ନୂଆଦିଲ୍ଲୀ,୧୧/୦୮: ଲଜିଷ୍ଟିକ୍ସ ଦକ୍ଷତା ବୃଦ୍ଧି, ଭିଡ଼ କମାଇବା ଏବଂ ଯୋଗାଯୋଗ ବ୍ୟବସ୍ଥାକୁ ଉନ୍ନତ କରିବା ଦିଗରେ କେନ୍ଦ୍ର ସରକାର ସୁଚିନ୍ତିତ ଯୋଜନା ଗ୍ରହଣ କରିବେ । ଦେଶରେ ୯୩୬ କିମିର ୮ ହାଇସ୍ପିଡ ରୋଡ କରିଡର ବିକଶିତ ହେବ । ଏହି କରିଡର ଗୁଡିକରେ ୫୦,୬୬୫ କୋଟି ଟଙ୍କା ବିନିଯୋଗ ହେବ । ଦେଶର ଯୋଗାଯୋଗ କ୍ଷେତ୍ରରେ ଏହା ବିଳ୍ପବ ଆଣିବା ସହ ଅଭିବୃଦ୍ଧିକୁ ତ୍ୱରାନ୍ୱିତ କରିବ ବୋଲି ଆଶା କରାଯାଉଛି ।
କେନ୍ଦ୍ର ସରକାର ଏ ସମ୍ପର୍କରେ ମାଇଁ ଗଭ୍ ଇଣ୍ଡିଆ ଏକ୍ସ ହ୍ୟାଣ୍ଡେଲରେ ସୂଚନା ଦେଇଛନ୍ତି । ପର୍ଯ୍ୟଟନ ସ୍ଥଳୀକୁ ଯୋଡିବା ଲାଗି ଆଗ୍ରା ଗ୍ୱାଲିୟର କରିଡର ବିକଶିତ ହେବ । ଏହା ଦ୍ୱାରା ତାଜମହଲ, ଆଗ୍ରା କିଲା, ଗ୍ୱାଲିୟର କିଲାକୁ ଯୋଡ଼ାଯିବା ସହ ଭ୍ରମଣ ସମୟ ୫୦% ହ୍ରାସ ହେବ । ଏହା ଦ୍ୱାରା ପର୍ଯ୍ୟଟନ କ୍ଷେତ୍ର ତ୍ୱରାନ୍ୱିତ ହେବ । ପଶ୍ଚିମବଙ୍ଗ, ଓଡ଼ିଶା, ଆନ୍ଧ୍ରପ୍ରଦେଶ ଏବଂ ଉତ୍ତର ପୂର୍ବାଞ୍ଚଳ ରାଜ୍ୟ ଲାଗି ଖଡଗପୁର-ମୋରଗ୍ରାମ କରିଡର ଆସିବ । ଏହି ଅଞ୍ଚଳ ଗୁଡିକର ବିକାଶରେ ଏହି କରିଡର ବିଶେଷ ଭାବେ ଯୋଗଦାନ ଦେଇପାରିବ । ଉତ୍ତର ପୂର୍ବାଞ୍ଚଳ ରାଜ୍ୟ ଗୁଡିକୁ ଯୋଡ଼ିବାରେ ଏହା ସହାୟକ ହେବ । ଏହି କରିଡର ପଞ୍ଜାବ, ହରିଆଣା, ରାଜସ୍ଥାନ ସହ ମହାରାଷ୍ଟ୍ରର ବନ୍ଦର ଗୁଡିକୁ ଯୋଡିପାରିବ ।
କରିଡ଼ର ଗୁଡିକ କାର୍ଯ୍ୟକ୍ଷମ ହେଲେ ଲଜିଷ୍ଟିକ୍ସ ଦକ୍ଷତା ବୃଦ୍ଧି ସହ ବିଶ୍ୱ ବିନିର୍ମାଣ କ୍ଷେତ୍ରରେ ଭାରତ ଏକ ପାୱାର ହାଉସ ହୋଇ ପାରିବ । ଅଯୋଧ୍ୟାରେ ଯୋଡ଼ି ହେବ ରିଂରୋଡ ପ୍ରକଳ୍ପ । ଏହା ପର୍ଯ୍ୟଟକଙ୍କ ଗମନା ଗମନରେ ସହାୟକ ହେବ । ରାୟପୁର ରାଞ୍ଚି କରିଡରର ପାଥାଲ ଗାଓଁ ଗୁମଲା ସେକ୍ସନ ଖଣି ଅଞ୍ଚଳ ଗୁମଲା, ଲୋହାରଡାଗା, କୋର୍ବା, ଧାନବାଦ ସହ ରାୟପୁର, ଦୁର୍ଗ, ବିଳାସପୁର ଏବଂ ବୋକାରୋ ଭଳି ଶିଳ୍ପାଞ୍ଚଳ ଗୁଡିକ ଯୋଡ଼ିବ ।
କାନପୁର ରିଂରୋଡ ପ୍ରକଳ୍ପର ୬ ଲେନ୍ ବିଶିଷ୍ଟ ଏନ୍ଏଚ୍ ସହରର ଭିଡ କମାଇବା ଲକ୍ଷ୍ୟ ରଖାଯାଇଛି । ବ୍ରହ୍ମପୁତ୍ର ନଦୀ ଉପରେ ପୋଲ ନିର୍ମାଣ ଦ୍ୱାରା ନର୍ଦନ ଗୌହାଟି ବାଏପାସ ନିର୍ମାଣ ହେବ । ପୁନେ ନାସିକ ମଧ୍ୟରେ ଯାତ୍ରାକୁ ସୁଗମ କରିବା ଲାଗି ନାସିକ-ଫାଟା ଖେଦ କରିଡର ଆସିବ । ସେହିଭଳି ଶିଳ୍ପାଞ୍ଚଳ ଲାଗି ପିମ୍ପରି ଚିଞ୍ଚୱାଡ ବିକଶିତ ହେବ ବୋଲି ସୂଚନା ମିଳିଛି ।
