ଡ । ଏଠାରେ ଡଜନ ଅଣ୍ଡା ଦାମ ୫.୪୧ ଡଲାର । ଭାରତୀୟ ମୁଦ୍ରାରେ ଏହା ୪୫୦.୬୫ ଟଙ୍କା । ଡେନ୍‌ମାର୍କରେ ଡର୍ଜନ ଅଣ୍ଡା ପାଇଁ ୪.୩୨ ଡଲାର(୩୫୯.୮୫୬ ଟଙ୍କା) ଏବଂ ଆମେରିକାରେ ୪.୩୦ ଡଲାର(୩୫୮.୧୯ ଟଙ୍କା) ଦେବାକୁ ପଡ଼ିବ । ଏହା ପରେ ରହିଛନ୍ତି ଅଷ୍ଟ୍ରେଲିଆ, ଉରୁଗୁଏ, ଗ୍ରୀସ, ନର୍‌ୱେ ଏବଂ ଆୟାର୍ଲାଣ୍ଡ । ଏସିଆ କଥା ବିଚାରକୁ ନେଲେ ଏଠାରେ ଇସ୍ରାଏଲ୍‌ରେ ଅଣ୍ଡା ସବୁଠୁ ମହଙ୍ଗା । ଏହି ଦେଶରେ ଡଜନ ଅଣ୍ଡା କିଣିବା ପାଇଁ ୩.୪୧ ଡଲାର ବା ୨୮୪ ଟଙ୍କା ଦେବାକୁ ପଡ଼ିଥାଏ । 

ଏହା ପରେ ଦକ୍ଷିଣ କୋରିଆ ରହିଛି, ଯେଉଁଠି ଡଜନ ଅଣ୍ଡା ଦାମ ୩.୩୭ ଡଲାର ବା ୨୮୧ ଟଙ୍କା । ଇସ୍‌ଲାମିକ ଦେଶ ସାଉଦି ଆରବରେ ଡଜନ ଅଣ୍ଡା ଦାମ ୨.୫୩ ଡଲାର ବା ୨୧୧ ଟଙ୍କା । ଜାପାନରେ ଏହା ୧.୮୧ ଡଲାର ବା ୧୫୧ ଟଙ୍କା । ପାକିସ୍ତାନରେ ୧.୧୧ ଡଲାର ବା ୯୨ ଟଙ୍କା । ଭାରତ ପରେ ବିଶ୍ୱରେ ସବୁଠାରୁ ଶସ୍ତା ଅଣ୍ଡା ରୁଷରେ ମିଳିଥାଏ । ସେଠାରେ ଡଜନ ଅଣ୍ଡା ଦାମ ୧.୦୯ ଡଲାର ବା ୯୦ ଟଙ୍କା ।